பாவாணர் கோட்டத்தின் முகப்பில் அறிஞர்கள்
திருக்குறள் பதிப்புப் பணிகளில் ஈடுபட்டுள்ள திரு. மா. பொழிலன் அவர்கள் திருக்குறள் சிறப்பு குறித்து அரிய உரை வழங்கினார். மும்பையிலிருந்து வருகைபுரிந்த திரு. சு. குமணராசன் அவர்கள் முதன்மை விருந்தினர்களுக்குப் பயனாடை போர்த்தி, நூல்களை அன்பளிப்பாக வழங்கி, வாழ்த்திப் பேசினார். புதுச்சேரியிலிருந்து வருகைபுரிந்த பாவாணர் கொள்கை பரப்புநர் விருதுபெற்ற முனைவர் மு.இளங்கோவன், தமிழில் தமக்கு ஈடுபாடு வருவதற்குக் காரணமாக அமைந்த நிகழ்வுகளையும் தாம் செய்துவரும் தமிழ் ஆய்வுப்பணிகளையும் அவையில் பகிர்ந்துகொண்டார். மூத்த அறிஞர் வை. மு.கும்பலிங்கம் அவர்கள் பாவாணர் வழிச் செம்மல் விருது பெற்று, அரியதோர் உரை வழங்கி அவையினரை மகிழவைத்தார். மதுரையிலிருந்து வருகைபுரிந்த திரு. வரதராசன் அவர்கள் தம் தமிழ்த்தொண்டுகளை அவையினர்க்கு நினைவூட்டி, அறிவார்ந்த மக்களாகத் தமிழ் மக்கள் மிளிரவேண்டியதன் தேவையை வலியுறுத்தினார். பாவலர் முனைவர் பா. எழில்வாணன் அவர்களின் வருகையும் பாவும் அனைவராலும் பாராட்டும்படியாக இருந்தன. பட்டி மன்றம், நூல் வெளியீடு என்று பல நிகழ்வுகளை விழாக்குழுவினர் செய்திருந்தனர்.
விருதுநகர் மாவட்டம், இராசபாளையம் அடுத்துள்ள முரம்பு என்னும் ஊரில் அமைந்துள்ள பாவாணர் கோட்டம், பாவாணர் பாசறை என்னும் இரண்டையும் உலகத் தமிழ் மக்கள் ஆர்வத்தோடு சென்று பார்க்க வேண்டும். இக்கோட்டம் முழுமையாக உருவாவதற்குத் தங்களால் இயன்ற கைப்பொருளை வழங்கி ஊக்கப்படுத்த வேண்டும். பாவாணர் இளம் அகவையில் பயின்ற, பணிபுரிந்த ஊரில் இத்தகு நினைவிடத்தை உருவாக்கியுள்ள பாவாணர் கோட்டத்தினர் பாராட்டிற்கு உரியவர்கள். க.ப. அறவாணன், இரா. இளவரசு, குடந்தை. கதிர். தமிழ்வாணன், தமிழண்ணல், சேலம் வேள்நம்பி உள்ளிட்ட தமிழறிஞர்களின் படங்களைப் பாசறை அரங்கில் வைத்துப் போற்றியுள்ளமை பாராட்டினுக்கு உரியது.
மிகச் சிறந்த தமிழ்ப்பணியைத் தக்க அன்பர்களின் துணையுடன் செய்துவரும் தமிழாசிரியர் ஆ. நெடுஞ்சேரலாதன் அவர்கள் தமிழர்களின் நன்றிக்கு உரிய பெருமகனார் ஆவார்.
தொடர்புக்கு: தமிழாசிரியர் ஆ. நெடுஞ்சேரலாதன்
9443284903
கருத்துகள் இல்லை:
கருத்துரையிடுக