அமெரிக்காவில் தமிழ் இசை விழா

அமெரிக்காவில் தமிழிசை முழங்கிய தமிழ்த்தளிர்கள்

அமெரிக்காவின் டெக்சாசு மாநிலத்தில் உள்ள டல்லாசு (Dallas) நகரில் இயங்கிவரும் அவ்வை தமிழ் மையம் தமிழ் இசை விழாவினைக்  கடந்த சனிக்கிழமை, (ஏப்ரல் 12 ஆம் நாள்) பிற்பகல் 2 மணி முதல் மாலை 6 மணி வரை லிபர்டி உயர்நிலைப் பள்ளி அரங்கத்தில் நடத்தியது.

அவ்வை தமிழ் மையம் என்பது முற்றிலும் தன்னார்வலர்களால் (volunteers) உருவாக்கப்பட்ட, இலாப நோக்கமற்ற, தமிழ்க் கல்விக்கான தொண்டு நிறுவனமாகும். (non-profit organization). அவ்வை தமிழ் மையமானது தமிழ் மொழி கற்கும் குழந்தைகளுக்கு இரண்டாம் மொழிக் கற்றலுக்கான மதிப்பீட்டுப் புள்ளிகளைப் பெறுதல் (accreditation) என்ற தொலை நோக்குத் திட்டத்துடனும், அமெரிக்க சூழ்நிலைக்கேற்ற எளிமையான முறையில் பொதுப் பாடத்திட்டத்துடன் ( common structure syllabus) கூடிய தமிழ்க் கல்வியை அளித்தல் என்ற உடனடித் திட்டத்துடனும் டல்லாசு நகரில் நடத்தப்படுகின்றது. இந்த மையம் தமிழ்க் கல்விப்பணியை மட்டும் செய்வதுடன் அமையாமல் தமிழிசைப் பணியையும் செய்வதை அண்மையில் அமெரிக்காவில் டல்லாசு நகரில் நடத்திய தமிழிசை விழா நமக்கு எடுத்துரைக்கின்றது.

போட்டிகள் ஏதும் இல்லாமல், குழந்தைகளின் திறமைகளுக்கு வாய்ப்பளிக்கும் ஒரு மேடையாக இவ்விழா நடத்தப்பட்டது. 5 வயது முதல் 17 வயதுவரை உள்ள குழந்தைகள், இளையோர்கள் கிட்டத்தட்ட 120 பேர் கலந்து கொண்டு குழுவாகவும், தனியாகவும் மொத்தம் 47 தமிழிசைப் பாடல்களைப் பாடினர். பங்கேற்ற குழந்தைகள், பெற்றோர்கள், இசை ஆசிரியர்கள், தமிழ் இசை, பாடல் ஆர்வலர்கள், நண்பர்கள் என சற்றொப்ப 400 பேர்களுடன் அரங்கம் நிரம்பியது.

பகல் 2 மணி அளவில் அவ்வை தமிழ் மையத்தின் மாணவ, மாணவிகள், ஆசிரியர்களுடன் சேர்ந்து தமிழ்த்தாய் வாழ்த்தினைப் பாட நிகழ்ச்சி இனிதே தொடங்கியது. அவ்வைத் தமிழ் மையத்தின் தலைவர் விவேக் வாசுதேவன் அனைவரையும் வரவேற்றார். தமிழ்க்கல்வியோடு தமிழின் தொன்மையான கலைகளையும் குழந்தைகளுக்கு அறிமுகம் செய்ய வேண்டும் என்றும், அதற்காகவே இவ்விழா நடத்தப்படுகிறது என்றும் அவர் தெரிவித்தார்.

வரவேற்புரைக்குப் பிறகு, பாவேந்தரின் ‘தமிழுக்கு அமுதென்று பேர்’ என்ற பாடலுடன் தமிழிசைப் பாடல்கள் நிகழ்ச்சி தொடங்கியது. தமிழிசை விழாவிற்கு மிகப்பொருத்தமான முதல் பாடலாக இது அமைந்ததால், அரங்கத்தில் அனைவரும் ஆர்வம் கொண்டு, அடுத்தடுத்த பாடல்களைக் கேட்பதற்குத் தயாரானார்கள்.

தொடர்ந்து, டல்லாசு நகரில் உள்ள பல்வேறு இசைப்பள்ளிகளிலிருந்தும், இசைக்குழுக்களிலிருந்தும், தனியாகவும் பதிவு செய்திருந்து வந்திருந்த குழந்தைகள் கலந்து கொண்டு 4 மணி நேரம் இடைவிடாத இசை மழையைப் பொழிந்தனர். பல்வேறு இராகங்களில் அமைந்த பக்திப் பாடல்கள், சங்க இலக்கியப்பாடல்கள், இசை அறிஞர்களின் பாடல்கள், பாரதியார், பாரதிதாசன், வேதாத்ரி மகரிசி பாடல்கள் எனப் பல பிரிவுகளிலிருந்தும் பாடல்களைப் பாடிய விதம் கேட்போர் மனதைக் கவர்ந்த வண்ணம் இருந்தது. தேவாரம், திருவாசகப் பாடல்களோடு கோசுபல் தேவாலய இசைக்குழுவைச் சேர்ந்த சிறுவன் பாடிய கிறித்தவக் கீர்த்தனைப் பாடல் இசைக்கும், மொழிக்கும் எவ்வித தடைகளும் இருக்க முடியாது என எடுத்துக்காட்டியது.

”தமிழே இனிமை. மழலைத் தமிழ் அதனினும் இனிமை. பாடல் இனிமையானது. குழந்தைகள் பாடும் தமிழ்ப்பாட்டு அதனினும் இனிமையானது” என அரங்கில் பாடிய குழந்தைகள் அனைவரும் உணர்த்தினர்.

கலந்து கொண்ட இசைப்பள்ளிகள் / குழுக்கள்:

ப்ரணவம் இசைப்பள்ளி

திவ்யத்வானி இசைப்பள்ளி,

வீணா இசைப்பள்ளி

நாகலட்சுமி இசைப்பள்ளி

வட அமெரிக்கத் திருமுறைக் கழகம்

கோசுபல் தேவாலயம்

தமிழிசை விழாவில் பாடப்பட்ட பாடல்கள் :

தமிழுக்கு அமுதென்று பேர் - பாரதிதாசன்

கிருஷ்ணா, கிருஷ்ணா

ராம நாமம் சொல்வதே

ஜெய் ஜெய் விட்டால ஹரி

மதன மோகன சுந்தரா

ஒளி படைத்த கண்ணினாய்

ஆயர்பாடி மாளிமையில்

விஷமக்கார கண்ணா

பச்சை மயில் வாகனனே

வேலவா

காக்கைச் சிறகினிலே

மூலாதார மூர்த்தி

தீராத விளையாட்டுப் பிள்ளை

நடனம் ஆடினார்

நீயே துணை மீனலோச்சினி

வந்ததுவும் போனதுவும்

மாடு மேய்க்கும் கண்ணே நீ

விளையாட இது நேரமா

தமிழே

வெள்ளை நிறத்திலொரு பூனை

தொட்டு தொட்டு பேச வரான் - பெரியசாமி தூரன்

பிச்சைப் பாத்திரம்

வேலவா, வேலவா வேல்முருகா

எல்லாம் வல்ல தெய்வம் - வேதாத்ரி மகரிசி

சரஸ்வதி தயைநிதி

சபாபதிக்கு

யமுனை ஆற்றிலே

அச்சம் அச்சம் இல்லை

என்ன தவம் செய்தனை

கைத்தல நிறைகனி

தொள்ளாயிரம்

நமச்சிவாய

குனித்த புருவமும்

இடரினும் தளரினும்

முத்தைத்தரு

மந்திரமாவது

மாதர் பிறை

நாதவிந்து

சர்வ லோகாதிப நமஸ்காரம்

சர்வ ஸ்ருஷ்திக்கும் எஜமான் நீரே

தேவி நீயே துணை

உலகமெலாம் பருவமழை

தமிழைசைப் பாடல்களின் வரிசையில் இறுதிப்பாடலாக, வேதாத்ரி மகரிசி அவர்களின் “உலகமெலாம் பருவ மழை பெய்யட்டும்” என்கிற உலக நல வாழ்த்துப் பாடல் பாடப்பட்டது.

விழாவின் நிறைவு நிகழ்வாக, தமிழ் இசை விழாவில் பங்கேற்றுப் பாடல்களைப் பாடிய அனைத்துக் குழந்தைகளையும் ஊக்கப்படுத்தும் வகையில் அவர்களது பெயர்கள் பொறிக்கப்பட்ட பரிசுக் கோப்பைகள் வழங்கப்பட்டன. பரிசுக் கோப்பைகளை டல்லாசு தமிழ்ச் சங்கத்தின் துணைச்செயலாளர் திரு. இளங்கோவன் சிங்காரவேலு, டல்லாசு தமிழ்ச் சங்கத்தின் முன்னாள் தலைவர் திருமதி. கலை நாயகம், பிளானோ தமிழ்ப்பள்ளி நிறுவுநர் திரு. வேலுராமன், அவ்வை தமிழ் மையத்தின் மூத்த தமிழ் ஆசிரியர் திருமதி. சாந்தா இராகவேந்திரன் ஆகியோர் வழங்கினர்.

பரிசு வாங்கிய குழந்தைகளின் முகத்தில் ஏற்பட்ட மகிழ்ச்சியும், ஆரவாரமும் பெற்றோர்களையும், இசை ஆசிரியர்களையும், விழாவிற்காக உழைத்த அனைத்துத் தன்னார்வலர்களையும் மகிழ்ச்சியில் ஆழ்த்தியது.

இறுதியாக, அமைப்பின் செயலாளர் திரு. மோகன் தண்டபானி நன்றியுரை ஆற்றினார்.

    விழாவின் அனைத்து நிகழ்வுகளையும் அவ்வை தமிழ் மையத்தின் மழலை நிலை ஆசிரியை திருமதி. அனிதா சங்கர் மற்றும் தன்னார்வலர் திருமதி. உமா விவேக் ஆகியோர் தொகுத்து நெறியாள்கை செய்து வழங்கினர்.

அவ்வை தமிழ் மையத்தின் துணைத்தலைவர் சௌந்தர் செயபால் இவ்விழா பற்றிக் கூறுகையில், வட அமெரிக்கத் தமிழ்ச் சங்கப் பேரவையின் ஆண்டு நிகழ்வான தமிழ் விழாவில் கடந்த 5 ஆண்டுகளாக நடத்துப்பட்டு வரும் தமிழிசை நிகழ்ச்சியில் கலந்து கொண்ட குழந்தைகளின் ஆர்வமும், அவர்கள் தேர்ந்தெடுத்துப் பாடிய தமிழைசைப் பாடல்களும் இது போன்ற ஒரு தமிழிசை நிகழ்ச்சியை டல்லாசு நகரில் நடத்தத் தூண்டுகோலாக இருந்தது என்று தெரிவித்தார். இது போன்று விழாக்கள் ஒவ்வொரு வருடமும் டல்லாசு நகரில் நடத்தப்பட வேண்டும் எனத் தனது விருப்பத்தையும் தெரிவித்தார்.

வட அமெரிக்கத் தமிழ்ச்சங்கப் பேரவை, அமெரிக்கத் தமிழ்க் கல்விக் கழகம் ஆகியவற்றின் முன்னாள் தலைவர் திரு. அரசு செல்லையா அவர்கள், “மொழியின் ஒரு கூறாகவே இசையைக்கொண்டது நம் தமிழ். “அவ்வை தமிழ் மையம்” தரமான தமிழ்க்கல்வியினை வழங்கிவருவது தமிழ் ஆர்வலர்களுக்கு மகிழ்ச்சி தருவது. மேலும், “தமிழிசை விழா” நடத்தி இசைத்தமிழையும் வளர்ப்பது இரட்டிப்பு மகிழ்ச்சியைத் தருகிறது. விழா சிறப்பாக நடக்கப்பாடுபடும் அனைவருக்கும் பாராட்டுக்கள், வாழ்த்துக்கள்” எனத் தாம் அனுப்பிய வாழ்த்துச் செய்தியில் தெரிவித்திருந்தார்.

விழாவிற்கான இணையதளம்: http://avvaitamil.org/tamil-music-festival.html

கூத்துக்கலைஞர் நாசர்…

மு.இளங்கோவன், திரைக்கலைஞர் நாசர்

பேராசிரியர் தண்டபாணி அவர்களின் இல்லத்தை மாலை மயங்கும் நேரத்தில் அடைந்தோம். தலைக்கு வந்தது தலைப்பாகையுடன் போனது என்ற எண்ணத்தில் எங்கள் மகிழ்வுந்து நேர்ச்சி பற்றிய நினைவு அலைபோல் மனதுக்குள் வந்து போனது. ஏதேனும் எங்களுக்கு ஏற்பட்டிருந்தால் எங்கள் பயணத்திட்டம் தவிடுபொடியாவதுடன் ஊர், உலகப் பேச்சுக்கு ஆளாகியிருப்போம். நல்லூழ் எங்களைக் காத்தது. பேராசிரியர் தண்டபாணி அவர்கள் பேராசிரியராக இருப்பதுடன் தம் குடும்பத்தினரைத் தமிழ்ப்பற்றுடன் வளர்த்துள்ளமை அறிந்து மகிழ்ந்தேன். பேராசிரியர் தண்டபாணி அவர்கள் தமிழகத்தின் ஊற்றங்கரை அடுத்த சிற்றூரைச் சேர்ந்தவர். உழைத்து முன்னேறியவர். இவரின் மைத்துனர் உள்ளிட்ட உறவினர் சில்லோர் அமெரிக்காவில் இருப்பதை அறிந்தேன்.

நாங்கள் பேராசிரியர் தண்டபாணி ஐயா இல்லத்தை அடைந்தபொழுது திரைக்கலைஞர் அண்ணன் நாசர் அவர்கள் முன்பே அங்கு வந்திருந்தார். அவருடன் சில நாள் செலவிட்டிருந்தாலும் பழகப்பழக மேலும் இனித்தார். வீட்டிலேயே எடுத்துண்ணும் வகையில் உணவு ஆயத்தம் செய்திருந்தார்கள். எங்களுக்கு விருப்பமான உணவுகளை எடுத்து உண்டோம். நான் வைகறையில் வானூர்தி பிடிக்க வேண்டியிருந்ததால் அளவாக உண்டேன். இட்டிலியை விரும்பி உண்டேன். பொருத்தமான துவையல், தொடுகறி, பழங்கள் இருந்தன. உணவை ஒவ்வொருவரும் மகிழ்ச்சியுடன் உண்டோம். உணவும் பேச்சும் சுவையூட்டி இனித்தன.

பேராசிரியர் தண்டபாணி ஐயா அவர்களின் மாமனார் உள்ளிட்டவர்கள் தமிழகத்திலிருந்து வந்திருந்தனர். எங்களைப் பார்த்ததும் அவர்களுக்கு மிகப்பெரிய மகிழ்ச்சி. எங்களுக்குக் குடும்பத்தினர் அனைவரும் அன்புடன் விருந்தோம்பினர். அமெரிக்கத் தன்னுரிமை நாளை முன்னிட்டு இரவில் நடைபெறும் வானவேடிக்கையைப் பார்க்க நாங்கள் இரண்டுக்கும் மேற்பட்ட மகிழ்வுந்துவண்டிகளில் புறப்பட்டோம். வானவேடிக்கை முடிந்து தண்டபாணியார் அவர்களின் இன்னொரு வீட்டில் தங்குவதற்கு வாய்ப்பாக ஒரு மகிழ்வுந்தில் என் உடைமைகளை மாற்றிக்கொண்டோம். எங்கள் மகிழ்வுந்து வானவேடிக்கை நடைபெறும் கடற்கரை நோக்கி விரைந்தது.

நம்மூரில் தேர்த்திருவிழா பார்க்க மக்கள் திரள்வதுபோல் அமெரிக்க மக்கள் தன்னுரிமை நாளைக் கொண்டாடக் கடலை நோக்கிக் குடும்பம் குடும்பமாக வந்தனர். போக்கு வரவு காவலர்கள் போக்கு வரவை ஒழுங்குபடுத்த குறிப்பிட்ட இடம் வரைதான் மகிழ்வுந்து வர அனுமதித்தனர். சாலைகளில் போக்குவரவுக்கு இடையூறு இல்லாமல் பல கல் தொலைவு மகிழ்வுந்து நின்றன.

நாங்கள் மகிழ்வுந்திலிருந்து இறங்கி நடந்து ஒரு கல் தொலைவுக்கு மேல் நடந்தோம். அண்ணன் நாசர், அம்மா கமிலா நாசர், தண்டபாணி ஐயாவின் மகன், அவர் மைத்துனர், என்று ஒரு குழுவாகச் சென்றோம். வான வேடிக்கை தொடங்கியது. சென்ற கூட்டம் அப்படியே அங்கும் இங்கும் நின்றது. சிலர் தரையில் அமர்ந்தனர். நம்மூரில் எச்சில்துப்பும் பெருமகன் ஒத்தோர் யாரும் தென்படவில்லை. தரைகள் தூய்மையாக இருந்தன, புல்வெளியில் அண்ணன் நாசரும் நானும் அமர்ந்தோம். தலைசாய்த்து அண்ணன் நாசர் அவர்கள் அக்காட்சிகளைக் கண்டு மகிழ்ந்தார்.அம்மா கமிலா நாசர் அவர்கள் எங்களைப் பலமுனைகளில் படம் எடுத்து உதவினார்.


வானில் வெடித்து மகிழ்வூட்டும் வான்வெடி



மு.இ, நாசர்


வானவேடிக்கையைப் பார்த்து மகிழும் மு.இ,நாசர்

அமெரிக்க ஏகாதிபத்தியம் என்று பேசிய நாம் இன்று இந்த நாட்டின் தன்னுரிமை நாள் கொண்டாட்டத்தை நேரில் காணும்படி சூழல் அமைந்ததே என்று அண்ணன் நாசர் அவர்கள் குறிப்பிட்டார்கள். கட்டொழுங்காக மக்கள் அமைதிகாத்து அந்த நிகழ்வைக் கண்டுகளித்தனர். அரை மணி நேரம் இந்த நிகழ்வு நடந்திருக்கும். வானவேடிக்கை நிறைவுற்றதும் நாங்கள் எங்கள் மகிழ்வுந்து நிறுத்தப்பட்டிருந்த இடத்துக்கு வந்தோம். அண்ணன் நாசர் உள்ளிட்டவர்களிடம் விடைபெற்றுப் பேராசிரியர் தண்டபாணி அவர்களின் இன்னொரு விருந்தினர் இல்லத்துக்குச் சென்றோம்.

அந்த வீட்டின் வாயில் வரை வந்து பேராசிரியர் எனக்கு விடை தந்தார். நானும் பேராசிரியர் தண்டபாணி ஐயாவின் மைத்துனர் மருத்துவர் சிவா அவர்களும் உரிய அறையில் தங்கினோம். காலை நான்கு மணிக்கு எழுவதாகத் திட்டம். ஒரு மணி நேரத்தில் புறப்பட்டு, ஐந்து மணிக்கு வெளியேற வேண்டும் என்று படுக்கைக்குச் சென்றோம்.
நான் ஒரு மணி நேரம் விழித்துத் தேவையற்ற பொருள்களைக் கழித்துப் பெட்டியை ஒழங்கு செய்து அடுக்கினேன். நடு இரவில் உறங்கி, காலை நான்கு மணிக்கு எழுந்தேன். மருத்துவர் சிவா அவர்களும் என்னை எழுப்ப வந்து நான் ஆயத்தமாவதை அறிந்து மீண்டும் அவர் படுக்கையில் சாய்ந்தார்.

ஐந்து மணிக்குப் பேராசிரியர் தண்டபாணி ஐயாவும், அவர்களின் துணைவியாரும் பதற்றத்துடன் எங்களை எழுப்ப வந்தனர். காரணம் விடியற்காலை நான்கு மணிக்குத் தொலைபேசியில் மருத்துவர் சிவா அவர்களுக்கு ஐயா தண்டபாணியார் பேசி எழுப்ப நினைத்து, முயற்சி செய்தார். ஆனால் தொலைபேசியை அமைதியில் வைத்திருந்ததால் தண்டபாணி ஐயாவின் அழைப்பொலி எங்களுக்குக் கேட்கவில்லை. நானும் மருத்துவர் சிவாவும் எழவில்லை. அதனால்தான் தொலைபேசியை எடுக்கவில்லை என நம் பேராசிரியர் அவர்கள் நினைத்துத் தம் துணைவியாருடன் நேரில் எங்களை எழுப்ப வந்தனர்.

ஏனெனில் நான் வானூர்தியை விட்டால் என் பயணத்திட்டம் சிக்கலாகிவிடும். பொறுப்புணர்வுடன் பேராசிரியர் தண்டபாணி ஐயா செயல்பட்டு என்னை வழியனுப்ப நினைத்து வந்தமையை நினைத்து உள்ளுக்குள் அந்த நல்லுள்ளத்தைப் போற்றினேன். பிறகுதான் நடந்த நிகழ்வு அலசப்பட்டது. ஒருவழியாகப் பேராசிரியரிடம் விடைபெற்றுக்கொண்டு வானூர்தி நிலையத்தை அரை மணி நேரத்தில் அடைந்தோம்.

ஐந்தரை மணிக்கு ரொட்டியும் குளம்பியும் அருந்தினேன். வானூர்திக்குரிய பாதுகாப்பு ஆய்வு முடிந்து நன்முறையில் நான் வானூர்திக்குக் காத்திருந்தேன். மருத்துவர் சிவா பிரியா விடை தந்து பிரிந்துசென்றார். அரை மணி நேரம் காத்திருந்தேன். 6.30 மணிக்குச் சௌத்வெசுட்டு என்னும் வானூர்தியில் ஏறி அமர்ந்தேன். அது பால்டிமோர் நகருக்குப் பறந்தது. எட்டு மணிக்கு அந்த நகரின் வானூர்தி நிலையம் அடைந்தேன். அங்கு ஒன்றரை மணி நேரம் காத்திருந்து அதே நிறுவனத்தின் வானூர்தியில் காலை 9.25 மணிக்குப் அங்கிருந்து பறந்து நியூயார்க்கு - லகார்டியா உள்நாட்டு வானூர்தி நிலையம் வந்தேன். அங்கு என் உடைமைகள் காத்திருந்தன. எடுத்துக்கொண்டு உள்ளூர்ப் பேருந்தில் நியூயார்க்குச் சான் கென்னடி பன்னாட்டு விமான நிலையத்தை 11.30 மணிக்கு அடைந்தேன்.

என் அடுத்த செலவுக்குரிய ஏர் இந்தியா வானூர்தி மாலை 5 மணிக்குதான் என்பதால் வானூர்தி நிலையத்தின் மாடிப்பகுதியில் இருந்த ஏர் இந்தியா அலுவலகத்தின் அருகில் என் பெட்டிகளை வைத்துவிட்டுக் காத்திருந்தேன்.