பேராசிரியர் நாகப்பா. நாச்சியப்பன்

 

நாகப்பா. நாச்சியப்பன்(28. 05. 1949 - 15. 07. 2003)

[பேராசிரியர் நாகப்பா. நாச்சியப்பன் புதுச்சேரி அரசின் கல்லூரிகளில் தமிழ்ப் பேராசிரியராகப் பணியாற்றியவர். புதுவைப் பல்கலைக்கழகத்தின் தமிழியற்புலத்திலும் பேராசிரியராகப் பணியாற்றியவர். திருப்பரங்குன்றம் கோயில் வேற்கோட்டம் என்னும் தலைப்பில் முனைவர் பட்ட ஆய்வினை நிகழ்த்தித் திருப்பரங்குன்றம் குறித்த செய்திகளை ஆய்வுலகுக்குத் தந்தவர். பன்னூலாசிரியாகவும் சொற்பொழிவாளராகவும் விளங்கியவர். இவரின் நெறிப்படுத்தலில் பலர் முனைவர் பட்டம் பெற்றுள்ளனர்.] 

பேராசிரியர் நாகப்பா. நாச்சியப்பன் அவர்கள் காரைக்குடியை அடுத்துள்ள கண்டனூர் என்னும் ஊரில் 28. 05. 1949 இல் பிறந்தவர். பெற்றோர் பெயர் இராம. நாகப்பச் செட்டியார், நா. மீனாட்சி என்பனவாகும். இவருடன் பிறந்தவர்கள் நா. இராமனாதன், நா. நாகப்பன், நா. கருப்பஞ் செட்டி, நா. சண்முகநாதன், வீர. அலமேலு ஆவர். 

கண்டனூர் சிட்டாள் ஆச்சிப்பள்ளியில் பள்ளிப்படிப்பை முடித்த நாகப்பா. நாச்சியப்பன் காரைக்குடி அழகப்பா கல்லூரியில்  கல்லூரிப் படிப்பைப் பயின்றவர். இளம் அறிவியல் பாடத்தையும் (விலங்கியல்), முதுகலைத் தமிழ்ப் பாடத்தையும் பயின்றவர். பேராசிரியர் தமிழண்ணல் அவர்களின் மேற்பார்வையில் மதுரை காமராசர் பல்கலைக்கழகத்தில் முனைவர் பட்ட ஆய்வை நான்கு ஆண்டுகள் நிகழ்த்தியவர். முனைவர் பட்ட ஆய்வினை நிகழ்த்தியபொழுது பெரும் பேராசிரியர்களான ச. தண்டபாணி தேசிகர், க. வெள்ளைவாரணனார், குடவாயில் பாலசுப்பிரமணியனார் உள்ளிட்டவர்களின் அன்பினைப் பெற்றவராக விளங்கியவர். 

நாகப்பா. நாச்சியப்பன் அவர்கள் ச. தண்டபாணி தேசிகரைக் குருவாக ஏற்றுக்கொண்டு அவரிடம் சிவதீட்சை பெற்றுக்கொண்டவர். நாச்சியப்பனார் மனைவி திருவாட்டி தமயந்தி அவர்களும் இவ்வாறு தீட்சை பெற்றவர் ஆவார். 

நாச்சியப்பனார் அவர்கள் தொல்லியலில் பட்டயமும், காந்திய நெறியில் சான்றிதழும் பெற்றவர்.                      

நாகப்பா. நாச்சியப்பனார் நா. தமயந்தி அவர்களை 1976 ஆம் ஆண்டில்  இல்லறத் துணைவியாக ஏற்றவர். இவர்களுக்கு நாச்சு நாகப்பன் என்ற அண்ணாமலை, நாச்சு சுப்பிரமணியன் என்ற இரெத்தினசபாபதி, நா. விசாலாட்சி ஆகியோர் மக்கள் செல்வங்களாக வாய்த்தனர். 

பேராசிரியர் நாகப்பா. நாச்சியப்பன் அவர்கள் குழந்தை இலக்கியப் படைப்பிற்காகத் தங்கப்பதக்கம், வெள்ளிப் பதக்கங்களைப் பெற்ற பெருமைக்குரியவர். தம் குடும்ப உறுப்பினர்களின் பெயர்களைத் தம் படைப்புகளில் பயன்படுத்தியவர். 

நாகப்பா. நாச்சியப்பன் அவர்கள் புதுவை அரசு கல்லூரியில் உரையாளராகத் தம் கல்விப்பணியை 1973 இல் தொடங்கியவர். பின்னர் புதுவை அரசுக்கு உரிமையான காரைக்கால்  அறிஞர் அண்ணா கல்லூரி, ஔவையார் கல்லூரி, புதுச்சேரியில் அமைந்துள்ள தாகூர் கலைக்கல்லூரி, பாரதிதாசன் அரசு மகளிர் கல்லூரி, காஞ்சி மாமுனிவர் அரசு பட்டமேற்படிப்பு மையம் ஆகியவற்றில் துணைப்பேராசிரியராகவும், இணைப் பேராசிரியராகவும், துறைத்தலைவராகவும் சிறப்புடன் பணியாற்றியவர். புதுவைப் பல்கலைக்கழகத்தின் தமிழியற்புலத்தில் சிலவாண்டுகள் தமிழ்ப் பேராசிரியராகப் பணிபுரிந்த இவர் 15.07.2003 இல் இயற்கை எய்தியவர். 

நாகப்பா. நாச்சியப்பன் அவர்கள் தமிழுக்குப் பல நூல்களை இயற்றி அணிகளாக வழங்கியுள்ளார். அவை படைப்பு நூல்கள், ஆய்வு நூல்கள் என்னும் தரத்தினவாகும். மனித விலங்குகளின் கதைகள் (சிறுகதைத் தொகுப்பு),  வீரப்பதக்கம் (சிறார் நாடகம்), வடலூர் வள்ளலார், திருக்கோயில் ஆய்வு (Temple Research Methodology), திருப்பரங்குன்றம் கோயில் வேற்கோட்டம், தமிழ்நாட்டில் பைரவர் வழிபாடு, கோட்டைமுனி ஐயா, சித்தூரில் ஒரு சித்தர் முதலியன இவர்தம் தமிழ்க் கொடைகளாகும். கோகுலம் இதழில் இவர்தம் சிறுகதை வெளியாகியுள்ளது. 

நாகப்பா. நாச்சியப்பனின் திருப்பரங்குன்றம் கோயில் வேற்கோட்டம் என்னும் தலைப்பில் அமைந்த முனைவர் பட்ட ஆய்வேடு குறிப்பிடத்தகுந்த ஆய்வேடாகும். இந்த ஆய்வேடு 1989 இல் நூல் வடிவம் பெற்றுள்ளது. இந்த நூல் முன்னுரை திருக்கோயில் அமைப்பு, இலக்கியங்களில் திருப்பரங்குன்றம், வரலாற்றில் திருப்பரங்குன்றம், கோயில் ஆட்சிமுறை, நாள் வழிபாடும் திருவிழாக்களும், கோயிலும் குடிகளும், குன்றைச் சூழ்ந்துள்ள கோயில்கள், நாட்டுப்புற வழிபாடு என்னும் தலைப்புகளில் விரிவான செய்திகளைக் கொண்டுள்ளது. பிற்சேர்க்கையாக இலக்கியங்களில் பரங்குன்றம், பரங்குன்று பற்றிய இலக்கியங்களின் பட்டியல், நாட்டுப்புறப் பாடல்கள், கல்வெட்டுக் குறிப்புகள், கோயிலுக்குரிய சொத்துக்கள், திருப்பரங்குன்றம் ஊரில் உள்ள மடம், மண்டபங்கள், கோயில் நிருவாக அதிகாரிகள் வரிசை, கோயில் அறங்காவலர்கள் ஆட்சியாளர்கள் வரிசை, துணைநூற்பட்டியல், வரைபடங்கள், நிழற்படங்கள் என்ற வரிசையில் நூலின் செய்திகள் இடம்பெற்றுள்ளன. 

பேராசிரியர் நாகப்பா. நாச்சியப்பன் அவர்கள் தம் ஆய்வுக்காலத்தில் திருப்பரங்குன்றத்துக் கோவில் சார்ந்த செய்திகளைக் கொண்ட செப்புப் பட்டயம் தேவதானப்பட்டியில் இருப்பதை அறிந்து அதனைக் கண்டறிந்து, அப்பட்டயத்தின் செய்திகளை ஆய்வேட்டில் அமைத்தவர். அதுபோல் திருப்பரங்குன்றம் கோவிலில் மூத்த தேவியின் சிற்பம் இருப்பதை ஆய்வுலகுக்கு வெளிப்படுத்தியவர். 

நாகப்பா நாச்சியப்பன் பல மாணவர்களுக்கு முனைவரபட்ட ஆய்வுநெறியாளராக இருந்தவர். அதுபோல் இளம் முனைவர் பட்ட ஆய்வு மாணவர்கள் 18 பேருக்கு நெறியாளராக இருந்து நெறிப்படுத்தியுள்ளார். 

 நாச்சியப்பனாரின் பாடம் நடத்தும் முறையும், பக்தி ஈடுபாடும், ஆய்வார்வமும், சொற்பொழிவாற்றும் திறமும் இன்றும் மாணவர்களாலும் பொது மக்களாலும் நினைவுகூரப்படுகின்றன. நாகப்பா. நாச்சியப்பனின் ஆய்வுப்பணிகள் என்றும் தமிழாய்வு உலகில் போற்றப்படும். 

நன்றி: முனைவர் ஆ. அருணாசலம், பெரியார் அரசு கலைக்கல்லூரி, கடலூர்

 

பேராசிரியர் ம. ரா. பூபதியின் தமிழ் வாழ்வு

 

பேராசிரியர் ம. ரா. பூபதி (13/06/1932 -04/09/1986)

[பேராசிரியர் ம. ரா. பூபதி அவர்கள் தமிழ்ப் பேராசிரியராகப் பணியாற்றியவர். கோவை பூ. சா. கோ. கலைக்கல்லூரி, புதுச்சேரி தாகூர் கலைக்கல்லூரியில் பணியாற்றி, பலநூறு மாணவர்களின் அறிவுக்கண் திறந்தவர். குமார பூபதீயம் என்னும் வண்ணப்பா யாப்பிலக்கணம் உள்ளிட்ட அரிய நூல்களை எழுதியவர். மராப்பூ, விருந்து முதலிய இதழ்களின் ஆசிரியர். இவரின் பிறந்த ஊர் விழுப்புரம் மாவட்டத்து மேல்மலையனூர் ஆகும்.]

பேராசிரியர் ம. ரா. பூபதி அவர்கள் விழுப்புரம் மாவட்டம் மேல் மலையனூரில் 13. 06. 1932 இல் பிறந்தவர். இவர்தம் பெற்றோர் பெயர் ம. இராஜகோபால் - சம்பூர்ணம் என்பனவாகும். ம. ரா. பூபதி தம் இளமைக் கல்வியைச் செஞ்சிக்கோட்டையில் முடித்த பிறகு, சென்னைப் பச்சையப்பன் கல்லூரியில் சேர்ந்து, இடைநிலைக் கல்வி, இளங்கலைக் கல்வியை முடித்தவர் (1948 முதல் 1953 வரை). சென்னைப் பச்சையப்பன் கல்லூரியில் பயின்றபொழுது இவருக்கு வாய்த்த பேராசிரியர்கள், இவருடன் பயின்ற மாணவர்கள் யாவரும் மிகப்பெரும் தமிழறிஞர்களாக அறியப்பட்டவர்கள் ஆவர். 

சென்னையில் கல்லூரிப் படிப்பை நிறைவுசெய்த பிறகு கோயம்புத்தூர், பூ. சா. கோ. கலைக்  கல்லூரியில் தமிழ் விரிவுரையாளராகப் பணியாற்றியவர் (1954 - 1963). 10. 01. 1964 முதல் புதுச்சேரியில் அமைந்துள்ள தாகூர் கலைக் கல்லூரியில் தமிழ்ப் பேராசிரியராகப் பணியில் இணைந்து, அதன் தமிழ்த்துறைத் தலைவராகப் பணியாற்றிய பெருமைக்குரியவர். சற்றொப்ப இருபத்திரண்டு ஆண்டுகள் புதுச்சேரியில் தமிழ்ப்பணியாற்றி 04. 09. 1986 இல் இயற்கை எய்தியவர். இவரிடம் புதுவைத் தாகூர் கல்லூரியில் பயின்ற எண்ணற்ற மாணவர்கள் உயர்கல்வி பயின்று, ஆசிரியர்களாகவும் நூலாசிரியர்களாகவும் மலர்ந்துள்ளனர். தம்முடன் பணிபுரிந்தவர்களின் அன்பைப் பெற்ற பேராசிரியர் பூபதி அவர்கள் இன்றும் அனைவராலும் நினைவுகூரப்படுகின்றார். 

பேராசிரியர் ம. ரா. பூபதி அவர்கள் தமிழ் ஆங்கிலம் என இருமொழிகளிலும் வல்லவராக விளங்கியவர். தமிழ் இலக்கணத்தில் மிகச் சிறந்த புலமைபெற்றவர். சங்கப்புலவருக்கு நிகரான புலமையும்,  இலக்கண நூல் படைக்கும் ஆற்றலும் பெற்றவர். பன்னூலாசிரியராக விளங்கிய ம. ரா. பூபதி அவர்கள் பல பொருள்களில் ஆய்வுக்கட்டுரைகள் வரைந்துள்ளார். இவர்தம் கட்டுரைகள் தொகுக்கப்பட்டால் மிகச் சிறந்த ஆய்வுப்பனுவல்களாகத் தமிழ் ஆய்வுலகிற்குக் கிடைக்கும். மராப்பூ, விருந்து என்னும் பெயரில் இலக்கியத் திங்கள் இதழையும் நடத்தியவர். இவர்தம் முனைவர் பட்ட ஆய்வுத்தலைப்பு “யாப்பிலக்கண வளர்ச்சி” என்பதாகும். தம் ஆய்வேடு உருப்பெறுவதற்கு முன்னரே பேராசிரியர் ம. ரா. பூபதி இயற்கை எய்தியமை தமிழாய்வுலகுக்கு மிகப்பெரிய இழப்பாகும். 

ம. ரா. பூபதி அவர்கள் தம் பணிக்காலத்தில் புதுச்சேரியில் பல்வேறு இலக்கிய அமைப்புகளை உருவாக்கி, அதன் வழியாகப் பல கருத்தரங்குகளை நடத்தியவர். அவ்வமைப்புகளுள் நாட்டுப்புற இயல் கழகம், காக்கைப்பாடினியார் யாப்பியல் கழகம், சமய இலக்கிய மறுமலர்ச்சிக் கழகம்,  கால்டுவெல் தமிழ்மொழிக் கழகம் முதலியன குறிப்பிடத்தகுந்தன.  பல்வேறு ஆய்வரங்குகளில் கலந்துகொண்டு உரையாற்றிய பெருமையும் இவருக்கு உண்டு. 

ம. ரா. பூபதியின் நூல்கள் 

1.       தமிழ் எழுத்துகளின் வரிசைமுறை வைப்பு

“தமிழ் எழுத்துகளின் வரிசைமுறை வைப்பு” என்னும் நூலினைப் பேராசிரியர் ம. ரா. பூபதி 1975 இல் வெளியிட்டுள்ளார். புதுவை மாநிலக் கல்லூரித் தமிழ் ஆசிரியர் மன்றம் சார்பில் வெளிவந்த இந்த நூல் 22 பக்கங்களைக் கொண்டது. தமிழ் நெடுங்கணக்கின் நுட்பமான வரிசை முறையை ஆராயும் கருத்துகள் இந்த நூலில் உள்ளன. 

2.   கல்லூரித் தமிழ் இலக்கணம் 

சென்னைப் பல்கலைக்கழகத்தின் இணைவுபெற்ற கல்லூரிகளில் பட்ட வகுப்பில் பயின்ற மாணவர்களுக்குப் பயன்படும் வகையில் பேராசிரியர் ம. ரா. பூபதி “கல்லூரித் தமிழ் இலக்கணம்” என்னும் நூலை 1960 இல் வெளியிட்டுள்ளார். இந்த நூலில் எழுத்து, சொல், பொருள், யாப்பு, அணி என்னும் அமைப்பில் செய்திகள் இடம்பெற்றுள்ளன. மாணவர்களின் உள்ளம் உணரும் வகையில் இந்த நூலில் இலக்கணச் செய்திகளை ம.ரா.பூபதி எளிமையாக எழுதி விளக்கியுள்ளார். 

3.   குமார பூபதீயம் என்னும் வண்ணப்பா யாப்பிலக்கணம் 

ம. ரா. பூபதி அவர்கள் குமார பூபதீயம் என்னும் வண்ணப்பா யாப்பிலக்கணம் என்னும் நூலினை 1977 இல் வெளியிட்டுள்ளார். முப்பது பக்கம் கொண்ட இந்த நூல் புதுச்சேரி இராமன் அச்சகத்தில் அச்சிடப்பட்டுள்ளது (ஸ்ரீ ராமன் பிரிண்டர்ஸ்). 

ம.ரா.பூபதி அவர்கள் தம் நூல் முன்னுரையில் வண்ணப்பா குறித்த அரிய செய்திகளைப் பதிவுசெய்துள்ளார். ”ஆசு வலவர்க்கும் வண்ணம் புலியாம்” என்று ஔவை பாடினார்; நினைத்த பொருள் பற்றி நினைத்த கவி வடிவத்தில் உடனே பாட வல்ல புலவர்க்கு ஆசு கவி என்று பெயர். அவர்கட்குக் கூட வண்ணப்பா பாடுவது என்றால் புலியைக் கண்டு அஞ்சுவது போன்றது என்பது மேற்கூறிய அடியின் பொருள்…. 

பிற பாவின் ஓசைக்கெல்லாம் அசை என்பது அடிப்படை உறுப்பு. ஆனால் வண்ணப்பாவுக்குச் ‘சந்தம்’ என்பதே அடிப்படை உறுப்பு. எனவே வண்ணப்பாவைச் சந்தப்பா என்பதும் உண்டு…. 

அருணகிரிநாதரின் திருப்புகழ், திருவகுப்பு நூல்களைப் படிக்கும்போது சந்தப்பாவின் இனிமை உள்ளத்தை ஊடுருவிச் செல்வதை உணரலாம். இவ்வுணர்வே இந்த நூல் தோன்றக் காரணமாக அமைந்தது. இந்நூல் எழுத வழிகாட்டியாக இருந்த நூல் நீண்டகாலத்துக்கு முன் வண்ணச்சரபம் தண்டபாணி சுவாமிகள் எழுதிய ’வண்ணத்தியல்’ என்ற நூலும் அவர் எழுதி, வண்ணத்திரட்டு என்ற நூலில் வெளியாகி உள்ள வண்ணப்பா இலக்கணச் சூத்திரங்களும் ஆகும். எனினும் இவ்விரண்டும் கற்பார்க்குச் சில இடர்ப்பாடுகளை விளைவிப்பவை என்று கருதி, வண்ணப்பா இலக்கணத்தை எளிதாகப் பயில்வார்க்கு இடர்ப்பாடு ஏற்படாத வகையில் அமைத்து இந்நூல் எழுதப்பட்டுள்ளது. சூத்திரங்களாகிய நூற்பாக்கள் இக்கால மொழியில் அமைந்துள்ளதால் உரை தேவை இல்லை. இன்றியமையாத இடங்களில் எடுத்துக்காட்டுகள் தரப்பட்டுள்ளன.” என்று  முன்னுரையில் நூலின் நோக்கம், நுவல்பொருள் குறித்த கருத்துகளை ம. ரா. பூபதி பதிவுசெய்துள்ளார். 

குமார பூபதீயம் என்னும் வண்ணப்பா யாப்பிலக்கணம் நூலுக்கு நூலாசிரியர் தற்சிறப்புப் பாயிரம் புனைந்துள்ளார். அப்பாயிரமாவது: 

திருப்புகழ் அமிழ்து வழங்கிய தெய்வ

அருண கிரியின் இணையடி ஏத்தி

வண்ணச் சரபன் தண்ட பாணியின்

புண்ணியத் திருவருள் புந்தியில் கொண்டு

குமார பூபதீயம் என்னுமிவ்

வண்ணப்பாவின் யாப்பிலக் கணத்தைச்

செந்தமிழ்த் தாயடி சேர்த்துவன் மகிழ்ந்தே”

 குமார பூபதீயம் என்னும் வண்ணப்பா யாப்பிலக்கணம் நூல் அறுபத்து மூன்று சூத்திர யாப்பில் யாக்கப்பட்டுள்ளது. 

வண்ணப்பாவின் உறுப்புகளை விளக்கும் நூலாசிரியர், 

எழுத்தே சந்தம் சீரே வண்ணத்

தொடரே துள்ளம் தொங்கல் குழிப்பே

கலையே அடியே வண்ணம் வகுப்பெனப்

பதினொன்றும் வண்ண யாப்புறுப்பாகும்      

 எனவும்,  

எழுத்துகளை விளக்குமிடத்து,

மெய், உயிர், உயிர்மெய், குறிலே நெடிலே

வல்லினம் மெல்லினம் இடையினம் ஆய்தம்

ஒன்பதும் வண்ண உறுப்பெழுத்தாகும் 

எனவும் நூற்பா யாத்துள்ளமை இவர்தம் புலமைக்குச் சான்றாகும்.

    சந்தம் என்பது முதற் சந்தம், சார்புச் சந்தம், தத்த என்னும் சந்தம், தத்தா என்னும் சந்தம்,  தாத்தா எனும் சந்தம், தந்த என்னும் சந்தம், தந்தா எனும் சந்தம், தாந்த என்னும் சந்தம், தாந்தா என்னும் சந்தம், தனா என்னும் சந்தம், தான என்னும் சந்தம், தானா என்னும் சந்தம், தன்ன என்னும் சந்தம், தய்ய என்னும் சந்தம், தய்யா என்னும் சந்தம், தய்ய என்னும் சந்தப் புறநடை, தன்ன என்னும் சந்தப் புறனடை, தொடர்ச்சி இயல்பு என்றும் வகைப்படுத்தி நூற்பா யாத்துள்ளமை ம. ரா. பூபதியின் வண்ணப்பா புலமைக்கு மிகச் சிறந்த சான்றுகளாக உள்ளன. 

சந்தச் சீர், வண்ணத்தொடர், துள்ளல், தொங்கல் துள்ளல், குழிப்பு, கலை, அடி, வண்ணப்பாட்டு (ஆண்கலை பெண்கலை) வகுப்பு முதலிய வண்ணப்பா உறுப்புகளை விளக்கிக் காட்டும் நூற்பாக்களும் விளக்கமும் எடுத்துக்காட்டுகளும் ம. ரா. பூபதி அவர்கள் மிகச் சிறந்த வண்ணப்பா இலக்கணவாசிரியர் என்பதை எடுத்துக்காட்டும். 

4.   சாரதா  பூபதீயம் என்னும் பேச்சொலியியல் 

சாரதா  பூபதீயம் என்னும் பேச்சொலியியல் (மொழியியல் நூல்) நூலினை 1982 இல் ம. ரா. பூபதி வெளியிட்டுள்ளார். 

ம. ரா. பூபதியின் மொழிபெயர்ப்புப் புலமை 

அறிஞர் தெ. பொ. மீ அவர்கள் ஆங்கிலத்தில் எழுதிய A History of Tamil Language என்னும் நூலினை ச. செயப்பிரகாசம் அவர்கள் தமிழில் மொழபெயர்த்து 1973 இல் இந்த நூல் வெளிவந்தது. இதன் மொழிபெயர்ப்பில் குறைபாடுகள் இருப்பதை உணர்ந்த ம. ரா. பூபதி அவர்கள் நூலில் இடம்பெறும் முதன்மையான தொடர்களுக்கு நூல் முழுமைக்கும் பொருத்தமான ஆங்கில மொழிபெயர்ப்பைச் செய்துள்ளதையும் அறியமுடிகின்றது. ஆயின் இது வெளிவந்த விவரம் அறிய இயலவில்லை. 

கலைச்சொல்லாக்கப் பணி 

ம. ரா. பூபதி அவர்கள் கோவை பூ. சா. கோ, கலைக்கல்லூரியில் தமிழ் விரிவுரையாளராகப் பணியாற்றியபொழுது பா. இராசாராம் அவர்களுடன் இணைந்து GLOSSARY OF TECHNICAL TERMS of BIOLOGY (MINOR) (கலைச் சொல் அகராதி உயிர் நூல் பொது அறிவு) உருவாக்கியுள்ளதையும் அறியமுடிகின்றது. உயிரியில் துறை சார்ந்த கலைச்சொற்களுக்கு உரிய தமிழ்ச் சொற்கள் இந்த நூலில் இடம்பெற்றுள்ளன. 

கலைக்கதிர் கட்டுரைகள் 

ம.ரா.பூபதி அவர்கள் பூ. சா. கோ. கல்லூரியில் பணியாற்றிய காலத்தில் அக்கல்லூரியிலிருந்து வெளிவந்த கலைக்கதிர் என்னும் இதழில் தொடர்ந்து பல கட்டுரைகள் எழுதியுள்ளார்.  1955 ஆம் ஆண்டு, பிப்ரவரி மாத இதழில் “விந்தை மணங்கள்” என்ற தலைப்பில் வரைந்துள்ள கட்டுரையில் திருமணம் குறித்த பல அரிய கருத்துகளை முன்வைத்துள்ளார். மு.வ முதலான அறிஞர்களின் கருத்துகளை மேற்கோள்காட்டித் தம் கருத்தை ம. ரா. பூபதி இக்கட்டுரையில் வலியுறுத்தியுள்ளார். 

ம. ரா. பூபதி அவர்கள் கலைக்கதிர் 1955 : 9 இதழில் உறைந்த உடல் உயிர்க்கும்? என்ற அறிவியல் கட்டுரையை வரைந்துள்ளார். அறிவியல் செய்திகளை நல்ல தமிழில் எழுத இயலும் என்பதை மெய்ப்பிக்கும் கட்டுரை இதுவாகும். 

1955 சூன் மாத கலைக்கதிர் இதழில் “மனிதன் மந்திரம் சடங்கு” என்ற தலைப்பில் அமையும் ஒரு கட்டுரையையும் ம. ரா. பூபதி வரைந்துள்ளார். 

பேராசிரியர் ம. ரா. பூபதி அவர்கள் எழுதிய ஆய்வுக்கட்டுரைகள் இந்தியப் பல்கலைக்கழகத் தமிழாசிரியர் மன்றத்தின் ஆய்வுக்கோவைகளிலும், கலைக்கதிர் இதழிலும், பல்வேறு ஆய்வுத்தொகை நூல்களிலும் வெளிவந்துள்ளன. அவற்றைத் திரட்டித் தொகுப்பதன் வழியாகப் பேராசிரியர் ம. ரா. பூபதியின் தமிழ் இலக்கியப் பங்களிப்பை அறிந்துகொள்ள இயலும். 

பேராசிரியர் ம. ரா. பூபதி அறக்கட்டளை

ம. ரா. பூபதி அவர்களிடம் புதுச்சேரி, தாகூர் கலைக்கல்லூரியில் பயின்ற மாணவர்கள் இணைந்து பேராசிரியர் ம. ரா. பூபதி அறக்கட்டளை என்னும் அமைப்பைத் தொடங்கினர். இவ்வறக்கட்டளையினர் புதுச்சேரி காஞ்சி மாமுனிவர் அரசு பட்டமேற்படிப்பு மற்றும் ஆராய்ச்சி நிறுவனத்தின் தமிழ்த்துறைக்குக் கடந்த ஆறு ஆண்டுகளுக்கு முன்னர் ஓர் இலக்கம் உருவா வழங்கினர். அத்தொகையை வங்கியில் நிரந்தர வைப்புத் தொகையாக வைத்து, அதிலிருந்து கிடைக்கும் வட்டித் தொகையைக் கொண்டு சிறப்புப் பொழிவுகள் செய்தல், முதல் மதிப்பெண் பெறும் மாணவர்களுக்குப் பரிசுத்தொகை நல்கல், எளிய மாணவர்களுக்குப் படிப்பதற்கு நிதியுதவி நல்கல் முதலிய அறப்பணிகளைச் செய்து வருகின்றனர்.  இவ்வறக்கட்டளையின் தலைவராக முனைவர் நெய்தல்நாடன் அவர்களும் அறக்கட்டளையின் உறுப்பினர்களாகச் சற்றொப்ப நாற்பதின்மரும் செயல்படுகின்றனர். 

நன்றி:

முனைவர் நெய்தல்நாடன், புதுச்சேரி

பேராசிரியர் சாயபு மரைக்காயர், காரைக்கால்

பேராசிரியர் சி. சுப்பிரமணியன்

 

பேராசிரியர் சி. சுப்பிரமணியன் 

[பேராசிரியர் சி. சுப்பிரமணியன் தெ. தி. இந்துக் கல்லூரியில் தமிழ்ப் பேராசிரியராகப் பணியாற்றியவர். நாகர்கோவிலை அடுத்துள்ள வடிவீசுவரம் ஊரினர். தமிழ்ப் பல்கலைக்கழகத்தின் வழியாக வெளிவந்த சங்க இலக்கியப் பொருட்களஞ்சியம், வாழ்வியல் களஞ்சியம் முதலிய நூல் உருவாக்கத்தில் பெருந்தொண்டாற்றியவர். தமிழ் இலக்கணத்திலும் மொழியியலிலும் ஆழ்ந்த புலமையுடையவர்.] 

புதுவையில் உள்ள கம்பன் கலையரங்கில் சற்றொப்ப முப்பதாண்டுகளுக்கு முன்னர் பேராசிரியர் ப. அருளி ஐயாவின் நூலொன்று வெளியீடு கண்டது. அவ்வெளியீட்டு விழாவில் மெலிந்த உருவிலான அறிஞர் ஒருவர் பேசத் தொடங்கினார். அவர்தம் பேச்சில் அரங்கம் அமைதி காத்தது. நாஞ்சில் நாட்டுப் பேச்சொலிப்பும், தொல்காப்பிய நூற்பாக்களை மேற்கோள் காட்டித் தம் கருத்தை முன்வைத்த பாங்கும் அனைவரையும் வியப்பில் ஆழ்த்தின. நூல் சிறப்பை மதிப்பிட்டு அந்த அறிஞர் விளக்கும்பொழுது, “பலவாண்டுகளாகத் தொல்காப்பியத்தைப் பயிற்றுவிக்கும் எமக்கு,  நூலாசிரியர் ப. அருளியார் தொல்காப்பிய நூற்பாக்களை எடுத்துக்காட்டி இந்த நூலில் விளக்கும் நுட்பங்கள் இதுவரை  புலப்படாமல் இருந்துள்ளன என்பது தெரிகின்றன” என்று தம் உரையில் வியப்புற்றார். சொல்லாய்வறிஞர் ப. அருளியாரின் அறிவாற்றலை வியந்த வியப்பும், அவர்தம் புலமையைப் போற்றிய பெருந்தன்மையும் இன்றும் எம் செவிகளில் - சிந்தைகளில் இனிதே ஒலித்துக்கொண்டுள்ளன. 

சொல்லாய்வறிஞர் ப. அருளியாரின் நூலினை வியந்து அவ்வாறு உரையாற்றியவர் அறிஞர் சி. சுப்பிரமணியன் ஐயா அவர்கள் ஆவார்கள். அவர்தம் பெருமையைப் பல ஆண்டுகளாக அறிஞர்கள் வாயிலாகக் கேட்டு மகிழ்ந்த நான் அவரைப் பற்றிய கூடுதல் விவரங்களை அறிந்துகொள்ளும் நோக்கில் நாகர்கோவிலில் அமைந்துள்ள அவர் இல்லத்துக்கு 2019 நவம்பர் மாதத்தில் ஒருநாள் சென்றுபார்த்தேன். 

அங்குச் சென்ற பிறகுதான் பேராசிரியர் சி. சுப்பிரமணியன் அவர்கள் இயற்கை எய்திய செய்தி தெரியவந்தது. அவர்களின் துணைவியார் உடல்நலம் பாதிக்கப்பட்டிருந்தமையை அருகில் வசித்த பேராசிரியர் ஒருவர் பகிர்ந்துகொண்டார். அவதம் வீடு காவல்துறை அலுவலகமாகக் குடிக்கூலிக்கு விடப்பட்டிருந்தமையையும் அறிந்து, மேலதிக விவரங்களைப் பெறமுடியாமல் ஏமாற்றத்துடன் ஊர் திரும்பினேன். இது நிற்க.

பேராசிரியர் சி. சுப்பிரமணியன் அவர்கள் நாகர்கோவில் தெ.தி. இந்துக் கல்லூரியில் பணியாற்றியவர் என்ற அடிப்படையில் பலரையும் தெடர்புகொண்டு பேராசிரியர் வாழ்க்கைக் குறிப்பை அறிய முனைந்தேன். போதிய விவரங்களை அறிந்தோர்களின் அறிமுகம் எமக்கு அமையவில்லை. ஆயின், முனைவர் சி. இலட்சுமணன் அவர்கள் தாம் வெளியிட்டுள்ள  ஆய்வுலகு போற்றும் அறிஞர்கள் என்ற நூலினை ஒளியச்சு எடுத்து, அனுப்பியிருந்தார்கள். அதில் இடம்பெற்றிருந்த முனைவர் என். கிருஷ்ணன் அவர்களின் கட்டுரையில் சி.சு. குறித்த பல விவரங்கள் கிடைத்தன. அறிஞர் பா. வளன் அரசு அவர்கள் வெளியிட்டுள்ள “தமிழகப் புலவர் குழு அணியும் பணியும்” என்ற நூலில் சில விவரங்கள் கிடைத்தன.  பேராசிரியர் குறித்த விவரங்களை அறிந்தோர் பகிர்ந்துகொண்டால் பேராசிரியரின் தமிழ்ப்பணி முழுமையாகத் தமிழுலகுக்குத் தெரியவரும். பேராசிரியரின் ஒளிபடத்துக்காகப் பலரை அனுகியும் கிடைக்கவில்லை. கிடைத்த பழைய படம் ஒன்றினைப் பொலிவுபடுத்தித் தமிழுலகின் பார்வைக்கு அறிஞர் சி.சுப்பிரமணியன் அவர்களின் வாழ்க்கைக் குறிப்பினை முன்வைக்கின்றேன். 

பேராசிரியர் சி. சுப்பிரமணியனின் தமிழ் வாழ்க்கை: 

பேராசிரியர் சி. சுப்பிரமணியன் அவர்கள் கன்னியாகுமரி மாவட்டம் நாகர்கோவிலுக்கு அருகில் உள்ள வடிவீசுவரம் என்னும் ஊரில் வாழ்ந்த சி. சிவதாணு பிள்ளை, கு. வள்ளியம்மாள் ஆகியோரின் மகனாக 31.08.1923 இல் பிறந்தவர். 

சி. சுப்பிரமணியன் தொடக்கக் கல்வியை ஆங்கில உயர்நிலைப் பள்ளியிலும் பின்னர் உயர்நிலைக் கல்வியைத் தமிழ் உயர்நிலைப் பள்ளியிலும் பயின்றவர். மதுரைத் தமிழ்ச்சங்கத்தின் பண்டிதர் பட்டம் பெற்றவர். சென்னைப் பல்கலைக்கழத்தின் வித்துவான் தேர்வெழுதியும் வெற்றிபெற்றவர். சென்னைப் பல்கலைக்கழகத்தின் வழியாக இடைநிலைக் கல்லூரியில் சேர்ந்து பயின்று தேர்ச்சி பெற்றவர். சென்னைப் பல்கலைக்கழகத்தின் வழியாக இளங்கலை, முதுகலை, முனைவர் பட்டங்களைப் பெற்றவர். 

நாகர்கோவில் தெ. தி. இந்துக் கல்லூரியில்  இருபத்தைந்து ஆண்டுகளுக்கும் மேலாகப் பணியாற்றியவர். அக்கல்லூரியின் தமிழ்த்துறையின் தலைவராகவும், கல்லூரியின் துணை முதல்வராகவும் பணியாற்றிய பெருமைக்குரியவர். மதுரை காமராசர் பல்கலைக்கழகம், தஞ்சாவூர் தமிழ்ப் பல்கலைக்கழகம், பாளையங்கோட்டை சேவியர் கல்லூரியின் நாட்டார் வழக்காற்றியல் ஆய்வு மையம், திருவனந்தபுரம் திராவிட மொழியியல் பள்ளி முதலிய கல்வி நிறுவனங்களில் ஆய்வறிஞராகப் பத்தாண்டுகளுக்கும் மேலாகப் பணியாற்றிய பெருமைக்குரியவர். 

தமிழ்ப் பல்கலைக்கழகம் வெளியிட்டுள்ள சங்க இலக்கியப் பொருட்களஞ்சியம், வாழ்வியல் களஞ்சியம் முதலிய களஞ்சியப் பணிகளில் முனைப்புடன் பணியாற்றியவர். செந்தமிழ்ச் செல்வி, தமிழ்ப்பொழில், செந்தமிழ் இதழ்களில் அரிய ஆராய்ச்சிக் கட்டுரைகள் வரைந்தவர். பல்வேறு மலர்களின் பதிப்பாசிரியராக இருந்து பணியாற்றியவர். தொல்காப்பியத்துக்கு உரை வரைதல், வகுப்பு நடத்துதல், விளக்கம் வழங்குதல் முதலிய பணிகளை ஆர்வமுடன் செய்தவர். 

பேராசிரியர் சி. சுப்பிரமணியன் அவர்களின் பேச்சொலியியல் நூலினைப்  பாளையங்கோட்டை, தூய சவேரியார் கல்லூரியின் நாட்டார் வழகற்றியல் ஆய்வு மையம் வெளியிட்டுள்ளது. 1998 ஆம் ஆண்டில் வெளியான இந்த நூல் நாட்டார் வழக்காற்றியல் துறை மாணவர்களுக்குப் பாட நூலாகவும் இருந்துள்ளது. பேராசிரியர் சி. சுப்பிரமணியன் அவர்கள் மிகச் சிறந்த மொழியியல் அறிஞர் என்பதை இந்நூல் மெய்ப்பிக்கின்றது.  பேச்சொலி என்னும் தலைப்பில் அமையும் இந்த நூல் 12 துணைத்தலைப்புகளால் அமைந்துள்ளது. அவை: 1. மொழி, 2. ஒலிப்பியல், 3. ஒலிப்பியல் அமைவு முறை, 4. அலை ஒலிப்பியல், 5. ஒலியனியல், 6. இயல்பு ஒலிப்பியல், 7. ஒலி, ஒலியன் அமைவு முறை, 8. இன்னிசை ஒலிப்பியல், 9. புணரொலிப்பியல், 10. வரலாற்றுமுறை ஒலிப்பியல், 11. ஒலியும் வரியும், 12. ஒலியியல் முடிவுகள் என்பனவாகும். 

பேராசிரியர் சி. சுப்பிரமணியன் அவர்களின் தமிழ் இலக்கணக் கலைக்களஞ்சியம் நூல் தொல்காப்பியம், இறையனார் அகப்பொருள் முதலிய நூல்களில் உள்ள இலக்கணக் கலைச்சொற்களை அடையாளம் கண்டு, கருத்தியல் பொருண்மைகளை எடுத்துக்காட்டும் அரிய நூலாகும். 1306 கலைச்சொற்களுக்கு விளக்கம் தரப்பட்டுள்ளது. அறிஞர் சு. இராசாராம் அவர்களின் துணையுடன் இந்த நூல் செம்பதிப்பினைக் கண்டுள்ளது. 

பேராசிரியர் சி. சுப்பிரமணியனின் தமிழ்க்கொடை: 

பேராசிரியர் சி. சுப்பிரமணியன் அவர்கள் தமிழிலும் ஆங்கிலத்திலும் பெரும் புலமைகொண்டவர்கள். தமிழ் இலக்கண இலக்கியங்களில் ஆழங்கால்பட்ட புலமையுடையவர். எழுத்தாற்றலும் பேச்சாற்றலும் வாய்க்கப்பெற்ற இவர் தமிழ் இலக்கணங்களை மொழியியல் கண்ணோட்டத்தில் ஆய்வுசெய்தவர். நூற்றுக்கும் மேற்பட்ட கட்டுரைகளையும் பத்துக்கும் மேற்பட்ட நூல்களையும் தம் ஆய்வுகளின் வழியாக வழங்கியவர்.

பேராசிரியர் சி. சுப்பிரமணியன் நூல்கள்:

1. வாய்மொழிக் கட்டுரைகள்
2. ஆய்வுக்கட்டுரைகள்
3. கோசிகன்
4. சிந்தனைகள் (செய்யுள்)
5. பேச்சொலியியல்
6. பேச்சுக் கூறுபாட்டியல்
7. தமிழ் இலக்கணக் கலைக்களஞ்சியம்
8. தொல்காப்பியம் – எழுத்து – உரை- மொழியியல் பார்வையுடன்
9. Tolkappiyam – Phonology  
10. Commonness in the metre of Dravidian Languages

நன்றி:

1. தமிழகப் புலவர் குழு அணியும் பணியும், பா.வளன் அரசு
2. ஆய்வுலகு போற்றும் தமிழறிஞர்கள், முனைவர்  சி. இலட்சுமணன்
3. முனைவர் என். கிருஷ்ணன்

மலேசிய இதழியல்: பதிப்பாளர் வே. கிருஷ்ணன்

 

பதிப்பாளர் வே. கிருஷ்ணன் 

[மலேசியாவில் திருமகள் அச்சகத்தை நடத்திய தமிழாசிரியர் சி. வேலுசுவாமியின் தலைமகனார் வே.கிருஷ்ணன் ஆவார். இவர் திருமகள், பக்தி இதழின் வெளியீட்டாளராக விளங்கியவர். சிங்கப்பூரிலிருந்து வெளிவரும் தமிழ் முரசு மலேசியாப் பதிப்பில் நான்கு ஆண்டுகள் பணிபுரிந்து, மொழிபெயர்ப்புச் செய்திகளை அவ்விதழுக்கு எழுதி வழங்கியவர் (1970-1974). விளையாட்டு, திரைப்படச் செய்திக் கட்டுரைகளையும் எழுதியவர். மலேசியப் பதிப்பு வரலாற்றில் இவர்தம் பணிகள் நினைவுகூரப்படும் தரத்தினவாகும்]. 

மலேசியாவுக்கு நான் செல்லும்பொழுது மகிழ்ச்சியுடன் சந்திக்க நினைக்கும் நண்பர்களுள் பதிப்பாளர் வே. கிருஷ்ணன் அவர்கள் முதன்மையானவர். இவர் புகழ்பெற்ற எழுத்தாளரும் தமிழறிஞருமான சி. வேலுசுவாமி அவர்களின் தலைமகனார் ஆவார். 

மலேசியாவில் வாழ்ந்த சி. வேலுசுவாமி அவர்களின் தமிழ்ப்பணியை அவரின் மறைவுக்குப் பிறகே என்னால் அறியமுடிந்தது. அன்பர் வேங்கடரமணி அவர்கள் வழியாக வேலுசுவாமி குறித்த விவரங்கள் எனக்குக் கிடைத்தன. சி. வே. அவர்கள் திருக்குறளுக்கு உரை வரைந்த பெருமைக்குரியவர். இவர்தம் உரை குறித்து ஒரு அறிமுகக் கட்டுரையைப் பல ஆண்டுகளுக்கு முன்னர் எழுதியமையும், இந்து தமிழ் நாளிதழில் வேலுசுவாமியாரின் இலக்கியப் பங்களிப்பினை அறிமுகம் செய்து ஒரு அறிமுகக் கட்டுரையை எழுதி வெளியிட்டமையும் நெஞ்சில் நிலைபெற்றுள்ளன. இப்பணிகளை அறிந்த வேலுசுவாமியாரின் மகனார் வே. கிருஷ்ணன் அவர்கள் நான் மலேசியாவுக்குச் செல்லும்பொழுதெல்லாம் என்னைக் கண்டு உரையாடுவதும் உயர்தர உணவகங்களுக்கு அழைத்துச் சென்று விருந்தோம்பி என்னை அனுப்பிவைப்பதும் வழக்கமாகும். சிலவாண்டுகளுக்கு முன்னர் வேலுசுவாமியாரின் நூல்கள் சிலவற்றை அஞ்சலில் அனுப்பிப் படித்துப் பார்க்குமாறு கூறியதை நன்றியுடன் இன்றும் போற்றுகின்றேன். வேலுசுவாமியார் தொடங்கி நடத்தி, வே. கிருஷ்ணன் அவர்களின் மேற்பார்வையில் நடந்த திருமகள் அச்சகத்தை ஒருமுறை சென்று பார்த்தமையும் நினைவுக்கு வருகின்றது. இவை யாவும் எனக்கும் கிருஷ்ணன் ஐயாவுக்கும் இடையில் அமைந்த அன்பினை வெளிப்படுத்தும் சில சான்றுகளாகும். 

சிலவாண்டுகளுக்கு முன்னர் மலேசியா செல்லும்பொழுது என் வருகையை அவருக்குத் தெரிவித்திருந்தேன். தாம் உடல்நலம் பாதிக்கப்பட்டுள்ளதாகவும், அதனால் வெளியில் அதிகம் செல்வதில்லை எனவும் எனவே இந்த முறை தங்களைச் சந்திக்க வாய்ப்புக் குறைவு என்பதுபோல் எனக்குத் தகவல் தெரிவித்திருந்தார். எனினும் என் வருகையை உறுதிப்படுத்திக்கொண்டு, தம் உடல்நலத்தையும் பொருட்படுத்தாமல் என்னைச் சந்திக்க வந்து, வழக்கம்போல் என்னை அழைத்துச் சென்று உணவருந்த வைத்த அப்பெருந்தகையின் அன்புக்கு இணை ஏது?.

மு.இளங்கோவன், வே.கிருஷ்ணன் 

தொல்காப்பியத் தொண்டர் நெல்லை இரா. சண்முகம் அவர்களின் வாழ்க்கைக் குறிப்புகளைத் தேடி ஒருமுறை மலேசியாவுக்குச் சென்றபொழுது வே. கிருஷ்ணன் அவர்களை மீண்டும் சந்திக்கும் வாய்ப்பு அமைந்தது. அப்பொழுது அவரின் பணிகளை அறியும் நோக்கில்  வாழ்க்கைக் குறிப்பினை எனக்கு விடுத்துவைக்குமாறு சொன்னேன். அப்பொழுது நடைபெற்ற உரையாடலில், தாம் சிங்கப்பூரிலிருந்து வெளிவரும் தமிழ் முரசு இதழில் மலேசியப் பதிப்பின் துணை ஆசிரியராகப் பணியாற்றிய (1970 முதல் 1974 வரை) தம் பட்டறிவைப் பகிர்ந்துகொண்டார். எனக்கு வியப்பு மேலிட்டது. தமிழ் முரசு அனுபவங்களை விரிவாகப் பகிர்ந்துகொள்ளுமாறு கேட்டுக்கொண்டேன். நேரக் குறைவின் காரணமாக விரிவாக எங்கள் உரையாடல் அப்பொழுதுத் தொடர இயலாமல் போனது. மலேசியப் பயணத்தை அன்றைய நாளில் முடித்தக் கையுடன் சிங்கப்பூருக்கு அப்பொழுது செல்ல நேர்ந்தது. 

சிங்கப்பூரில் தங்கியிருந்தபொழுது தமிழ்முரசு அலுவலகம் சென்று தொல்காப்பியத் தொண்டர் நெல்லை இரா. சண்முகம் (கோலாலம்பூர்) நூலினை ஆசிரியர் த. இராஜசேகர் அவர்களிடம் கையளிக்க நினைத்தேன். செம்மொழி இதழாசிரியர் அண்ணன் திரு. எம். இலியாஸ் அவர்களும் மக்கள் மனம் ஆசிரியர் கவிஞர் பிச்சினிக்காடு இளங்கோ அவர்களும் சந்திப்புக்கு வேண்டிய உதவிகளைச் செய்தனர். அவர்களும் தமிழ் முரசு அலுவலகத்திற்கு உடன் வந்து உதவியமை - உரையாடியமை என் வாழ்வின் இனிய பொழுதுகளாகும்.

 

எம். இலியாஸ் த. இராஜசேகர், மு.இளங்கோவன், பிச்சினிக்காடு இளங்கோ

இர்ஷாத் முஹம்மது, இராஜசேகர், மு.இளங்கோவன், பிச்சினிக்காடு இளங்கோ

 மு.இளங்கோவன், தமிழ் முரசு ஆசிரியர் த. இராஜசேகர்

மு.இளங்கோவன், தமிழ் முரசு ஆசிரியர் த. இராஜசேகர்

தமிழ் முரசு ஆசிரியர் த. இராஜசேகர் அவர்கள் எங்கள் வருகையை அறிந்து,  வாயிலில் வந்து வரவேற்று அன்புடன் அழைத்துச் சென்று உரையாடியமை என் வாழ்வில் தமிழ் தந்த பேறாக நினைக்கின்றேன். அந்நேரத்தில் தமிழ்முரசின் தமிழ்த்தொண்டு என்ற பெயரில் நூல் வெளியிட்டுள்ள நெல்லை இரா. சண்முகம் அவர்களைப் பற்றிக் குறிப்பிட்டேன். தமிழ் முரசு ஆசிரியர் த இராஜசேகர் அவர்கள் மிக மகிழ்ந்து, தமிழ் முரசு இதழ் நூற்றாண்டை நோக்கி நடையிடும் இதழ் எனவும், இதில் தொடக்கக் காலத்தில் பணிபுரிந்தவர்களின் விவரங்கள் ஒவ்வொன்றாக இப்பொழுது கிடைத்துவருகின்றது எனவும் மகிழ்ச்சியுடன் தெரிவித்தார். மேலும், தமிழ் முரசுவின் சிறப்பு வெளியீடுகளை எனக்குப் பரிசாக வழங்கி மகிழ்ந்தார்கள். அந்த நேரத்தில் நான் மலேசியாவில் தமிழ் முரசு இதழின் செய்தி ஆசிரியராக 1970 முதல் 1974 வரை  பணியாற்றிய வே. கிருஷ்ணன் அவர்களைச் சந்தித்தமை பற்றியும், தமிழ் முரசு இதழுக்கு அமைந்த அவரின் மொழிபெயர்ப்புப் பங்களிப்புகளையும் பகிர்ந்துகொண்டேன். இயன்றால் வே. கிருஷ்ணன் குறித்த விவரங்கள் கிடைத்தால் அனுப்பிவைக்கின்றேன் என்று கூறித் தமிழ் முரசு ஆசிரியரிடமிருந்து விடைபெற்று மீண்டேன். காலங்கள் உருண்டோடின. 

கடந்த ஆறு திங்களுக்கும் மேலாக வே. கிருஷ்ணன் அவர்களைக் குறித்த விவரங்களைக் கேட்டும் அவர்களின் உடல்நலத் தளர்ச்சியால் எனக்கு அனுப்பிவைக்க அவரால் இயலவில்லை. சில திங்களுக்கு முன்னர் மீண்டும் வே. கிருஷ்ணன் அவர்களை நேரில் கண்டு உரையாடும் வாய்ப்பு அமைந்தது. தம் தந்தையார் குறித்து ஐந்நூறு பக்க அளவில் சிறப்பு மலர் ஒன்று வெளியிட உள்ளதாகத் தெரிவித்து, அம்மலரைப் பார்வையிட்டு, வாழ்த்துரை வழங்குமாறு தெரிவித்தார்கள். தமிழகம் திரும்பிய பிறகு சிறப்பு மலரின் மென்படி மின்னஞ்சலில் வந்தது. படியெடுத்துப் படிக்கத் தொடங்கினேன். அன்பு மேலீட்டால் அவர்களின் கட்டளையை நிறைவேற்றும் வகையில் மலரைச் செப்பமிட்டு, வாழ்த்துரையுடன் அஞ்சலில் அவருக்கு அனுப்பிவைத்தேன். அது தொடர்பில் உரையாடிக்கொண்டிருக்கும்பொழுது, வே. கிருஷ்ணன் அவர்கள் மலேசிய இதழியல் வரலாற்றில் ஒரு முதன்மையான ஆளுமை என்பதை மீண்டும் அறிந்துகொண்டேன். பதிப்புத்துறையில் ஐம்பது ஆண்டுகளுக்கும் மேலான பட்டறிவு பெற்றவர் என்பதையும் தெரிந்துகொண்டேன். 

வே. கிருஷ்ணன் அவர்களின் தந்தையார் சி. வேலுசாமி குறித்த சிறப்பு மலர் வெளிவந்தால் மலேசியாவில் வெளிவந்த பல இதழ்களைப் பற்றியும் அவற்றைப் பொறுப்பேற்று நடத்திய இதழாசிரியர்கள், அச்சகங்கள் குறித்த விவரங்களைப் பற்றியும் அறிந்துகொள்ள முடியும். உண்மைகளைக் கண்டறிந்து உலகுக்கு வெளிப்படுத்தும் ஆய்வறிஞர்கள் குறைந்துவரும் தமிழகச் சூழலில் எனக்கு உரையாடக் கிடைத்த வே. கிருஷ்ணன் அவர்களிடம் பெற்ற செய்திகளை இங்குப் பதிந்துவைக்கின்றேன். 

வேலுசுவாமி கிருஷ்ணன் 

வே. கிருஷ்ணன் அவர்கள் 05. 12. 1947 இல் நெகிரி செம்பிலான் மாநிலத்தின் சிரம்பானில் வாழ்ந்த சி. வேலுசுவாமி, மு. இலெட்சுமி ஆகியோரின் தலைமகனாகப் பிறந்தவர். இவருடன் நாகேசுவரி, உமா மகேஸ்வரி, பாலச்சந்திரன், நந்தகுமார், செந்தமிழ்ச்செல்வி, முரளிதரன், ஜோதிமலர் ஆகியோர் உடன்பிறப்புகளாகப் பிறந்தனர். 

வே. கிருஷ்ணன் அவர்கள் இளம் அகவையில் ஆங்கிலப் பள்ளிகளில் பயின்று ஆங்கிலத்தில் பெரும்புலமை பெற்றவராக விளங்கியவர். இவருக்குத் தமிழ், ஆங்கிலம், மலாய் மொழி நன்கு தெரியும். தொடக்கக் கல்வியைக் கோலாலம்பூரில் உள்ள La Salle பள்ளியில் பயின்றவர். இடைநிலைக் கல்வியை  St John’s Institution – இல் பயின்றவர். 1963 இல் இளநிலைக் கல்வியியல் சான்றிதழ்ப் படிப்பினையும் (Lower Certificate of Education), 1965 இல் முதுநிலை கேம்பிரிட்ஜ் படிப்பினையும் (Senior Cambridge) முடித்தவர். 1967 இல் உயர்நிலைச் சான்றிதழ்ப் படிப்பைப் படித்து முடித்தவர் (Higher School Certificate). படிப்பு நிறைவுற்றதும் மாணவர்களுக்குத் தனிப்பயிற்சி ஆசிரியராகவும், தற்காலிக ஆசிரியராகவும் மூன்றாண்டுகள் பணியாற்றியவர். 

தமிழ் முரசு அலுவலகத்தில் ஏதேனும் பணிபுரியலாம் என்று சென்று வேலை கேட்டவருக்கு, அப்பொழுது தமிழ் முரசுவின் மலேசியாப் பதிப்பின் ஆசிரியராக இருந்த இரமாகிருஷ்ணன் அவர்கள் ஆங்கிலத்தில் இருந்த சில செய்திகளைத் தமிழில் பெயர்த்து வழங்குமாறு வே. கிருஷ்ணனிடம் கூறினார். இவரும் அதனை மறுக்காமல் செய்தார். அந்தச் செய்திகள் நாளிதிழில் இடம்பெறத் தொடங்கின. அப்பொழுது மொழிபெயர்ப்புப் பிரிவில் இருந்த திரு. கேசவன் அவர்கள் வே. கிருஷ்ணனின் மொழிபெயர்ப்பு ஆற்றலை அறிந்து, ஆலோசனைகள் வழங்கி, தமிழ் முரசு இதழில் மொழிபெயர்க்கும் பணியில் ஈடுபடுத்தினார். செய்திக் கட்டுரைகள் எழுதவும், முதன்மை விருந்தினர்களைச் சந்திக்கும் செய்தியாளர் சந்திப்புகளுக்குச் செல்லவுமாகத் தமிழ் முரசுவில் இவரின் பணி மிகச் சிறப்பாக இருந்தது. அவ்வகையில் இந்தியக் குடியரசுத் தலைவர் வி.வி. கிரி மலேசியாவுக்குச் சென்றபொழுது (1973 மார்ச்சு 4 முதல் 09.03.1973 வரை) அவரின் பயணம் குறித்த விரிவான செய்திகளை வெளியிடும் பொறுப்புக் கிருஷ்ணனுக்கு அமைந்தது. கோலாலம்பூரிலிருந்து பினாங்குவரை விமானத்தில் வி. வி. கிரியுடன் சென்ற செய்தியாளர் குழுவில் வே. கிருஷ்ணனும் இடம்பெற்றிருந்தார் என்பது இவரின் செய்தி சேகரிக்கும் திறனுக்குச் சான்றாகக் கொள்ளலாம்.

 

தமிழ் முரசு இதழில் வி.கிருஷ்ணன் செய்திக்கட்டுரை (09.03.1973)

   வே. கிருஷ்ணன் அவர்கள் மிகச் சிறந்த விளையாட்டு வீரர். கால்பந்து, இறகுப்பந்து விளையாடுவதில் பெரும் நாட்டம் கொண்டவர்.  எனவே இத்துறை சார்ந்த செய்திகளைத் தமிழ் முரசு இதழில் ஆர்வமாக எழுதி வெளிவரச் செய்தவர். 

அக்காலத்தில் இந்தியாவில் புகழ்பெற்ற திரைப்பட நடிகர்கள், கலைஞர்கள், அறிஞர்கள் மலேசியாவுக்குச் சென்றால் அவர்களை நேர்கண்டு எழுதும் பணியையும் வே. கிருஷ்ணன் செய்துள்ளார். அவ்வகையில் "நடிகவேள்" எம். ஆர். இராதா, ஹேமமாலினி, வீணை வித்துவான் பாலச்சந்தர், எஸ். பி. பாலசுப்பிரமணியன், ஏ. எம் இராஜா, ஜிக்கி, சந்திரபாபு, சோ இராமசாமி, டனால் தங்கவேல் சரோஜா, சி.ஐ.டி. சகுந்தலா, ஆர் எஸ். மனோகர் (இலங்கேஸ்வரன் நாடகம்) முதலான கலைஞர்களைக் கண்டு உரையாடி செய்தி வெளியிட்டதை வே. கிருஷ்ணன் மகிழ்ச்சியுடன் பகிர்ந்துகொள்கின்றார். 

மலேசியா, சிங்கப்பூரில் Shaw Brothers திரைப்படங்களைத் தயாரிக்கும் பணியிலும் திரையிடும் துறையிலும் முன்னணியில் இருந்தனர். இவர்களின் தலைமையகம் ஹாங்காகாக இருந்தது. பின்னர் 1930 அளவில் சிங்கப்பூரிலும் இவர்களின் தொழில் விரிவடைந்தது. இவர்கள் மலேசியாவின் புகழ்பெற்ற ஊர்களான கோலாலம்பூர், ஈப்போ, பினாங்கு, சோகூர்பாரு முதலான ஊர்களில் திரையரங்குகளைக் கட்டித் திரைப்படங்களை வெளியிடும் பணியில் ஈடுப்பட்டிருந்தனர். இவர்கள் பத்திரிகையாளர்களுக்குத் திரைப்படத்தின் முதல் காட்சியைத் திரையிட்டுக் காட்டுவர். அவ்வாறு காட்டப்படும் படங்களைப் பார்த்து, வே. கிருஷ்ணன் பல திரைப்படங்களுக்கு அறிமுகம் (விமர்சனம்) எழுதியுள்ளார். அவ்வகையில் கோலாலம்பூரில் இருந்த இந்துஸ்தான் தியேட்டர் புகழ்பெற்ற திரையரங்கமாகும். 

சிங்கப்பூரிலிருந்து Indian Movi News என்ற பெயரில் திரைப்படச் செய்திகளைத் தாங்கிய இதழ் வெளியானது. அதன் ஆசிரியர் சர்மா என்பவர் ஆவார். செய்தித்தாளின் பாதிப்பகுதித் தமிழிலும் மீதிப் பகுதி ஆங்கிலத்திலும் இருக்கும். இந்த நாளிதழைத் திரைப்பட ஆர்வலர்கள் விரும்பிப் படிப்பார்கள். இதுபோன்ற இதழ்கள் வே. கிருஷ்ணன் அவர்களுக்குத் திரைத்துறைச் செய்திகளை எழுதுவதற்கு முன்மாதிரி இதழ்களாகப் பயன்பட்டுள்ளன. தமிழகத்திலிருந்து வெளிவரும் பல்வேறு இதழ்களைப் படிக்கவும் உலகச் செய்திகளைத் தெரிந்துகொள்ளவும் வே. கிருஷ்ணன் அவர்களுக்குத் தமிழ்முரசு இதழ்ப்பணி பேருதவியாக இருந்துள்ளது. 

தமிழ் முரசு மலேசியப் பதிப்பு இதழில் இடம்பெற்ற திரைத்துறைச் செய்திகள், விளையாட்டுச் செய்திகள் முதலியவற்றை எழுதுவதும், இராய்டர் நிறுவனம் ஆங்கிலத்தில் அனுப்பும் பன்னாட்டுச் செய்திகளைத் தமிழில் மொழிபெயர்த்து வழங்குவதும் வே. கிருஷ்ணனின் பணியாக இருந்தது. அதுபோல் மலேசியாவில் வெளியான Star, State Echo, State Times முதலான ஆங்கில நாளேட்டுச் செய்திகளைப் படித்தும் தேவையான செய்திகளை மொழிபெயர்க்கும் பணியினையும் செய்தவர். வே .கிருஷ்ணன் தமிழ்முரசு மலேசியப் பதிப்பு இதழில் அக்காலத்தில் பணியாற்றிய இராமகிருஷ்ணன், மொகைதீன், இராஜா, மு. சு. மணியம், கேசவன் முதலான பத்திரிகையாளர்களை நன்றியுடன் நினைவுகூர்கின்றார். 

வே. கிருஷ்ணன் அவர்கள் 1969 இல் பார்வதி அவர்களைத் திருமணம் செய்துகொண்டார். இவர்களுக்கு ஒரு மகள் மக்கள் செல்வமாக வாய்த்தார். 

தமிழ் முரசு இதழிலிருந்து விலகியதும் வே. கிருஷ்ணன் அவர்கள் தம் தந்தையார் நடத்தி வந்த அச்சுக்கூடத்தின் பொறுப்பினை ஏற்றார். தந்தையார் விரும்பியவாறு திருமகள், பக்தி முதலான இதழ்களின் ஆசிரியராகவும் இருந்து இதழினைத் தரமுடன் நடத்தினார். கையால் அச்சுக் கோர்க்கும் முறையிலிருந்து அச்சுத்தொழில் கணினித் துறைக்கு மாறிய பொழுது, கணினி வசதியுடைய அச்சகமாகத் தம் அச்சகத்தை மாற்றினார். பாரதி, ஸ்ரீலிபி முதலான எழுத்துருக்களைப் பயன்படுத்தி, அழகிய வண்ண அச்சில் தாம் நடத்திய இதழ்களை வே. கிருஷ்ணன் தொடர்ந்து வெளிக்கொண்டு வந்தார். அதுபோல் மலேசியாவில் வெளியிடப்பட்ட கோவில் அழைப்பிதழ்கள், சிறப்பு மலர்கள், பள்ளிப் பாட நூல்களையும், பல்கலைக்கழகத்தின் கருத்தரங்கக் கட்டுரைகளையும் அச்சிட்டு, மலேசியாவில் பதிப்புத்துறையில் புகழ்பெற்ற பதிப்பாளராக வே.கிருஷ்ணன் விளங்கி வருபவர். இவர்தம் மேற்பார்வையில் மலேசியாவில் நூற்றுக்கணக்கான நூல்கள் திருமகள் அச்சகத்தின் உதவியால் வெளிவந்துள்ளன. முதுமையும் உடல்தளர்வும் பணிசெய்ய விடாமல் தடுத்தாலும் தம்மால் இயன்ற அச்சுப் பணிகளைத் தொடர்ந்து செய்து, பிறருக்கு உதவியாக வாழ்ந்துவருகின்றார் இந்தப் பதிப்புத்துறை ஆர்வலர்.