நிகழ்வுகள்

// நன்றாற்ற லுள்ளுந் தவறுண்டு அவரவர் பண்பறிந் தாற்றாக் கடை (திருக்குறள்) (பொருள்: அவரவருடைய இயல்புகளை அறிந்து அவரவருக்குப் பொருந்துமாறு செய்யாவிட்டால், நன்மை செய்வதிலும் தவறு உண்டாகும். மு.வ.) //

வியாழன், 13 மே, 2021

சிற்றூருக்கு வந்த தமிழ்க்கடல்கள்!


    இருபத்தைந்து ஆண்டுகளுக்கு முன் நூல் வெளியீட்டு விழாவை ஒரு சிற்றூரில் நடத்துவது  என்பது அவ்வளவு எளிதன்று. ஆனாலும் பெரும் முயற்சி எடுத்து நடத்திக்காட்டினார் அண்ணன் சிங்கார. மாணிக்கம். எங்களின் குடும்ப நண்பர்; தமிழ்த் தொண்டர்; தந்தை பெரியாருக்கு உள்கோட்டையில் சிலையமைத்த சாதனையாளர். சனதா பல்பொருள் அங்காடியின் நிறுவுநர்; சனதா அரிசி ஆலையையும் அப்பொழுது நிர்வாகம் செய்துவந்தவர்.  உள்கோட்டைப் பள்ளியில் பணிபுரிந்த இரா. அரிதாசு அவர்களும் நிகழ்ச்சி ஒருங்கிணைப்பில் துணைநின்றாவர்.

    அரியலூர் மாவட்டம் உடையார்பாளையம் வட்டம் கங்கைகொண்ட சோழபுரத்திற்கு மேற்கில் ஒரு கல் தொலைவில் உள்ள குருகாவலப்பர்கோவில் ஊரில் அமைந்திருந்த சனதா அரிசி ஆலை வளாகத்தில் 06.01.1996 சனிக்கிழமை மாலை 4 மணிக்கு நடைபெற்ற நூல் வெளியீட்டு விழாவுக்கு மதுரையிலிருந்து பேராசிரியர் தமிழண்ணல் அவர்கள் தம் நண்பர் இராம. விசுவநாதனுடன் மகிழுந்தில் நிகழ்ச்சி நடைபெறும் நேரத்துக்கு முன்னதாகவே வந்து, நிகழ்வைச் சிறப்பித்தார். க.ப. அறவாணன், தாயம்மாள் அறவாணன், தம் நட்புச் சுற்றமான அ. அறிவுநம்பி, இளமதி சானகிராமன், புலவர் இ. திருநாவலனார், அரங்க. மு. முருகையன், சு.தமிழ்வேலு, முனைவர் நா. இராசசெல்வம், உள்ளிட்டோருடன் புதுவையிலிருந்து வருகை தந்தனர். என் பேராசிரியர் ம.வே.பசுபதி, பேராசிரியர் மது.ச. விமலாநந்தம், கோ.வீரக்குமரன் (கேரளா வேளாண்மைப் பல்கலைக்கழகம்), திரைப்பா ஆசிரியர் அண்ணன் கே. அறிவுமதி, பாவாணர் பைந்தமிழ்த்தொண்டர் குடந்தைக் கதிர். தமிழ்வாணனார், வாழ்நாள் காப்பீட்டுக் கழக அதிகாரி சுப்பராயன் (நெய்வேலி) என்று பேச்சாளர்களின் பட்டியல் விரிவாக இருந்தது. அனைவரும் குறித்த நேரத்திற்கு வந்து நிகழ்ச்சிக்குப் பெருமைசேர்த்தனர்.

    விடுதலைப் போராட்ட வீரர் வெ. துரையனார் அடிகள் (தன் வரலாறு), மராட்டியர் ஆட்சியில் தமிழகமும் தமிழும் என்ற இரண்டு நூல்களையும் வெளியிட்டு வாழ்த்திப் பேசுவதுதான் விழாவின் நோக்கம். வெ. துரையனார் அடிகளாரின் மகனார் திரு. திருநாவலர்காந்தி (மயிலாடுதுறை), திரு. அருள்நந்திசிவம் (கும்பகோணம்), திரு. இராமாமிர்தத்தொண்டைமான், திரு. முகிலன் உள்ளிட்ட பெரியோர்களும் குடந்தையிலிருந்து வந்து பெருமைசெய்தனர்.

    என் மாமா திரு. மு.பாலசுப்பிரமணியன் அவர்கள் திருச்சியிலிருந்து தம் குடும்பத்தினருடன் வந்து ஆர்வமாகக் கலந்துகொண்டார்.

   திருச்சிராப்பள்ளி பாரதிதாசன் பல்கலைக்கழகத்தில் முனைவர் பட்ட ஆய்வாளனாக நான் அப்பொழுது இருந்ததால் நிகழ்ச்சி நாளன்றுதான் ஊருக்கு வந்தேன். விழாவுக்கான அழைப்பிதழ் அச்சிடல், அழைப்பிதழ் வழங்கல், பதாகை வரைதல், ஒலிபெருக்கி, காணொலிப் பதிவு என்று அனைத்து ஏற்பாடுகளையும் தம்பிமார் சா. வெங்கடாசலம், மணிவேல், அ.பாலசுப்பிரமணியன், ச. முத்துக்குமரன், திரு. மேகநாதன் உள்ளிட்டோர் செய்திருந்தனர். ஓவியர் தாமு அவர்கள் பதாகை வரைவதில் பெருந்துணையாக இருந்தார். 

                     பேராசிரியர் தமிழண்ணல் உரை

              பேராசிரியர் க.ப.அறவாணன் நூலை வெளியிட, 

              புலவர் இ.திருநாவலன்   பெற்றுக்கொள்ளுதல்

  நிகழ்ச்சியின் தொடக்கமாக சிறுவர்கள் நிகழ்த்திய நாட்டிய நிகழ்வு அனைவருக்கும் பெரு விருந்தாக இருந்தது. நிகழ்வுக்கு வந்திருந்தோரைச் சிதம்பரம் மயில்வாகணன் வரவேற்றார். ஆற்றொழுக்காக அமைந்த வரவேற்புரை அரைமணி நேரத்தையும் கடந்தது. அவர் உரையைக் கட்டுப்படுத்த முடியாமல் அவைத்தலைவர் கதிர். தமிழ்வாணன் பொறுமை காக்க வேண்டியிருந்தது. கோடையிடி முழங்கியது போலவும் பெரும் மழை அடித்து ஓய்ந்தது போலவும் வரவேற்புரை நிறைவுக்கு வந்தது. அதனை அடுத்து, கதிர். தமிழ்வாணனார் தம் தனித்தமிழ்க் கொள்கைகளை எடுத்துரைத்து, நூலாசிரியனாகிய என்னையும் என் முயற்சியையும் ஊக்கப்படுத்தி, வாழ்த்தி மகிழ்ந்தார். அதனை அடுத்து நூல் வெளியீட்டு உரையை முனைவர் க.ப. அறவாணன் நிகழ்த்தி, பெருமையும் வீரமும் பொருந்திய சோழமண்ணின் சிறப்பையும், சோழர்குல வரலாற்றையும் எடுத்துரைத்தார். பேராசிரியர் தமிழண்ணல் அவர்கள் தமிழின் நிலையை எண்ணி, நைந்து, தமிழ் வளர்ச்சிக்குரிய பணிகளில் அனைவரும் ஈடுபடவேண்டும் என்று அரியதோர் உரைப்பெருக்காற்றி, தமிழ்ச் சுடர் ஏற்றிவைத்தார். விடுதலைப் போராட்ட வீரர் வெ.துரையனார் அடிகள் நூலும், மராட்டியர் ஆட்சியில் தமிழகமும் தமிழும் நூலும் வெளியீடு கண்டன. இராம. விசுவநாதன், புலவர் இ. திருநாவலன், திரு. சுப்பராயன் ஆகியோர் பெற்றுக்கொண்டு வாழ்த்துரை வழங்கினர்.

துரையனார் அடிகளாரின் திருமகனார் திருநாவலர் காந்தி அவர்கள் தம் குடும்பத்தின் சார்பாக இனிய வாழ்த்துகளையும் அன்புமொழிகளையும் தெரிவித்து ஊக்கப்படுத்தினார். பேராசிரியர் ம.வே. பசுபதி, இராமாமிர்தத் தொண்டைமான், மது. ச. விமலாநந்தம், கோ. வீரக்குமரன், சுப்பராயன் உள்ளிட்டோரின் உரைகளும் சிறப்பாக அமைந்தன.

    பேராசிரியர் அ. அறிவுநம்பி அவர்களின் பேச்சு தனித்தன்மை வாய்ந்ததாக இருந்தது. பேருந்தில் பயணித்த தாம் குருகாவலப்பர்கோவிலில் இறங்காமல் மு.இளங்கோவன் பிறந்த ஊரைப் பார்க்கவேண்டும் என்று உள்கோட்டை சென்று அந்த மண்ணில் காலார நடந்து திரும்பினேன் என்று பேசிய பேச்சு எம் மக்களை உணர்வுமயமாக்கிவிட்டது. 

                        பாவலர் அறிவுமதி சிறப்புரை

                  தமிழண்ணல் வெளியிடும் நூலினை, 

              சுப்பராயன் அவர்கள் பெற்றுக்கொள்ளும் காட்சி.

  அண்ணன் அறிவுமதி அவர்கள் சிறைச்சாலை படத்திற்குப் பாடல், உரையாடல் எழுதிய காலம் அது ஆதலால் அவர்தம் உரையைக் கேட்க அனைவரும் ஆர்வமாக இருந்தோம். மிகச் சிறப்பானதோர் இன எழுச்சியுரையாற்றி எம் நெஞ்சில் அறிவொளி ஏற்றி வைத்தார். சற்றொப்ப இரவு ஒன்பது மணியளவில் நிகழ்வு நிறைவுக்கு வந்தது. என் ஆசிரியர் சிங்கார. சுந்தரேசன் அவர்கள் நன்றியுரையாற்றி மகிழ்ந்தார்.

 உள்கோட்டை அஞ்சலகத்துக்குத் தமிழ்ப் பெயர்ப்பலகைத் திறப்பு, குழந்தைக்குத் தமிழ்ப்பெயரிடல், தூய தமிழ்ப் பெயர்சூட்ட வேண்டும் என்பதை வலியுறுத்திக் கைப்பை வெளியீடு என இந்நிகழ்வை ஒட்டிப் பல நிகழ்வுகள் நடைபெற்றன. 

        க.ப.அறவாணன் பெயர்ப்பலகையினைத் திறந்துவைத்தல்

                மு.இ, சிங்கார.மாணிக்கம், திருநாவலர் காந்தி

மருத்துவர் என். மாசிலாமணி (ச.ம.உ), பொறியாளர் இரா. கோமகன், தியாக. மோகன், பி. தியாகராசன், காசி. அன்பழகன், க. முல்லைநாதன்,  ஆசிரியர் வேங்கைப்புலியன், தமிழாசிரியர் இராசகோபால் உள்ளிட்ட உறவினர்களும் நண்பர்களும் நிகழ்ச்சிக்கு வந்திருந்தோரைச் சிறப்பித்து, வழியனுப்பிவைத்தனர். என் ஆசிரியர்கள், நண்பர்கள், உறவினர்கள், மாணவர்கள் எனத் திரண்டு நடத்திய அந்த விழாவின் காணொலியை அண்மையில் பார்க்கும் வாய்ப்பு அமைந்தது. இருபத்தைந்து ஆண்டுகளுக்கு முன்பு நடைபெற்ற நிகழ்வில் கலந்துகொண்ட மூத்தோர் பலர் இன்று நம்முடன் இல்லை. நிகழ்வுகளும் வரலாறும் அவர்களின் இருப்பை நமக்கு நினைவூட்டிக்கொண்டே இருக்கும்.

                                பார்வையாளர்கள்


 

 

ஞாயிறு, 9 மே, 2021

பேராசிரியர் அருணபாரதி மறைவு!

பேராசிரியர் அருணபாரதி

 பனாரசு இந்துப் பல்கலைக்கழகத்தின் ஓய்வுபெற்ற பேராசிரியர் முனைவர் அருணபாரதி அவர்கள் 08.05.2021 இரவு 10.30 மணியளவில் இயற்கை எய்தினார் என்ற செய்தி அறிந்து ஆழ்ந்த துயருற்றேன். அன்னாரை இழந்து வருந்தும் குடும்பத்தினர், உறவினர்கள், நண்பர்களுக்கு என் ஆழ்ந்த இரங்கலைத் தெரிவித்துக்கொள்கின்றேன். கடந்த பதினைந்து ஆண்டுகளாகப் பேராசிரியர் அருணபாரதி அவர்களுடன் தொடர்புகொண்டிருந்தேன். அவர் பற்றி 2016 இல் என் வலைப்பதிவில் எழுதி, அறிஞர் உலகத்திற்கு அவர்தம் தமிழ்ப்பணியை நினைவூட்டியிருந்தேன். அந்தப் பதிவிலிருந்து…..

  நாகை மாவட்டம் குமாரக்குடி (பூம்புகார் - தரங்கம்பாடி சாலையில் உள்ள ஊர்) என்னும் ஊரில் திருவாளர்கள் நல்லசேவு, ஜெகதாம்பாள் ஆகியோரின் அன்புமகனாக ந. அருணபாரதி 15.06.1947 இல் பிறந்தவர். ஆக்கூர் உயர்நிலைப் பள்ளியில் பள்ளி இறுதிவகுப்பு வரை பயின்றவர். பின்னர் ஓராண்டு புகுமுக வகுப்பினை அண்ணாமலைப் பல்கலைக்கழகத்தில் பயின்றவர். இளங்கலைத் தமிழ்ப் பட்டத்தினையும் (1966-1969), முதுகலைத் தமிழ்ப் பட்டத்தினையும் (1969-1971) அண்ணாமலைப் பல்கலைக்கழகத்தில் பயின்று பெற்றவர். அண்ணாமலைப் பல்கலைக்கழகத்தில் புகழ்பெற்று விளங்கிய மொழியியல் துறையில் 1971 முதல் 73 வரை பயின்று மொழியியலில் முதுகலைப் பட்டம் பெற்றவர். கன்னடம், தெலுங்கு, சீனம் உள்ளிட்ட மொழிகளைப் பயின்று பட்டயச் சான்று பெற்றவர்.

  1974 ஆம் ஆண்டு பனாரசு இந்துப் பல்கலைக்கழகத்தில் தமிழ்த்துறையில் விரிவுரையாளராகப் பணியில் இணைந்தவர்.  11 ஆண்டுகள் விரிவுரையாளராகவும், எட்டாண்டுகள் இணைப் பேராசிரியராகவும், 19 ஆண்டுகள் பேராசிரியராகவும் பணியாற்றிய பெருமைக்குரியவர்.

 பனாராசு இந்துப் பல்கலைக்கழகத்தில் இவர் பணியாற்றியபொழுது ஐரோப்பியர்கள், சிங்களர்கள், மலேசியர்கள், சப்பானியர்கள், அமெரிக்கர்கள் என நூற்றுக்கும் மேற்பட்டவர்கள் இவரிடம் தமிழ் கற்றுள்ளனர்.

 தமிழை எவ்வாறு எளிமையாகப் பிற மொழியினருக்குக் கற்பிப்பது? என்ற துறையில் மிகச்சிறந்த புலமையுடைவராக நம் பேராசிரியர் அருணபாரதி விளங்குபவர். இதுவரை மூன்று நூல்களை இவர் வெளியிட்டுள்ளார். பயன்பாட்டில் உள்ள 4000 மொழியியல் சொற்களுக்குத் தமிழ் விளக்கம் தரும் வகையில் இவர் உருவாக்கிய Glossary of linguistics English- Tamil, (Madras, Tamil Nulagam, 1976) என்னும் நூல் இவர்தம் உழைப்புக்குக் கட்டியம் கூறும் நூலாகும். மேலும் அடிப்படைத் தமிழ்க்கல்வி பயில்வதற்குரிய இரண்டு நூல்களையும் எழுதியுள்ளார். இதில் தமிழ்ப்படிப்புக்கு உதவும் வகையில் 29 பாடங்களைக் கொண்ட தமிழ் ரீடர் என்னும் நூல் பிறமொழி மாணவர்கள் தமிழைப் படிப்பதற்கும், புரிந்துகொள்வதற்கும் ஏற்ற வகையில் எழுதப்பட்ட நூலாகும்.

 மேலும் அறிய என் வலைப்பதிவுக்கு வருக!



திங்கள், 26 ஏப்ரல், 2021

தமிழ்ச்சொல்லாக்க அறிஞர் முனைவர் சி. இரா. இளங்கோவன் மறைவு!

முனைவர் சி.இரா.இளங்கோவன்


 தமிழ்ப்பற்றாளரும்,  திராவிட இயக்க உணர்வாளரும், தாவரவியல் அறிஞரும் தமிழ்ச்சொல்லாக்கத்தில் தம் ஆய்வுப்பணியை அமைத்துக்கொண்டவருமான முனைவர் சி.இரா. இளங்கோவன் அவர்கள் உடல்நலம் பாதிக்கப்பட்டு, நேற்று (25.04.2021) இரவு பதினொரு மணியளவில் சிதம்பரத்தில் உள்ள தம் இல்லத்தில் இயற்கை எய்தினார் என்ற செய்தியைத் துயரத்துடன் பகிர்ந்துகொள்கின்றேன். பத்தாண்டுகளாக நல்ல நட்புடன் பழகினோம். பண்ணுருட்டி அறிஞர் இரா. பஞ்சவர்ணம் ஐயா அவர்கள் வழியாக நம் சி. இரா. இளங்கோவனார் எனக்கு அறிமுகம் ஆனார்கள். நம் இல்லத்திற்கு வந்துசெல்லும் அளவுக்குத் தொடர்பு வாய்த்தது. சிதம்பரம் சென்றால் கண்டு உரையாடும் வாய்ப்பினைப் பெறுவோம். கணினி நிரல் உருவாக்கித், தமிழ்க் கலைச் சொற்களை உருவாக்கி வைத்துள்ள இவர்தம் ஆய்வு முயற்சி வெளியுலகுக்குப் பயன்பட வேண்டும் என்பது என் வேட்கை. தமிழி எழுத்துகளை மாணவர்களுக்குப் பயிற்றுவித்த பெருமைக்குரியவர். இத் தமிழ்த்தொண்டரின் மறைவு தமிழுக்கு அமைந்த பேரிழப்பாக அமைந்துவிட்டது.
 
 கடலூர் மாவட்டம் புவனகிரி அரசு ஆண்கள் மேல்நிலைப்பள்ளியில் தாவரவியல் ஆசிரியராகப் பணிபுரிந்தவர் முனைவர் சி.இரா. இளங்கோவன். 20.03.1961 இல் பிறந்த இவரின் பெற்றோர் இராஜாபிள்ளை, அரங்கநாயகி ஆவர்.  சிதம்பரம் அண்ணாமலை நகரில் பிறந்த இவரின் முன்னோர் வாழ்விடம் அரியலூர் மாவட்டம் தென்னூர் (வரதராசன் பேட்டை) ஆகும்.

 தந்தையார் அரசு பணியில் இருந்ததால் கள்ளக்குறிச்சி, சங்கராபுரம், உள்ளிட்ட ஊர்களில் கல்வி கற்க நேர்ந்தது. புகுமுக வகுப்பைப் பொறையாறு த.பு.மா.லுத்ரன் கல்லூரியில் பயின்றவர். இளம் அறிவியல், முதுநிலை அறிவியல், இளம் முனைவர்ப் பட்டம், முனைவர்ப் பட்டம் அண்ணாமலைப் பல்கலைக்கழகத்தில் பயின்றவர்.

 இளம் முனைவர்ப் பட்ட ஆய்வில் “சதுப்புநிலக் காட்டுத் தாவரங்களில் உள்ளமைப்பியல்” என்ற தலைப்பிலும், முனைவர்ப் பட்ட ஆய்வுக்குப் “பிச்சாவரம் காடுகளில் சுற்றுச்சூழல்” என்ற தலைப்பிலும் ஆய்வுசெய்து  பட்டம் பெற்றவர் (1992).

 1990 இல் அரசுப் பள்ளியில் பணியில் இணைந்த இவர் 1996 முதல் புவனகிரி அரசு மேல்நிலைப்பள்ளியில் தாவரவியல் ஆசிரியராகப் பணிபுரிந்து, பின்னர் தலைமையாசிரியராகவும் பணியாற்றியவர். இவர் தாம் பணியாற்றும் பள்ளியில் 200 மூலிகைகள் கொண்ட மூலிகைத்தோட்டம் ஒன்றை நிறுவிப் பாதுகாத்தார். இவர்தம் உறவினர் திரு. சண்முகசுந்தரம் (IFS) ஐயா அவர்கள் வனத்துறையில் அதிகாரியாக இருந்தவர். வனத்துறை அறிவுடன் தமிழ்ப்பற்றும் நிறைந்தவர். எனவே தமிழில் ஈடுபாடுகொண்டவராக சி.இரா. இளங்கோவனும் இருந்தார். தமிழில் முதுகலைப் பட்டமும் பெற்றவர்.

 தமிழில் முனைவர் பட்ட ஆய்வுக்குத் தமிழ்ச் சொல்லாக்கம் குறித்த தலைப்பினைத் தேர்ந்து தமிழ்ப் பல்கலைக்கழகத்தில் ஆய்விற்கு இணைந்தவர்.

 தமிழில் உள்ள சொற்களை ஆராய்ந்து தமிழ்ச்சொற்கள் எவ்வாறு உருவாக்கப்பட்டுள்ளன என்பதைப் பலவாண்டுகளாகச் சிந்தித்து வந்தவர். தமிழில் கூறப்பட்ட இலக்கணங்களைக் கொண்டு, கூறப்படாத இலக்கணங்களை நுண்ணிதின் அறிந்து சொல்லாக்க முயற்சியில் ஈடுபட்டவர். இதனால் கணினியில் நிரல் எழுதித் தமிழ்ச்சொற்கள் எவ்வாறு உருவாகியுள்ளன என்று பட்டியலிட்டு வைத்துள்ளார்.

 தமிழ்ச் சொற்களில் இந்த எழுத்தை அடுத்து இந்த எழுத்தைக் கொண்டுதான் சொற்கள் வரும் என்று கூறி, அதற்கு மீறி வந்தால் அவை தமிழ்ச்சொல் இல்லை, பிறமொழிச்சொல் என்று அறிவியல் அடிப்படையில் நிறுவ இவர் முயற்சி உதவும்.

 மொழி முதலாகும் எழுத்துகள், மொழிக்கு இறுதியாகும் எழுத்துகளைக் கொண்டும் எந்த எந்த எழுத்துகளை அடுத்து எந்த எழுத்துகள் வரும், எந்த எந்த எழுத்துகள் வராது என்றும் துல்லியமாகக் கணித்தவர்.

 பண்டைய இலக்கண நூல் வல்லார் வகுத்த இலக்கண உண்மைகளை மெய்ப்பிக்கும் வண்ணம் கணினி அடிப்படையில் இவர் ஆய்வு உள்ளது. அதுபோல் சங்க இலக்கியம் முதல் சமகால இலக்கியம் வரை உள்ள நூல்களில் இடம்பெற்றுள்ள சொற்களை அகரவரிசைப்படுத்தவும், சொல் பயன்பாடுகள் எத்தனை இடம்பெற்றுள்ளன என்று அறியவும் இவரின் தமிழாய்வுப்பணிகள் உதவும்.

கணினி நிரல் கொண்டு சற்றொப்ப பத்து இலட்சம் சொற்களை உருவாக்கி அடைவுப்படுத்தி வைத்துள்ளார். இவரின் நிரலில் மரபு இலக்கணத்திற்கு உட்பட்டுக் கணினி உருவாக்கி வைத்துள்ள புதிய சொற்களைக் கலைச்சொல் தேவைப்படுவோர் பயன்படுத்திக்கொள்ள வழி ஏற்பட்டுள்ளது.

 கலைச்சொல் உருவாக்கத்தில் இனி சிந்தித்து மண்டையை உடைத்துக்கொள்ள வேண்டிய தேவை இல்லை. கணினி உருவாக்கித் தந்துள்ள மரபுக்கு உட்பட்ட, பயன்பாட்டில் இல்லாத சொற்களை நாம் பயன்படுத்த தாவரவியல் அறிஞர் சி.இரா. இளங்கோவனின் பணி பயன்படும்.
 
 கல்வெட்டுத் துறையில் ஈடுபாடுகொண்ட சி.இரா. இளங்கோவன் அவர்கள் கி.பி. முதல் நூற்றாண்டில் வழக்கில் இருந்த தமிழி எழுத்துகளைக் கொண்டு நண்பர்களுக்கு மடல் எழுதுவது, நாட்குறிப்பேடு எழுதுவது என்பதை வழக்கமாகக் கொண்டிருந்தார். கராத்தே என்று அழைக்கப்படும் கைச்சண்டையில் கறுப்புப் பட்டை வாங்கியவர். இசைக்குக் குறிப்பு வரைவதுபோல் ஒருவரின் உடலசைவுக்குக் குறிப்பு வரையும் பேராற்றல் பெற்றவர். முனைவர் சி.இரா. இளங்கோவனின் புகழ் நின்று நிலவட்டும்!

(என் பழைய கட்டுரையின் சுருக்க வடிவம்)

ஞாயிறு, 11 ஏப்ரல், 2021

அரித்துவாரமங்கலப் பயணம்…

  

கோபாலசாமி இரகுநாத இராசாளியார்

 தஞ்சை மாவட்டத்தில் உள்ள அரித்துவாரமங்கலம் பல்வேறு பெருமைகளை உள்ளடக்கிய அழகிய சிற்றூர்.  உலகப் புகழ்பெற்ற தவில் கலைஞர் திருவாளர் ஏ.கே. பழனிவேல் அவர்களால் இவ்வூர்ப் பெயரை நாம் அறிந்திருப்போம். அண்மைக் காலமாகத் தொல்காப்பியப் பதிப்புகளைப் படிக்கும்பொழுதும், தொல்காப்பிய அறிஞர்களுடன் அளவளாவும்பொழுதும் இந்த ஊர்ப்பெயர் என் கண்ணிலும் கருத்திலும் ஊடாடிக்கொண்டே இருந்தது. அரித்துவாரமங்கலத்தில் வாழ்ந்த கோபாலசாமி இரகுநாத இராசாளியார் (1870-1920) அவர்கள் மும்மொழிப் புலமை பெற்றதுடன் தமிழ்ப்புலவர்களை ஆதரித்த பெரும் வள்ளலாகவும் விளங்கியமையை ஆய்வுநூல்களைக் கற்கும்பொழுது அறிந்தேன். மேலதிக விவரங்களை ஆய்வறிஞர் கு. சிவமணி ஐயா, முனைவர் இரா. கலியபெருமாள் ஐயா (தஞ்சாவூர் நாட்டார் கல்லூரியின் பேராசிரியர்) உள்ளிட்ட பெருமக்களுடன் வினவிப் பெறுவது என் வழக்கம்.

 ஆறு திங்களுக்கு முன்பு என் பிறந்த ஊரான கங்கைகொண்டசோழபுரம் அடுத்திருக்கும் இடைக்கட்டு சென்றிருந்த சூழலில், அரித்துவாரமங்கலம் நினைவு மேலிட, பிற்பகலில் அரித்துவாரமங்கலத்திற்குப் பயணமானேன். கும்பகோணத்திலிருந்தும், தஞ்சையிலிருந்தும் இந்த ஊருக்குப் பேருந்து வசதிகள் உண்டு. எனினும் கும்பகோணம் – பாபநாசம் வழியாகச் சுற்றிக்கொண்டு எம் மகிழுந்தில், பசுமை வயல்களின் வனப்பினைச் சுவைத்தவாறு சிற்றூர் பல கடந்து அரித்துவாரமங்கலத்தை அடைந்தோம். இது சுற்றவழி என்பது பின்னரே தெரிந்தது. சற்றொப்ப ஆயிரம் குடும்பங்கள் வாழும் இந்த ஊரில் சிவன்கோவில், பெருமாள்கோவில் என இரண்டு புகழ்பெற்ற கோவில்கள் உள்ளன. ஆற்று வளத்தால் செழுமையாக உள்ள இந்த ஊருக்கு நூறாண்டுகளுக்கு முன்னர் தமிழ்ப் புலவர்கள் பலர் வந்து சென்றுள்ளமையை எண்ணி எண்ணி மகிழ்ந்தேன்.

  அரித்துவாரமங்கலத்திற்கு இதுதான் முதல் பயணம் என்பதாலும் எனக்கு முன்பின் தெரிந்தவர் அந்த ஊரில் யாரும் இன்மையானும், ஊர் நடுவிடத்தில் உந்து வண்டியை நிறுத்தி, இங்கு இராசாளியார் வீடு எது? என்று வினவினேன். நாங்கள் எல்லோரும் இராசாளியார் வழிவந்தவர்கள்தான் என்று இளைஞர்கள் சிலர் முன்வந்து விவரம் சொல்ல, ஆயத்தம் ஆனார்கள். இராசாளியார் சிலை எங்கு உள்ளது? என்று வினவியதும் சிலை உள்ள இடத்தையும், சிலை குறித்து விவரம் சொல்வோர் குறிப்பையும் சொல்லி, அந்த இளைஞர்கள் எங்களை ஆற்றுப்படுத்தினர்.

  சாலையை ஒட்டி, இராசாளியாரின் மார்பளவு சிலை இருப்பதைக் கண்டு, அருகில் இருந்த வீட்டினரிடம்  இராசாளியார் குடும்பம் பற்றி வினவினேன். திரு. மகாதேவன் அவர்கள் இராசாளியார் குறித்த விவரங்களைச் சொன்னதுடன் தம்மிடம் இருந்த படங்களையும் நூலினையும் வழங்கி இராசாளியார் மரபினர் இன்று எந்த எந்த ஊர்களில் உள்ளனர் என்ற விவரத்தையும் ஆர்வமுடன் பகிர்ந்துகொண்டார். உறவினர்கள் சிலரையும் எனக்கு அறிமுகம் செய்துவைத்தார். இராசாளியார் வாழ்ந்த வீட்டையும், அவர் நடந்த சாலையையும் ஆர்வமுடன் பார்த்தேன். மிகப்பெரும் கோட்டை போலும் வீடமைத்து, அதில் அரச வாழ்க்கை வாழ்ந்த இராசாளியார் பற்றியும் அவர் செய்த தமிழ்த்தொண்டுகளையும் கேட்டு வியப்புற்றேன். தமிழ்ப்புலவர்களைத் தம் ஊருக்கு அழைத்து ஆதரித்த அவர்தம் கொடைநலம் நினைந்து போற்றினேன்.

  அரசஞ் சண்முகனார், பின்னத்தூர் நாராயணசாமி ஐயர், உ.வே.சாமிநாதையர், விஞ்சைராயர், சர்க்கரை இராமசாமி புலவர், அருணாசலக் கவிராயர்,  கோபாலகிருஷ்ணன், சேதுராம பாரதியார், தூத்துக்குடி முத்தையா பிள்ளை, சாமிநாத பிள்ளை, வேங்கடேசப் பிள்ளை, முத்துசாமி ஐயர், நாவலர் ந. மு. வேங்கடசாமி நாட்டார், கந்தசாமிப் பிள்ளை, பரிதிமாற் கலைஞர், இராகவ ஐயங்கார் உள்ளிட்டோர் நம் இராசாளியரால் சிறப்பிக்கப்பட்ட புலவர்களுள் தலையாயவர்கள். இப்புலவர் பெருமக்கள் எழுதிய நூல்களில் நன்றிப்பெருக்குடன் இராசாளியாரின் உதவிகளைப் பதிவு செய்துள்ளனர்.

  இராசாளியார் வீட்டில் அரிய ஆராய்ச்சி நூலகம் அக் காலத்தில் இருந்துள்ளது. புலவர் பெருமக்களின் ஆராய்ச்சிக்கும் பதிப்புப் பணிக்கும் இந்த நூலகம் பெரிதும் பயன்பட்டுள்ளது. அரசஞ் சண்முகனாரின் அரிய உயிரைக் காப்பாற்றியவர் நம் இராசாளியார். அரசஞ் சண்முகனார்  நோயுற்றிருந்தபொழுது, தம் ஊருக்கு அழைத்து வந்து, மருத்துவம் பார்த்து, அவருக்கு உரூ. 300 அன்பளிப்பாக அளித்தமையைத் தாம் எழுதியத் தொல்காப்பியப் பாயிர விருத்தி நூலின் முகப்பில் சண்முகனார் எழுதியுள்ளார். வா. கோபாலசாமி ரகுநாத ராஜாளியாரவர்களால் தஞ்சை ஸ்ரீ வித்தியா விநோதினி முத்திராசாலையில் பதிப்பிக்கப்பட்டது என்று நூல் முகப்பில் பதிவாகியுள்ளது(1905). மேலும், ’பாயிர விருத்தி முதலாய நூலை அச்சிடுவதற்குத் தஞ்சை சென்றபொழுது, சுரம் கண்டு, உணவு உண்ண முடியாத நிலையில், கோபாலசாமி ரகுநாத ராசாளியார் தம் ஊருக்கு அழைத்துச் சென்று பல நன் மருத்துவரைக் கொண்டு மருந்தளித்தும் வேதமுணர்ந்த அந்தணரைக்கொண்டு கிரகசாந்தி முதலாயின செய்தும் பிணிதீர்த்து வெண்பொற்காசு முந்நூற்றின்மேலாக என் நிமித்தஞ் செலவு செய்ததூஉமன்றி, பாயிரவிருத்தி நூலினைப் பதிப்பிக்கும் பணியில் இராசாளியார் முன்னின்று உழைத்ததையும்’ அரசஞ் சண்முகனார் பதிவு செய்துள்ளார்.

 சமயப்பணி, சமூகப்பணி, தமிழ்ப்பணி, தேசப்பணி எனத் தம் வாழ்க்கையை அமைத்துக்கொண்ட இராசாளியார் அந்நாளில் கோடைக்காலத்தில் ஊட்டியில் தங்கியிருப்பது வழக்கம். அப்பொழுது குன்னூரில் நூலகம் தொடங்க 10,000 உரூபாய் நன்கொடை வழங்கியதுடன் (இன்றைய மதிப்பு 60 இலட்சம்) நூலகத்தில் 10. 09. 1911 ஆம் ஆண்டில் தொல்காப்பியருக்கு முதன்முதல் சிலை நிறுவியுள்ளமை இவரின் தொல்காப்பிய ஈடுபாடு அறிய உதவும் சான்றாகும். கரந்தைத் தமிழ்ச் சங்கத்தின் சார்பில் அரங்க. வேங்கடாசலம் பிள்ளை அவர்கள் தொல்காப்பியம் சொல்லதிகாரம் தெய்வச்சிலையார் உரையினை 1929 இல் பதிப்பித்தபொழுது, பதிப்புச் செம்மைக்கு இராசாளியார் இல்லத்தில் இருந்த தொல்காப்பிய ஓலைச்சுவடி பேருதவியாக இருந்தமையைக் குறிப்பிட்டுள்ளார். தொல்காப்பிய ஆய்வாளர்களை இராசாளியார் தொடர்ந்து போற்றியதால் தொல்காப்பியம்: இராசாளியார் வீட்டுச் சொத்து  என்று புலவர் பெருமக்கள் குறிப்பிடுவது உண்டு. மதுரைத் தமிழ்ச் சங்கம், கரந்தைத் தமிழ்ச் சங்கம் உள்ளிட்ட அமைப்புகளின் வளர்ச்சிக்கு இராசாளியாரின் பங்களிப்பு மிகுதி.

   பழுத்த வைணவ ஈடுபாட்டாளரான இராசாளியார் அரித்துவாரமங்கலம் பெருமாள் கோவிலுக்குக் கோபுரம் எடுத்தமையைக் கோபுரக் கல்வெட்டு இன்றும் நினைவூட்டுகின்றது. சிவன்கோவிலுக்கும் கொடைநல்கிய பெருமைக்குரியவர்.

  மறைமலையடிகளாரை அரித்துவாரமங்கலத்தில் சிறப்புரையாற்றச் செய்த பெருமையும் இராசாளியார்க்கு உண்டு. செல்வத்துப் பயனே ஈதல் என்ற தெளிந்த சிந்தனையுடன் வாழ்ந்த கோபாலசாமி இரகுநாத இராசாளியார் என்றும் தமிழ் இலக்கிய உலகில் நினைவுகூரப்படும் அறப்பணிச் செல்வராகப் போற்றப்படுவார்.

  அரித்துவாரமங்கலத்திலிருந்து இராசாளியாரின் நினைவுகளைச் சுமந்தவாறு ஆறுமாதத்திற்கு முன் ஊர் திரும்பியிருந்தாலும் மீண்டும் செல்லத் தகுந்த ஊராக அரித்துவாரமங்கலத்தை நினைக்கின்றேன்.

 

   இராசாளியார் சிலை முன்பு மு.இளங்கோவன், திரு. மகாதேவன்

 


  •  இன்றைய (11.04.2021) இந்து தமிழ் நாளிதழில் தொல்காப்பியம்: இராசாளியார் வீட்டுச் சொத்து என்ற என் கட்டுரை வெளிவந்துள்ளது. ஆர்வலர்கள் படித்து மகிழுங்கள். https://www.hindutamil.in/news/opinion/columns/657629-tholkappiyam.html 

செவ்வாய், 30 மார்ச், 2021

பேராசிரியர் வே. சங்கர் மறைவு!

     

                                                   பேராசிரியர் வே. சங்கர்

  புதுச்சேரியில் அமைந்துள்ள பாரதிதாசன் அரசு மகளிர் கல்லூரியில் தமிழ்ப் பேராசிரியராகப் பணியாற்றியவரும் எங்களின் குடும்ப நண்பருமான பேராசிரியர் வே. சங்கர் அவர்கள் இன்று (30.03.2021) இயற்கை எய்திய செய்தியறிந்து பெருங்கவலையுறுகின்றேன். அன்னாரை இழந்துவருந்தும் அவர்தம் குடும்பத்தினர், மாணவர்கள், நண்பர்கள் என அனைவருக்கும் என் ஆழ்ந்த இரங்கலைப் பணிவுடன் தெரிவித்துக்கொள்கின்றேன்.

பேராசிரியர் வே. சங்கர் அவர்கள் சற்றொப்ப முப்பதாண்டுகளாகத் தமிழ்ப் பேராசிரியராகப் புதுவை அரசு கல்லூரிகளில் பணியாற்றியவர். தமிழ், ஆங்கிலம், சமற்கிருதத்தில் பெரும்புலமையுடையவர். தொழில்நுட்ப அறிவு நிரம்பப்பெற்றவர். தமிழ் இலக்கணத்திலும் பக்தி இலக்கியத்திலும் பெரும்புலமை கொண்டவர். சோதிட அறிவில் இவருக்கு நிகர் இல்லை என்னும் அளவில் பெரும்புலமை பெற்றவர். அத்துறை சார்ந்து பல நூல்களை எழுதிப், பெரும்புகழ் பெற்றவர். ஆய்வுக் கட்டுரைகள் வரைவதிலும் ஆர்வம்கொண்டவர். நண்பர்களைப் போற்றுவதில் தலைசிறந்தவர். பழகுதற்கு இனிய பண்பாளரான வே.சங்கர் போலும் பேராசிரியர்கள் நம் வாழ்வில் ஓரிருவரே நட்பாகக் கிடைப்பார்கள். இவருடன் இணைந்து பணியாற்றிய இனிய பொழுதுகள் என் நினைவில் தோன்றித் துன்பத்தைப் பன்மடங்காக்குகின்றன. உடன் பணியாற்றும் ஆசிரியர்களிடத்தும், பழகும் நண்பர்களிடத்தும் அன்புடன் பழகியவர்.  விருந்தோம்பலில் தலைசிறந்தவர். பாடம் நடத்துவதிலும், நேரம் போற்றுவதிலும் முன்மாதிரியானவர். மாணவர்களின் உள்ளம்கவர்ந்த பேராசிரியர். இவரின் மறைவு தமிழ் இலக்கியப் பேருலகுக்குப் பெரும் இழப்பாகும்.

 தமிழ் இலக்கண இலக்கிய உலகிற்குப் பேராசிரியர் வே. சங்கர் வழங்கிய கொடைகளுள் சில:

1.   இயல் தமிழ் இலக்கணம்

2.   மொழித்திறனும் மொழிப் பயிற்சியும்

3.   தமிழ் இலக்கண அகராதி

4.   மொழித்திறன்

5.   உயிர்ப் பயணம்

6.   சித்தாந்த போதம்

7.   வாழும் நெறிகள்

8.   அருள் கவிச் சோலை

9.   இன்பப் பூங்கா

10. நல்வழிச் சாரல்

11. தமிழை நன்றாக எழுதுவோம்

12. ஆறடிக் கதம்பம்

13. அழகுமணி ஐந்நூறு

14. மதிச்சுடர் மாலை

15. ஆத்ம ஞானம்

16. ஜோதிஷ் ஞானம்

17. ஜோதிஷ் பலன்

18. வாஸ்து ஞானம்

19. தினக்கிரக சாரம்

   20. VOYAGE OF THE SOUL (2010) 

உள்ளிட்ட நூல்களின் ஆசிரியர். பேராசிரியர் வே.சங்கர் அவர்களின் புகழைப் போற்றுவோம்.