கனடா, உலகத் தொல்காப்பிய மன்ற ஆராய்ச்சி மாநாட்டில் இடம்பெற்ற தொல்காப்பிய ஆவணங்களின் கண்காட்சி

 

கனடாவில் உலகத் தொல்காப்பிய மன்றத்தின் ஆராய்ச்சி மாநாடு 2024 செப்டம்பர் மாதம் 20, 21, 22 ஆகிய (வெள்ளி, காரி, ஞாயிறு) மூன்றுநாள் நடைபெற்றது. முதல் இரண்டு நாள்களில் தொல்காப்பிய ஆவணங்களின் கண்காட்சி சிறப்பு நிகழ்வாக நடைபெற்றது. 

முனைவர் மு. இளங்கோவனால் தொகுக்கப்பட்ட தொல்காப்பியம் குறித்த ஐந்நூற்றுக்கும் மேற்பட்ட ஆவணங்கள் கண்காட்சியை அழகுபடுத்தின. இந்தக் கண்காட்சியைப் பலரும் நேரில் கண்டுகளித்தனர். நேரில் பார்க்க இயலாதவர்களும் இக்கண்காட்சியைத் தாங்கள் இருந்த இடத்திலிருந்து காண்பதற்கு வழிசெய்ய வேண்டும் என்று கனடாவில் வாழ்ந்துவரும் மருத்துவர் போல் ஜோசப் அவர்களும், திருகோணமலையைச் சேர்ந்த திருமதி சுவந்தி ஆசிரியர் அவர்களும் முனைவர் இரா. அருள்ராசு அவர்களும் திட்டமிட்டனர். 

எங்களின் நல் வாய்ப்பாக இலங்கையில் பிறந்து, இப்பொழுது கனடாவில் வாழ்ந்துவரும் ஒளி ஓவியர் ஸ்ரீதர் செல்வம் (Srithar Selvam) அவர்கள் எங்களின் விருப்பத்தைப் புரிந்துகொண்டு, மிகச் சிறப்பாக ஒளி ஆவணப்படுத்தி உதவினார். 

திரு. ஸ்ரீதர் செல்வம் அவர்களின் உதவியினுக்கும் அன்புக்கும் என்றும் நன்றியுடையோம். காணொலியைக் கண்டு மகிழுங்கள். தங்கள் நண்பர்களுக்கும் பகிருங்கள்.

காணொலி இணைப்பு

 

கனடா நாட்டில் உலகத் தொல்காப்பிய ஆராய்ச்சி மாநாடு

 

கருத்தரங்க ஆய்வுக்கோவை வெளியீடு

படத்தில்: சுநைதா நாதன்(Juanita Nathan), குமரகுரு, சண்முகராசா, செல்வநாயகி சிறிதாசு, மரு. இலம்போதரன், மு.இளங்கோவன், இல. சுந்தரம், இரா. அருள்தாசு 

கனடாவில் தமிழ்ப் பெருங்குடிமக்கள் நலத்தோடும் வளத்தோடும் வாழ்ந்து வருகின்றனர். கனடா நாட்டின்  அரசியல், வணிகம், கல்வி, மருத்துவம், ஊடகம் முதலிய துறைகளில் தமிழர்களின் பங்களிப்பு மிகுதி எனலாம். தமிழ்க் கல்வியும் கற்பிக்கப்பட்டு, பலரும் தமிழை ஆர்வமுடன் கற்றுவருகின்றனர். கனடாவில் ஆண்டுதோறும் சனவரி மாதம் தமிழ்ப் பண்பாட்டு மாதமாகக் கொண்டாடப்படுகின்றது (பொங்கல் திருவிழா சனவரியில் வருவதை நினைவிற்கொள்ளவும்). கனடாவில் இயங்கிய அண்ணாமலைப் பல்கலைக்கழகத்தின் கனடா வளாகம் தமிழ்க் கல்விக்குப் பெரும் பங்காற்றியது. புலம்பெயர்ந்த தமிழர்கள் பலரும் இளங்கலை, முதுகலைத் தமிழ் இலக்கியம் பயில்வதற்குப் பெருந்துணையாக இருந்த அந்த நிறுவனத்தின் செயல்பாட்டில் அண்மைக்காலமாகத் தொய்வு ஏற்பட்டதால் தமிழ்க்கல்வி கனடாவில் பாதிப்புற்றுள்ளது. இக்குறை விரைவில் சரிசெய்யப்படவேண்டும். 

அண்ணாமலைப்  பல்கலைக்கழகத்தின் கனடா வளாகத்து மாணவர்களுக்குத் தொல்காப்பியம் நூல் ஆசிரியர்கள் வழியாக அறிமுகமாகியிருந்தது. 2016 (சூன் 4, 5 காரி, ஞாயிறு) ஆம் ஆண்டு தொடங்கப்பட்ட உலகத் தொல்காப்பிய மன்றத்தின் கனடாக் கிளையின் கருத்தரங்கு, மாதக் கூட்டங்கள், ஆண்டு விழாக்களின் வழியாகத் தொல்காப்பிய அறிமுகம் இளையவர்கள் முதல் பெரியவர்கள் வரை பரவலாக உள்ளது. இந்த நிலையில் தொல்காப்பியத்தை அடுத்த நிலைக்கு உயர்த்திப் பரப்பும் முயற்சியில் கனடா – தொல்காப்பிய மன்றத்தின் தலைவர் முனைவர் செல்வநாயகி சிறிதாசு அவர்களின் முயற்சியால் உலகத் தொல்காப்பிய ஆராய்ச்சி மாநாட்டுக்கான கால்கோல் பணி தொடங்கப்பட்டது. அதன் காரணமாக கனடா உலகத் தொல்காப்பிய மன்றம், தமிழகத்தின் இலக்குவனார் இலக்கிய இணையத்தின் துணையுடன் பன்னாட்டு ஆராய்ச்சி மாநாட்டை 2024, செப்டம்பர் 20, 21, 22 ஆகிய மூன்று நாள்களில் நடத்தியது. 

உலகு தழுவிய மாநாட்டை நடத்துவது எனில் பலரின் அறிவுரையும் வழிகாட்டலும், பெரும் பொருட்செலவும் இருக்கும் என்பது யாவரும் அறிந்த உண்மையே ஆகும். அவ்வகையில் முனைவர் செல்வநாயகி சிறிதாசு அவர்களின் தலைமையில் இயங்கிய அறிவார்ந்த குழு மாநாட்டுக்கான பெருந்திட்டமிடலுடன் மூன்று நாள் மாநாட்டை வெற்றிகரமாக நடத்தி முடித்தது. 

முதல் உலகத் தொல்காப்பிய ஆராய்ச்சி மாநாடு 2024 செப்டம்பர் 20, 21 ஆகிய இரண்டு நாளும் கனடா, இசுகாபுரோ நகரில் இசுகாபுரோ குடிமை நடுவத்தில் (Scarborough civic Centre) நடைபெற்றது. மூன்றாம் நாள் (செப். 22) மாநாட்டின் நிறைவு விழாவாகத் தமிழ்க் கலா மன்றத்தின் அரங்கில் நடைபெற்றது. 

தொல்காப்பிய ஆராய்ச்சி மாநாட்டில் ஆய்வரங்கம், சிறுவர் பேச்சு, கண்காட்சி, விநாடி வினா(சிறுவர்), விநாடி வினா(பெரியவர்), தமிழ்த்திறன் போட்டிகள், பரிசளிப்பு எனவும், சதிராட்டம், நடனம், குற்றாலக் குறவஞ்சி நாட்டிய நாடகம், அன்பின் ஐந்திணைக் கவியரங்கம், பறையிசை, காத்தவராயன் கூத்து, தொல்காப்பியம் வில்லுப்பாட்டு எனவும் பல்வேறு வடிவங்களில் நிகழ்வுகள் வடிவமைக்கப்பட்டு அனைவரையும் ஈர்க்கும் வகையில் திட்டமிடப்பட்டு நடத்தப்பட்டன. 

முனைவர் செல்வநாயகி சிறிதாசு தலைமையுரை

முனைவர் மு.இளங்கோவன் சிறப்புரை

முதல் நாள் நிகழ்ச்சி குற்றுவிளக்கேற்றலுடன் (குற்று=குத்து) தொடங்கியது. அதனைத் தொடர்ந்து தமிழ்த்தாய் வாழ்த்து, கனடா கீதம், மன்றப்பாடல், நாட்டுக்கு நன்றியுடன் நிகழ்வுகள் தொடங்கின. அஃகேனம் கலைக்குழுவின் பறையிசை ஒலிக்கப்பட்டது. குமரகுரு கணபதி பிள்ளை வரவேற்புரை நிகழ்த்தினார். முனைவர் செல்வநாயகி சிறிதாசு அவர்கள் தலைமையுரை நல்கினார். அறிஞர் இலக்குவனார் திருவள்ளுவன் இணையம் வழி தலைவர் உரையாற்றினார். முனைவர் இல. சுந்தரம் ஆய்வரங்க அறிமுகவுரையாற்றினார். மருத்துவர் இராமநாதன் இலம்போதரன் முதன்மை விருந்தினர் உரையை வழங்கினார். மருத்துவர் விசய் சானகிராமன் இணையம் வழியாக வாழ்த்துரை வழங்கினார். உலகத் தொல்காப்பிய மன்றத்தின் செயலாளர் முனைவர் மு. இளங்கோவன் தொல்காப்பியம் குறித்த சிறப்புரை வழங்கினார். தமிழ்த்திறன் போட்டிகளில் வென்றோருக்குப் பரிசுகள் வழங்கப்பட்டன. மாணவர்களின் நடன நிகழ்வுகளும் நடந்தன. நிகழ்ச்சியின் நிறைவில் கனடா - தொல்காப்பிய மன்றத்தின் செயலாளர் சண்முகராசா சின்னதம்பி அவர்கள் நன்றியுரை வழங்கினார். 

முனைவர் இல.சுந்தரம் ஆய்வரங்க அறிமுகவுரை

மார்க்கம் மாநகர உறுப்பினர் சுநைதா நாதன்(Juanita Nathan) அவர்களுக்கு 

மாநாட்டு ஆய்வுக்கோவை அளித்தல்

தொல்காப்பியக் கண்காட்சியை முனைவர் செல்வநாயகி சிறிதாசு முன்னிலையில், மருத்துவர் இரகுராமன் திறந்துவைத்தார். முனைவர் மு.இளங்கோவனின் முயற்சியால் தொல்காப்பியம் குறித்த ஐந்நூற்றுக்கும் மேற்பட்ட ஆவணங்கள் காட்சிப்படுத்தப்பட்டிருந்தன. மாநாட்டுக்கு வந்திருந்தவர்கள் தொல்காப்பிய ஆவணங்களை ஆர்வமுடன் கண்டுகளித்தனர். ஓலைச்சுவடி முதல் இன்றைய இணையத்திரை வரை தொல்காப்பிய ஆவணங்கள் கண்காட்சியில் இடம்பெற்றிருந்தன. 

கண்காட்சி அரங்கினை ஊடகத்தினர் காணொலி வழியாக மிகச் சிறப்பாக ஆவணப்படுத்தினர். உதயன் உள்ளிட்ட இதழ்களில் மாநாட்டுச் செய்திகள் சிறப்பாக வெளியிடப்பட்டன. பேராளர்கள் கண்காட்சி அரங்கில் நின்று படம் எடுத்து மகிழ்ந்தனர். கண்காட்சி அமைப்பில் தொல்காப்பிய மன்றத்தின் துணைத்தலைவர் வல்லிபுரம் சுகந்தன், முனைவர் இரா. அருள்ராசு, “கணியம்” த. சீனிவாசன் உள்ளிட்டோர் பெரும்பங்களிப்பு நல்கினர். 

முதல் உலகத் தொல்காப்பிய ஆராய்ச்சி மாநாட்டிற்கு வந்திருந்த கட்டுரைகளில் 64 ஆராய்ச்சிக் கட்டுரைகள் அறிஞர் குழுவால் தேர்ந்தெடுக்கப்பட்டன. அவற்றுள் 21 கட்டுரைகள் நேரில் படிக்கப்பட்டன (21/27). இணையம் வழியாக 25 கட்டுரைகள் படிக்கப்பட்டன (25/37). தொல்காப்பிய அரங்கில் முதன்மை நிகழ்வுகள் நடைபெற்றன. இளம்பூரணர் அரங்கம், சேனாவரையர் அரங்கம், நச்சினார்க்கினியர் அரங்கம், பேராசிரியர் அரங்கம், தெய்வச்சிலையார் அரங்கம், கல்லாடனார் அரங்கம் ஆகிய அரங்குகளில் முனைவர் மைதிலி தயாநிதி, சண்முகலிங்கம் கந்தையா, முனைவர் பார்வதி கந்தசாமி, முனைவர் இல.சுந்தரம் ஆகியோர் தலைமையில் ஆய்வரங்குகள் சிறப்பாக நடைபெற்றன. 

நிறைவு நாள் நிகழ்வில் கனடாவுக்கான இந்தியத் தூதர் சித்தார்த் நாத்து கலந்துகொண்டு வாழ்த்துரை வழங்கினார். மாநாட்டில் கலந்துகொண்ட பேராளர்களுக்கு மாநாட்டு மலர், சான்றிதழ், தொல்காப்பியர் சிலை உள்ளிட்ட நினைவுப்பரிசுகள் வழங்கப்பட்டன. மூவேளையும் உணவு வழங்கப்பட்டன. குறித்த நேரத்தில் நிகழ்ச்சிகளைத் தொடங்கியும் குறித்த நேரத்தில் முடித்தும் நிகழ்வுகள் தரப்படுத்தப்பட்டன. தொண்டர்கள் தொல்காப்பிய மாநாட்டின் வெற்றிக்கு மிகச் சிறந்த பங்களிப்பை நல்கினர். 

முனைவர் செல்வநாயகி சிறிதாசு அவர்களும் தொல்காப்பியத் தொண்டர்களும் இணைந்து மூன்றுநாள் தொல்காப்பிய ஆராய்ச்சி மாநாட்டை நடத்தி, கனடா நாட்டில் தொல்காப்பியப் பயிர் வேர்பிடிக்க வழிசெய்துள்ளனர். 

தொல்காப்பிய ஆராய்ச்சி மாநாட்டினைக் கனடிய மண்ணில் முதன்முதல் நிகழ்த்திக் காட்டிய வகையில் முனைவர் செல்வநாயகி சிறிதாசு அவர்களின் பெயர் என்றும் உலகத் தமிழர்களால் நினைவுகூரப்படும்.

தொல்காப்பியக் கண்காட்சியைத் திறந்துவைக்கும் மருத்துவர் இரகுராமன், அருகில்: செல்வநாயகி சிறிதாசு, மு.இளங்கோவன்

                        கண்காட்சியைப் பார்வையிடுதல்

மார்க்கம் மாநகரப் பேரவை உறுப்பினர் சுநைதா நாதன்(Juanita Nathan), மு.இளங்கோவன்

ஆசான் சிவபாலு அவர்களுக்கு நினைவுப் பரிசளித்தல்

மாநாட்டுப் பேராளர்கள்

                கண்காட்சியைப் பார்வையிடும் ஆர்வலர்கள்

தொல்காப்பியக் கண்காட்சி

கலைநிகழ்ச்சி

                கண்காட்சியைப் பார்வையிடும் ஆர்வலர்கள்

மருத்துவர் இலம்போதரன் அவர்களின் முதன்மையுரை

பேராளர்கள்

கணியம் த. சீனிவாசன் உரை

நினைவுப் பரிசு: தொல்காப்பியர் சிலை

கருத்தரங்க ஆய்வுக்கோவை

நிகழ்ச்சி நிரல் சுவடி

 

கனடாவில் தொல்காப்பிய ஆவணங்களின் கண்காட்சி…

 

தொல்காப்பிய ஆவணங்களைத் திரட்டும் பணியில் நான் பலவாண்டுகள் ஈடுபட்டிருந்தாலும் திரட்டிய ஆவணங்களை மக்கள் மன்றத்திற்குக் கொண்டுவர வேண்டும் என்ற எண்ணம் 2024 சூன் திங்களில்தான் ஏற்பட்டது. அமெரிக்காவின் பேரவை விழாவில்(2024,சூலை) தொல்காப்பிய ஆவணங்களின் கண்காட்சியை நடத்துவதற்குத் திட்டமிட்டு, அதற்குரிய முயற்சியிலும் ஈடுபட்டிருந்தேன். பேரவையினரும் ஆதரவு தெரிவித்திருந்தனர். ஆயினும் அமெரிக்கப் பயணம் கைகூடிவரவில்லை. 

கனடாவில் முதலாம் உலகத் தொல்காப்பிய ஆராய்ச்சி மாநாடு (2024,செப்.20,21,22) நடைபெறும் என்ற அறிவிப்பு முன்னமே என் நெஞ்சில் நிலைத்திருந்தது. தொல்காப்பியத்திற்கு என்று நடைபெறும் மாநாட்டில் ஒத்த உணர்வுடையவர்கள் ஒன்றுகூடுவார்கள் என்பதால் தொல்காப்பிய ஆவணங்களின் கண்காட்சியைக் கனடா மாநாட்டில் நடத்துவதற்குத் திட்டமிட்டேன். கனடா, தொல்காப்பிய மன்றத்தின் தலைவர் முனைவர் செல்வநாயகி சிறிதாசு அம்மாவிடம் என் விருப்பத்தைத் தெரிவித்து, கண்காட்சிக்கான கருத்துருவை அவர்களுக்குத் தெரிவித்து, ஒப்புதல் பெற்றேன். என் முயற்சியை மகிழ்ச்சியுடன் வரவேற்றதுடன், தொல்காப்பிய ஆவணங்களின் கண்காட்சியைச் சிறப்பாக நடத்துவதற்குரிய சூழல்களையும் உருவாக்கி வருகின்றார்கள். 

தொல்காப்பியம் தமிழில் கிடைத்துள்ள முதல் இலக்கண நூலாகும். தொல்காப்பியத்தை ஓலைச்சுவடியிலிருந்து முதன் முதலில் மழவை மகாலிங்கையர் அவர்கள் 1847 இல் எழுத்ததிகாரம்- நச்சினார்க்கினியர் உரையுடன் பதிப்பித்து ஒரு வரலாற்று முதன்மை வாய்ந்த பணியைத் தொடங்கி வைத்தார்கள். அதன் பின்னர் அறிஞர்கள் பலர் தொல்காப்பியத்தை மூலமாகவும், உரையாகவும், மொழிபெயர்ப்பாகவும், ஆராய்ச்சிக் குறிப்புகளுடனும், வினா விடை வடிவிலும் பதிப்பித்து, மக்களிடத்தும் மாணவர்களிடத்தும் கொண்டுசேர்த்தனர். இன்றும் இம்முயற்சி தொடர்ந்துவண்ணம் உள்ளது. 

கல்வி நிறுவனங்களில் தொல்காப்பியம் பாடமாகக் கற்பிக்கப்பட்டாலும் முழுமையாக, ஆர்வமுடன் பயிற்றுவிக்கும் ஆசிரியர்களின் எண்ணிக்கை மிகவும் குறைவாகவே தென்படுகின்றது. மூத்த அறிஞர்களின் பேரறிவைப் பாதுகாக்கும் ஆர்வமில்லாத தமிழினம் எண்ணற்ற அறிஞர்களின் அறிவுழைப்பை இழந்து கையற்று நிற்கும் நிலையில், பாலைவனத்தில் பயணம் செய்தவனைப் போன்று என் சிறு முயற்சியில் பேரறிஞர்கள் பலரின் தொல்காப்பியச் சிறப்புப் பொழிவுகளை ஆவணப்படுத்தி, அனைவரும் கேட்பதற்கு வாய்ப்பாக யுடியூபில் பதிந்து வைத்துள்ளேன். அவ்வாறு பதிவுசெய்து வெளியிட்டுள்ள  தொல்காப்பியக் காணொலிகளை இதுவரை பல இலக்கம் பேர் பார்வையிட்டுள்ளமை எனக்கு ஊக்கமாக அமைந்துள்ளது. இவ்வாறு சிறு சிறு பணிகளைச் செய்துவந்த நான் தொல்காப்பிய ஆவணங்களைத் தொகுத்து, அடுத்த நிலை ஆய்வாளர்களுக்கு வழங்கும் நோக்கில் தொல்காப்பிய ஆவணங்களை ஆர்வமுடன் தொகுத்து வருகின்றேன். இப்பணி ஒரு தொடர் பணியாகும். இது நிற்க. 

கனடாவில் உலகத் தொல்காப்பிய ஆராய்ச்சி மாநாட்டின் ஓர் அங்கமாக நடைபெறும் தொல்காப்பிய ஆவணங்களின் கண்காட்சியில் ஓலைச்சுவடி வடிவில் இருந்த தொல்காப்பிய மாதிரிகள், முதல் பதிப்பு நூல்கள் அடுத்தடுத்த பதிப்புகள், தொல்காப்பியம் குறித்த ஆராய்ச்சி நூல்கள், தொல்காப்பிய மொழிபெயர்ப்புகள், உரைவள நூல்கள், ஆங்கில நூல்கள் முதலியவற்றின் மேலட்டைகள் வண்ணப் பதிவாகக் காட்சிக்கு வைக்கப்பட உள்ளன. 

தொல்காப்பியப் பதிப்பிலும் ஆய்விலும் மொழிபெயர்ப்பிலும், உரை வரைதலிலும் தம் வாழ்நாளை ஒப்படைத்துக்கொண்ட தொல்காப்பிய அறிஞர்களின் புகைப்படங்கள் – தொல்காப்பிய ஆர்வலர்களின் படங்கள் நூற்றுக்கணக்கில் இக்கண்காட்சியில் இடம்பெற உள்ளமை தனிச்சிறப்பாகும். இதுவரை அறிஞர் உலகத்தின் கவனத்திற்கு வராத பல படங்கள் - செய்திகள் கவனப்படுத்தப்பட்டுள்ளன. 

தமிழ்நாடு, இலங்கை, சிங்கப்பூர், மலேசியா நாடுகளில் வாழ்ந்த தொல்காப்பிய ஆராய்ச்சியாளர்களின் படங்களுடன் இங்கிலாந்து, செகோசுலேவியா, பிரான்சு, செர்மனி, அமெரிக்கா, கனடா, சப்பான் நாட்டுத் தொல்காப்பிய அறிஞர்களின் படங்களும் பார்வைக்கு வைக்கப்பட உள்ளன. 

தொல்காப்பிய ஆர்வலர்களுக்கு வாய்ப்பிருப்பின் கனடாவில் நடைபெறும் (2024, செப்டம்பர் 20 ,21)  தொல்காப்பியக் கண்காட்சியைக் கண்டுகளிக்க வருமாறு அன்புடன் அழைக்கின்றோம். 

தொல்காப்பிய ஆவணங்களைத் திரட்டும் பணியில் நான் பலவாண்டுகள் ஈடுபட்டிருந்தாலும் திரட்டிய ஆவணங்களை மக்கள் மன்றத்திற்குக் கொண்டுவர வேண்டும் என்ற எண்ணம் 2024 சூன் திங்களில்தான் ஏற்பட்டது. அமெரிக்காவின் பேரவை விழாவில்(2024,சூலை) தொல்காப்பிய ஆவணங்களின் கண்காட்சியை நடத்துவதற்குத் திட்டமிட்டு, அதற்குரிய முயற்சியிலும் ஈடுபட்டிருந்தேன். பேரவையினரும் ஆதரவு தெரிவித்திருந்தனர். ஆயினும் அமெரிக்கப் பயணம் கைகூடிவரவில்லை. 

கனடாவில் முதலாம் உலகத் தொல்காப்பிய ஆராய்ச்சி மாநாடு (2024,செப்.20,21,22) நடைபெறும் என்ற அறிவிப்பு முன்னமே என் நெஞ்சில் நிலைத்திருந்தது. தொல்காப்பியத்திற்கு என்று நடைபெறும் மாநாட்டில் ஒத்த உணர்வுடையவர்கள் ஒன்றுகூடுவார்கள் என்பதால் தொல்காப்பிய ஆவணங்களின் கண்காட்சியைக் கனடா மாநாட்டில் நடத்துவதற்குத் திட்டமிட்டேன். கனடா, தொல்காப்பிய மன்றத்தின் தலைவர் முனைவர் செல்வநாயகி சிறிதாசு அம்மாவிடம் என் விருப்பத்தைத் தெரிவித்து, கண்காட்சிக்கான கருத்துருவை அவர்களுக்குத் தெரிவித்து, ஒப்புதல் பெற்றேன். என் முயற்சியை மகிழ்ச்சியுடன் வரவேற்றதுடன், தொல்காப்பிய ஆவணங்களின் கண்காட்சியைச் சிறப்பாக நடத்துவதற்குரிய சூழல்களையும் உருவாக்கி வருகின்றார்கள். 

தொல்காப்பியம் தமிழில் கிடைத்துள்ள முதல் இலக்கண நூலாகும். தொல்காப்பியத்தை ஓலைச்சுவடியிலிருந்து முதன் முதலில் மழவை மகாலிங்கையர் அவர்கள் 1847 இல் எழுத்ததிகாரம்- நச்சினார்க்கினியர் உரையுடன் பதிப்பித்து ஒரு வரலாற்று முதன்மை வாய்ந்த பணியைத் தொடங்கி வைத்தார்கள். அதன் பின்னர் அறிஞர்கள் பலர் தொல்காப்பியத்தை மூலமாகவும், உரையாகவும், மொழிபெயர்ப்பாகவும், ஆராய்ச்சிக் குறிப்புகளுடனும், வினா விடை வடிவிலும் பதிப்பித்து, மக்களிடத்தும் மாணவர்களிடத்தும் கொண்டுசேர்த்தனர். இன்றும் இம்முயற்சி தொடர்ந்துவண்ணம் உள்ளது. 

கல்வி நிறுவனங்களில் தொல்காப்பியம் பாடமாகக் கற்பிக்கப்பட்டாலும் முழுமையாக, ஆர்வமுடன் பயிற்றுவிக்கும் ஆசிரியர்களின் எண்ணிக்கை மிகவும் குறைவாகவே தென்படுகின்றது. மூத்த அறிஞர்களின் பேரறிவைப் பாதுகாக்கும் ஆர்வமில்லாத தமிழினம் எண்ணற்ற அறிஞர்களின் அறிவுழைப்பை இழந்து கையற்று நிற்கும் நிலையில், பாலைவனத்தில் பயணம் செய்தவனைப் போன்று என் சிறு முயற்சியில் பேரறிஞர்கள் பலரின் தொல்காப்பியச் சிறப்புப் பொழிவுகளை ஆவணப்படுத்தி, அனைவரும் கேட்பதற்கு வாய்ப்பாக யுடியூபில் பதிந்து வைத்துள்ளேன். அவ்வாறு பதிவுசெய்து வெளியிட்டுள்ள  தொல்காப்பியக் காணொலிகளை இதுவரை பல இலக்கம் பேர் பார்வையிட்டுள்ளமை எனக்கு ஊக்கமாக அமைந்துள்ளது. இவ்வாறு சிறு சிறு பணிகளைச் செய்துவந்த நான் தொல்காப்பிய ஆவணங்களைத் தொகுத்து, அடுத்த நிலை ஆய்வாளர்களுக்கு வழங்கும் நோக்கில் தொல்காப்பிய ஆவணங்களை ஆர்வமுடன் தொகுத்து வருகின்றேன். இப்பணி ஒரு தொடர் பணியாகும். இது நிற்க. 

கனடாவில் உலகத் தொல்காப்பிய ஆராய்ச்சி மாநாட்டின் ஓர் அங்கமாக நடைபெறும் தொல்காப்பிய ஆவணங்களின் கண்காட்சியில் ஓலைச்சுவடி வடிவில் இருந்த தொல்காப்பிய மாதிரிகள், முதல் பதிப்பு நூல்கள் அடுத்தடுத்த பதிப்புகள், தொல்காப்பியம் குறித்த ஆராய்ச்சி நூல்கள், தொல்காப்பிய மொழிபெயர்ப்புகள், உரைவள நூல்கள், ஆங்கில நூல்கள் முதலியவற்றின் மேலட்டைகள் வண்ணப் பதிவாகக் காட்சிக்கு வைக்கப்பட உள்ளன. 

தொல்காப்பியச் சான்றோர்களின் படங்கள் (ஒரு பகுதி மட்டும்)

தொல்காப்பியப் பதிப்பிலும் ஆய்விலும் மொழிபெயர்ப்பிலும், உரை வரைதலிலும் தம் வாழ்நாளை ஒப்படைத்துக்கொண்ட தொல்காப்பிய அறிஞர்களின் புகைப்படங்கள் – தொல்காப்பிய ஆர்வலர்களின் படங்கள் நூற்றுக்கணக்கில் இக்கண்காட்சியில் இடம்பெற உள்ளமை தனிச்சிறப்பாகும். இதுவரை அறிஞர் உலகத்தின் கவனத்திற்கு வராத பல படங்கள் - செய்திகள் கவனப்படுத்தப்பட்டுள்ளன. 

தமிழ்நாடு, இலங்கை, சிங்கப்பூர், மலேசியா நாடுகளில் வாழ்ந்த தொல்காப்பிய ஆராய்ச்சியாளர்களின் படங்களுடன் இங்கிலாந்து, செகோசுலேவியா, பிரான்சு, செர்மனி, அமெரிக்கா, கனடா, சப்பான் நாட்டுத் தொல்காப்பிய அறிஞர்களின் படங்களும் பார்வைக்கு வைக்கப்பட உள்ளன. 

தொல்காப்பிய ஆர்வலர்களுக்கு வாய்ப்பிருப்பின் கனடாவில் நடைபெறும் (2024, செப்டம்பர் 20 ,21)  தொல்காப்பியக் கண்காட்சியைக் கண்டுகளிக்க வருமாறு அன்புடன் அழைக்கின்றோம்.

 

 

பேராசிரியர் கா. செல்லப்பன் மறைவு

 

முனைவர் கா. செல்லப்பன் (11. 04. 1936 - 09. 09.2024) 

பாரதிதாசன் பல்கலைக்கழகத்தின் ஆங்கிலத்துறையில் பேராசிரியராகப் பணியாற்றியவரும் பல்வேறு அரிய நூல்களை மொழிபெயர்த்தவருமாகிய பேரறிஞர் கா. செல்லப்பனார் அவர்கள் இயற்கை எய்திய செய்தியறிந்து பெரிதும் கவலையுற்றேன். அன்னாரை இழந்து வருந்தும் குடும்பத்தினர், உறவினர்கள், நண்பர்கள், மாணவர்கள் என அனைவருக்கும் என் ஆழ்ந்த இரங்கலைத் தெரிவித்துக்கொள்கின்றேன். 

பேராசிரியர் கா. செல்லப்பன் அவர்கள் பாரதிதாசன் பல்கலைக்கழகத்தில் நான் முனைவர் பட்ட ஆய்வு மாணவனாக இணைவதற்குப் பேருதவிபுரிந்தவர்கள். 1993 ஆம் ஆண்டு முதல் ஐயாவுடன் நல்ல தொடர்பில் இருந்தேன். அவர்களின் வாழ்வியலை 2013 இல் என் வலைப்பதிவில் எழுதி மனம் நிறைவடைந்தேன். பேராசிரியரின் இழப்பு அறிவுலகிற்குப் பேரிழப்பு. சிலப்பதிகாரத்தையும் சேக்சுபியரையும் இணைத்துப் பேசவும், பாரதியாரையும்,  பாவேந்தர் பாரதிதாசனாரின் தமிழுணர்வையும் ஆங்கிலத்தில் எடுத்தியம்பவும் செல்லப்பனார் போலும் ஓர் அறிஞர் கிடைத்தல் அரிது. 

முனைவர் கா.செல்லப்பன் அவர்கள் பெருமைமிகு வாழ்க்கை 

ஆங்கிலத்துறையில் பேராசிரியராகப் பணியாற்றி ஓய்வுபெற்ற முனைவர் கா.செல்லப்பன் அவர்கள் சிவகங்கை மாவட்டம் பாகநேரியில் காசி. விசுவநாதன் - சௌந்தரம்மாள் ஆகியோரின் மகனாக 11. 04. 1936 இல் பிறந்தவர். காரைக்குடி அழகப்பா கல்லூரியில் இடைநிலை(இண்டர்மீடியட்) வகுப்பும், அண்ணாமலைப் பல்கலைக்கழகத்தில் இளங்கலை(ஆனர்சு) வகுப்பும் பயின்றவர்.  அறிஞர் தெ.பொ.மீ அவர்களின் அழைப்பில் அவர் மேற்பார்வையில் மதுரை காமராசர் பல்கலைக்கழகத்தில் முனைவர் பட்ட ஆய்வை நிகழ்த்தியவர்(1975). 

புதுக்கோட்டை, கும்பகோணம், திருச்சிராப்பள்ளி ஆகிய ஊர்களில் அரசு கல்லூரிகளில் ஆங்கிலப் பேராசிரியராகப் பணியாற்றிய பெருமைக்குரியவர். இங்கிலாந்து நாட்டின் நிதியுதவி பெற்று அந்த நாட்டுக்குக் கல்வி கற்கும்பொருட்டுச் சென்றுவந்த பெருமைக்குரியவர். மதுரை காமராசர் பல்கலைக்கழகத்தில் இணைப்பேராசிரியராகப் பணியாற்றியவர். சென்னைப் பல்கலைக்கழகத்தின் முதுகலை மையம் திருச்சிராப்பள்ளியில் இயங்கியபொழுது 1976- இல் பணிபுரிந்து 1978 இல் பேராசிரியராகப் பணி உயர்வுபெற்றார். இவர், பாரதிதாசன் பல்கலைக்கழகம் 1982 இல் தொடங்கப்பட்டதும் ஆங்கிலத்துறையில் பெருமைமிகு பேராசிரியராகப் பணியாற்றி 1996 இல் ஓய்வுபெற்றவர். சென்னைப் பல்கலைக்கழகத்தின் சிறப்புநிலைப் பேராசிரியராகவும், தமிழ்நாட்டு அரசின் அங்கில மொழித்துறையின் இயக்குநராகவும் இருந்து 2001 வரை பணியாற்றினார். 

தமிழிலும் ஆங்கிலத்திலும் மேடைகளில் கேட்டார் உளங்கொள்ளும் வகையில் பேசும் ஆற்றல்பெற்ற பேராசிரியர் கா.செல்லப்பனார் தமிழிலும் ஆங்கிலத்திலுமாகப் பல நூல்களை எழுதியுள்ளார். தமிழிலிருந்து ஆங்கிலத்திற்கும் ஆங்கிலத்திலிருந்து தமிழுக்குமாகப் பல அரிய நூல்களை மொழிபெயர்த்துள்ளார். 

எங்கெங்கு காணினும் சக்தி (ஒப்பாய்வு), Bharathi the visionary Humanist(மொழிபெயர்ப்பு), தோய்ந்து தேர்ந்த தளங்கள் முதலியன இவரது படைப்புகள். சிலம்புச்செல்வர் ம.பொ.சி யின் விடுதலைப் போரில் தமிழ் வளர்ந்த வரலாறு, இந்திய விடுதலைப் போரில் தமிழகம், மூதறிஞர் வ.சுப.மாணிக்கனாரின் வள்ளுவம், கலைஞரின் குறளோவியம், தென்பாண்டிச் சிங்கம், மீசை முளைத்த வயதினிலே உள்ளிட்ட நூல்களை ஆங்கிலத்தில் மொழிபெயர்த்த பெருமைக்குரியவர். 

சாகித்ய அகாதெமிக்காக விவேகானந்தர், குற்றாலக் குறிஞ்சி(கோவி மணிசேகரன்) மொழிபெயர்ப்பு, தாகூரின் கோரா(Gora) (மொழிபெயர்ப்பு) உள்ளிட்ட நூல்களை எழுதியுள்ளார். இலக்கியத்தில் பழம்புதுமை புதுப்பழைமை(மீரா பதிப்பகம்), ஒப்பியல் தமிழ்(எமரால்டு பதிப்பகம்), ஒப்பிலக்கியக் கொள்கைகளும் செயல்முறைகளும்(உ.த.நி. வெளியீடு), தமிழில் விடுதலை இலக்கியம், திருக்குறள் முதல் கிரிக்கெட் வரை(பாவை பதிப்பகம்), விடுதலைச் சிட்டும் புரட்சிக்குயிலும்(நியூ செஞ்சுரி), இலக்கியச்  சித்தர் அ.சீனிவாச இராகவன் எனப் பல நூல்களை எழுதிய பெருமைக்குரியவர் நம் கா.செல்லப்பனார் அவர்கள். 

பேராசிரியர் கா. செல்லப்பனார் அவர்கள் 09.09.2024 இல் சென்னையில் இயற்கை எய்தினார்.

மு. இளங்கோவனின் இணைய ஆற்றுப்படை நூலுக்கான ஆற்றுப் பா...

 

தமிழ் விக்கி பெரியசாமித் தூரன் விருதாளர்

முனைவர் மோ.கோ. கோவைமணி

பேராசிரியர் (ப.நி.), ஓலைச்சுவடித்துறை

தமிழ்ப் பல்கலைக்கழகம், தஞ்சாவூர் – 613 010.

 நேரிசை ஆசிரியப் பாவில் நேர்த்தியாய்

சீரிசை முத்தாய் இணைய வரலாறு

நீரிசை போலாய் நேர்த்தி செய்து,

சேரிசை எங்கும் சேர்க்கும் இந்த

இணைய ஆற்றுப் படையெனும் நூலை

இணைந்தே ஆக்கிப் பதித்த இணையர்

இன்றும் என்றும் பல்லாண்டு காலம்

வாழ்ந்து பலப்பல வாழும் இலக்கியம்

சீர்சால் நடைபோ லியல்தமிழ் போற்ற,

மேலும் படைக்க வாழ்த்து கின்றேன்.

இணைய ஆற்றுப் படையெனும் நூலில்

தமிழின் மேன்மை, தமிழர் சால்பு

இமிழும் பொழுதில் துவண்டு போனேன்.

தமிழகச் சிறப்பை உலகுய்யச் செய்த

தகைசால் வரிகள் உன்னத மாகும்.

எத்துறை யானாலும் அத்துறை தமதென

உலகில் முந்தி நிற்கும் தமிழர்

செய்த அளப்பெறும் பணிகள் எண்ணில.

எனிலும், உலகம் உய்யப் போற்றும்

கணினி வரவில் தமிழர் பங்கை

நிரல்பட ஓதி, கலப்பின மில்லாது

சிறப்புடன் எடுத்தே ஓவியம் தீட்டிய

இளங்கோ நெஞ்சை ஏற்றுப் போற்றுவேன்.

இலங்கைத் தமிழர் இன்னல் கூறி

இலக்கப் பயணம் வெற்றி கொண்ட

கலக்க மில்லா திலக மேற்றி,

நிலைக்க வைத்த பாங்குக் கண்டேன்.

புதுப்புது வரவுகள் உலகில் பலப்பல

புதுவது இயல்புதான் என்றா னாலும்

கணினி புகுந்த நன்நா ளன்று

உலகின் கன்னித் தமிழ்மகள் பிறந்தாள்.

சங்கம் தொடங்கி இன்று வரையும்

சங்கேத மெனுவென இருந்த போதும்

சத்தமே இடாமல் சட்டை செய்த

எத்துறையிலு மிக்கது இத்துறை என்ன

பல்துறையும் இணைய ஆற்றுப் படையில்

பற்றிடச் செய்து உலவ விட்டு,

புற்றி லடங்கா ஈசல் போலக்

கடித்த எறும்பும் திரும்பிப் பார்க்கும்.

ஓரிட மிருக்கும் ஓம்புமின் தமிழை

விரல்நுனி சொடுக்கில் கண்முன் காட்டும்

விந்தை சாதனை இணைய ஆற்றுப்படை.

பழங்கலை யெல்லாம் மடியும் நாளில்

துளிர்விடத் தொடங்கிய இணையப் பணியில்

எத்தனை அன்பர் எத்துணை அன்பர்

இத்துறை போற்றிப் பரப்பும் வேளையில்

இளங்கோ ஆக்கிய இணைய ஆற்றுப்படை

இனிக்க வில்லை என்றாலும், சுவைக்க

நிலைக்க திளைக்கவே செய்கிறது என்னை.

மாற்றமே நிகழா திருந்த நாளில்

மாற்றம் பலப்பல நிகழ்த்திக் காட்ட

எத்துறை யாகினும் அத்துறை நமதெனப்

பற்றுக் கொண்டு சத்தாய் உயர்ந்த

கணினியின் உன்னத வளர்ச்சி தன்னை

உயர்வாய்க் காட்டி உயர்த்திய கொடியோ

இணைய ஆற்றுப் படையென நிலத்தில்

சிந்தை சேர்த்த சீரிய முயற்சியை

பழந்தமிழ்ச் சுவடியை இணையம் ஏற்றியவன்

மின்னூல் பலப்பல இணையம் ஏற்றியவன்

வலையொளி வழியாகச் சுவடியியல் தந்தவன்

என்றிந்தத் தகுதிப் பாட்டில் வாழ்த்துகிறேன்.

நின்று நீங்கா நிலைத்திட

என்றும் வாழ்த்தும் அன்பன் இவனே.