நிகழ்வுகள்

// நன்றாற்ற லுள்ளுந் தவறுண்டு அவரவர் பண்பறிந் தாற்றாக் கடை (திருக்குறள்) (பொருள்: அவரவருடைய இயல்புகளை அறிந்து அவரவருக்குப் பொருந்துமாறு செய்யாவிட்டால், நன்மை செய்வதிலும் தவறு உண்டாகும். மு.வ.) //

வியாழன், 8 ஆகஸ்ட், 2019

மலேசியாவில் முனைவர் மு. இளங்கோவனின் தொல்லிசையும் கல்லிசையும் நூல் வெளியீட்டு விழா!





முனைவர் மு. இளங்கோவன் எழுதிய தொல்லிசையும் கல்லிசையும் என்ற நூலின் வெளியீட்டு விழா, கோலாலம்பூரில் அமைந்துள்ள நேதாஜி சுபாஷ் சந்திரபோஸ் இந்தியக் கலாச்சார மையத்தின் ஆதரவுடன், தமிழ்ப் பெருமக்கள் செறிந்து வாழும் மலேசியத் திருநாட்டில் நடைபெற உள்ளது.

கோலாலம்பூர் - பிரிக்பீல்ட்சில் உள்ள நேதாஜி சுபாஷ் சந்திரபோஸ் இந்தியக் கலாச்சார மையத்தில் 10.08.2019 சனிக்கிழமை மாலை 6.30 மணி முதல் 9.30 மணி வரை நடைபெறும் நூல் வெளியீட்டு விழா, இறையருட் கவிஞர்  சீனி நைனா முகமது அவர்கள் எழுதிய தமிழ்த்தாய் வாழ்த்துடன் தொடங்குகின்றது. ஆசான் மன்னர் மன்னன் மருதை வரவேற்புரையாற்றவும் மலேசியா, திருமுருகன் திருவாக்கு பீடம் தவத்திரு பாலயோகி சுவாமிகள் அருளுரை வழங்கவும் உள்ளனர்.

மேனாள் துணை அமைச்சர் மாண்புமிகு டான் ஸ்ரீ க. குமரன் தலைமையில் நடைபெறும் விழாவில், மலேசியத் தமிழ்நெறிக் கழகத்தின் தேசியத் தலைவர் இரா. திருமாவளவன் நூலறிமுகம் செய்ய உள்ளார். நேதாஜி சுபாஷ் சந்திரபோஸ் இந்தியக் கலாச்சார மையத்தின் இயக்குநர் க. அய்யனார், சபாய் (பகாங்) சட்டமன்ற உறுப்பினர்    தமிழச்சி காமாட்சி,  மலேசியத் தமிழ் எழுத்தாளர் சங்கத் தலைவர் பெ.இராசேந்திரன், தமிழ்நெறி வாழ்வியல் இயக்கம் சார்ந்த அருள்முனைவர் ஆகியோர் வாழ்த்துரை வழங்க உள்ளனர். மலேசியாவின் மூத்த தமிழறிஞர் முனைவர் முரசு. நெடுமாறன் வாழ்த்துக் கவிதை வழங்க உள்ளார். தமிழிசைப் பாடல்களை ந. வளர்மதி பாட உள்ளார். முனைவர் மு. இளங்கோவன் ஏற்புரையாற்றவும், ம. முனியாண்டி நன்றியுரை வழங்கவும் உள்ளனர். நிகழ்ச்சியைத் ’தங்கக் குரலோன்’ தங்கமணி தொகுத்து வழங்க உள்ளார்.

தொடர்புக்கு: 
ம. மன்னர் மன்னன் 013 341 7389 
சரசுவதி வேலு 012 318 9968 
ம. முனியாண்டி 016 444 2029                                                           


                                                                                     

சனி, 20 ஜூலை, 2019

முனைவர் இரா. பாவேந்தன் மறைவு!


முனைவர் இரா. பாவேந்தன் 

தமிழ்நாடு வேளாண்மைப் பல்கலைக்கழகத்தில் தமிழ்ப் பேராசிரியராகப் பணியாற்றிய என் அருமை நண்பரும் பன்னூலாசிரியருமான முனைவர் இரா. பாவேந்தன் அவர்கள் உடல்நலம் பாதிக்கப்பட்டு, சென்னை மருத்துவமனையில் சேர்க்கப்பட்டிருந்தார். மருத்துவம் பயனளிக்காத நிலையில் இன்று(20.07.2019)  அதிகாலை இயற்கை எய்திய துன்பச் செய்தியறிந்து ஆழ்ந்த துயருற்றேன். பேராசிரியர் இரா. பாவேந்தன் அவர்களை இழந்து வருந்தும் அவர்தம் குடும்பத்தார், உறவினர், நண்பர்கள் என அனைவருக்கும் என் ஆழ்ந்த வருத்தத்தைத் தெரிவித்துக்கொள்கின்றேன். முனைவர் இரா. பாவேந்தனின் உடல் சென்னையிலிருந்து, எடுத்துச்செல்லப்பட்டு இன்று மாலை 6 மணியளவில் அவர்தம் சொந்த ஊரான திருச்சிராப்பள்ளியில் நல்லடக்கம் செய்யப்பட உள்ளது.

யான் முனைவர் பட்ட ஆய்வு மேற்கொண்டிருந்த காலம் முதல்(1993-97) நல்ல நண்பர்களாகப் பழகினோம். ஒத்த கொள்கையும், உழைப்பும் எங்களைப் பிணைத்தன. கோவை செல்லும்பொழுதெல்லாம் சந்தித்து உரையாடும் வழக்கத்தினைக் கொண்டிருந்தேன். தம் இல்லத்தில் தங்கிச் செல்லுமாறு வற்புறுத்துவார். கோவைசென்றிருந்தபொழுது வேளாண்மைப் பல்கலைக்கழகத்தைக் கடந்து, வேறு ஒரு பணிக்குச் செல்ல உள்ளதைச் சொன்ன, ஒருநாளில் அங்குள்ள சமுதாய வானொலியில் உரையாற்ற, அன்புக் கட்டளை இட்டார். நான் வந்தமையும், வானொலியில் உரையாற்றியதையும் முனைவர் இரா. பாவேந்தன் வழியாக முன்னைத் துணைவேந்தர் பேராசிரியர் க.இராமசாமி அவர்கள் அறிந்தார். தமிழ்நாடு வேளாண்மைப் பல்கலைக்கழகத்தின் முத்தமிழ் விழாவுக்குப் பாவேந்தன் வழியாகவே துணைவேந்தர் பின்னாளில் அழைத்து உரையாற்றச் செய்து மகிழ்ந்தார்.



திராவிட இயக்கப் பின்புலம்கொண்ட குடும்பத்தில் பிறந்த இரா. பாவேந்தன், தமிழ்ப் பற்றும், அறிவியல் சிந்தனையும் கொண்டவர். கறுப்பு சிகப்பு இதழியல், திராவிட நாட்டுக் கல்வி வரலாறு, திராவிட சினிமா, ஆதி திராவிடன் இதழ்த் தொகுப்பு, தமிழில் அறிவியல் இதழ்கள் உள்ளிட்ட நூல்களைத் தமிழுலகுக்கு வழங்கிய பெருமகனார்.

புதுவையில் பதின்மூன்றாவது உலகத் தமிழ் இணைய மாநாட்டை நான் முன்னின்று நடத்தியபொழுது, தமிழ்நாடு வேளாண்மைப் பல்கலைக்கழகம் சார்பில் வருகைதந்து, மாநாடு சிறப்பாக நடைபெறுவதற்குத் துணைநின்றவர். தம் தந்தையாரின் திராவிட இயக்கச் சிந்தனைகளை என்னுடன் மகிழ்ச்சியுடன் பகிர்ந்துகொள்பவர். தம் உடன்பிறப்பு மருத்துவர் இரா. அமுதக்கலைஞனின் பெயர்க்காரணம் சொல்லி, சொல்லி வியப்பவர்.

முனைவர் இரா. பாவேந்தன் வாழ்க்கைக்குறிப்பு

முனைவர் இரா. பாவேந்தன் 13.04.1970 இல் கோவையில் பிறந்தவர். பெற்றோர் பெயர் பேராசிரியர் அருணா. இராசகோபால், திருமதி செல்லவடிவு. இரா.பாவேந்தனின் தொடக்கக் கல்வி கோவை, மதுரை, சென்னை என்று பல ஊர்களில் இருந்தது. மதுரை யாதவர் கல்லூரியில் இளம் அறிவியல் (இயற்பியல்) பயின்றவர். முதுகலை – தமிழ் இலக்கியப் படிப்பை மதுரை காமராசர் பல்கலைக்கழகத்தில் பயின்றவர். முனைவர் பட்ட ஆய்வைத் தஞ்சாவூர் தமிழ்ப் பல்கலைக்கழகத்தில் நிறைவு செய்தவர். மயிலாடுதுறை அ.வ. கல்லூரியில் தம் பேராசிரியர் பணியைத் தொடங்கி, கோவை கொங்குநாடு கலை அறிவியல் கல்லூரியில் தொடர்ந்தவர். கோவை பாரதியார் பல்கலைக்கழத்தில் இவருக்குக் கிடைக்கவேண்டிய பணி, தகுதியற்ற ஒருவருக்கு வழங்கப்பட்டது என்று கல்வி உலகில் பதிவாகியுள்ளது. தமிழ்நாடு வேளாண்மைப் பல்கலைக்கழத்தில் பேராசிரியர் பணியேற்ற முனைவர் இரா. பாவேந்தன் பல்கலைக்கழகத்தில் தொடர்ந்து பணியாற்றியவர் என்பது குறிப்பிடத்தக்கது.

முனைவர் இரா. பாவேந்தனுடன் மருத்துவர் இரா. அமுதக்கலைஞன், மருத்துவர் இரா. இளவஞ்சி ஆகியோர் உடன் பிறந்தவர்கள்.

முனைவர் இரா. பாவேந்தின் மனைவி பெயர் சு. செயலட்சுமி. இவர்களுக்கு இரா. கோதை, இரா. கயல் என்ற இரண்டு மக்கள் செல்வங்கள் உள்ளனர்.

   ஒடுக்கப்பட்ட, பின்தங்கிய சமூகத்து மக்கள் முன்னேறுவதற்கு உரிய எண்ணத்துடன் இயங்கிய என் ஆருயிர்த் தோழர் முனைவர் இரா. பாவேந்தனின் இழப்பு, தமிழ் ஆய்வுலகுக்கும் கல்விப்புலத்துக்கும் மிகப்பெரிய இழப்பு!. இரா. பாவேந்தனின் வழியில் இயங்குவது ஒன்றே அவருக்குச் செய்யும் நன்றிக் கைம்மாறாக இருக்கும்!

தமிழிருக்கும் வரை முனைவர் இரா. பாவேந்தனின் சுவடுகள் இருக்கும்!

செவ்வாய், 16 ஜூலை, 2019

செந்தமிழ்க் கல்லூரி முதல் சிக்காகோ வரை!


சிக்காகோவில் செந்தமிழ் பரப்பும் சான்றோர் விருது பெறுதல்

சிக்காகோ தமிழ்ச்சங்கத்தின் பொன்விழாவில் முனைவர் இரவிசங்கர் கண்ணபிரான், அறிஞர் ஜார்ஜ் ஹார்ட்டு, மு.இளங்கோவன், திருவள்ளுவன், மருத்துவர் சோம. இளங்கோவன்

திருப்பனந்தாள் செந்தமிழ்க் கல்லூரியில் 1987 ஆம் ஆண்டு இளங்கலைத் தமிழ் இலக்கியம் பயில்வதற்குச் சென்றது முதல் இன்றுவரை சற்றொப்ப முப்பத்திரண்டு ஆண்டுகள் தமிழோடு தொடர்பில் உள்ளேன். மாணவனாகவும் ஆய்வு மாணவனாகவும், பேராசிரியனாகவும் இத்தொடர்பு மலர்ந்துள்ளது.

 முனைவர் கு.சுந்தரமூர்த்தி அவர்கள் அப்பொழுது செந்தமிழ்க் கல்லூரி முதல்வராக இருந்தார். அவர்தம் வகுப்பிலும் அடுத்து முதல்வர் பொறுப்பேற்ற பேராசிரியர் ம.வே. பசுபதி அவர்களின் வகுப்பிலும் தமிழ் பயின்றமை வாழ்வில் கிடைத்த பெரும்பேறு எனலாம். அங்குப் பணியாற்றிய பிற பேராசிரியர்கள் ஒவ்வொருவரும் என்மீது அன்புகாட்டி, தமிழ் இலக்கியங்களையும், இலக்கணங்களையும் கற்பித்தமையால் தமிழறிமுகம் அமைந்தது.  உழவுத்தொழிலில் உழன்றுகொண்டிருந்த என்னை என் ஆசிரியர் வாரியங்காவல் புலவர் . சுந்தரேசனார் ஆற்றுப்படுத்தியதால்தான், திருப்பனந்தாள் கல்லூரியில் தமிழறிவு பெறும் வாய்ப்பு அமைந்தது. அதனால்தான் உலகத்தைத் தெரிந்துகொள்ளவும் புரிந்துகொள்ளவும் முடிந்தன.

திருப்பனந்தாள் கல்லூரியில் பயின்றபொழுது காசித்திருமடத்தின் அதிபர் கயிலை மாமுனிவர் தவத்திரு முத்துக்குமாரசாமித் தம்பிரான் அடிகளார் அவர்களின் அன்புக்கும், அன்றைய பொழுதில் திருமடத்தில் காறுபாறு சுவாமிகளாக இருந்த தவத்திரு முனைவர் குமாரசாமித் தம்பிரான் அவர்களின் நம்பிக்கைக்கும் உரியவனாக இருந்தேன் (தற்பொழுது தருமையாதீனத்தின் இளைய பண்டார சந்நிதியாக எழுந்தருளி அருள் பாலிப்பவர்கள்).

திருப்பனந்தாள் காசித் திருமடத்தின் சார்பில் வெளிவந்த குமரகுருபரர் இதழில் அவ்வப்பொழுது இலக்கியக் கட்டுரைகள் எழுதி, என் எழுத்து ஆர்வத்தைத் தணித்துக்கொண்டேன். அப்பொழுது வெளிவந்த கட்டுரைகள் சிறு சிறு கட்டுரைகளாக இருந்தன. பின்னாளில் நூல்கள் எழுதும் ஊக்கத்தை அச்சிற்றிதழ் தந்தது. மாணவப்பருவத்தில் கல்லூரிகளில் நடைபெற்ற பல்வேறு போட்டிகளில் பரிசில்கள் பெற்றமையும், இலக்கிய மன்றப் பொறுப்புகளில் இணைந்து, பணியாற்றியமையும், அயலூர்களில் உள்ள கல்லூரிகளில் நடைபெற்ற போட்டிகளில் கலந்துகொண்டமையும் இப்பொழுதும் என் நினைவில் உள்ளன.

திருப்பனந்தாள் கல்லூரியில் பயின்றபொழுது நடைபெற்ற சில நிகழ்வுகளை இங்கு நினைத்துப் பார்க்கின்றேன். செயங்கொண்டம் தமிழோசை நற்பணி மன்றம் நடத்திய ஆய்வுக்கட்டுரைப் போட்டியில் தமிழ்வழிக் கல்வி என்ற தலைப்பில் கட்டுரை எழுதி, முதல் பரிசாகத் தங்கப் பதக்கம் பெற்றேன். அதனைத் தமிழ்ப் பேரறிஞர் பாவலரேறு பெருஞ்சித்திரனார் வழங்கியமை இவண் எண்ணிப் பார்க்கத்தக்கது. இளங்கலை மாணவனாக இருக்கும்பொழுது மாணவராற்றுப்படை(1990) பனசைக்குயில் கூவுகிறது, அச்சக ஆற்றுப்படை உள்ளிட்ட நூல்களை எழுதி வெளியிட்டமை யாவும் மனக்கண்ணில் தோன்றி மறைகின்றன, விடுதலைப் போராட்ட வீரர் வெ.துரையனார் அடிகள் தன் வரலாறு (பதிப்புப் பணி) வெளிக்கொண்டு வந்தமை, நெல்லைத் தனித்தமிழ் இலக்கியக் கழகத்தின் சார்பில் தமிழக அளவில் நடைபெற்ற போட்டியில் மூதறிஞர் வ.சுப.மாணிக்கனாரின் தமிழ்ப்பணிகள் என்ற தலைப்பில் கட்டுரை எழுதித் தங்கப் பதக்கம் பெற்றமை யாவும் திருப்பனந்தாள் கல்லூரியில் நான் பயின்றபொழுது நடைபெற்ற, நினைவுகூரத் தக்க பணிகளாகும்.

புதுவைப் பல்கலைக்கழகத்திற்கு இளம் முனைவர் பட்ட ஆய்வுக்கு வந்தபொழுது(1992-93) பேராசிரியர் க.ப.அறவாணன் அவர்களின் தொடர்பு கிடைத்தமையும், அதனால் பிற நாடுகளில் நடைபெறும் தமிழாய்வுகளை அறிந்தமையும், மராட்டியர் ஆட்சியில் தமிழகமும் தமிழும் குறித்த ஆய்வு செய்தமையும், பேராசிரியர் ம.இலெ. தங்கப்பாவுடன் அமைந்த தொடர்புகளும் யாவும் எண்ணி எண்ணி இன்புறத் தக்கன.

திருச்சிராப்பள்ளி பாரதிதாசன் பல்கலைக்கழகத்தில்(1993-97) முனைவர் பட்ட ஆய்வுக்குப் பாரதிதாசன் பரம்பரை என்ற தலைப்பினைத் தேர்வு செய்து பேராசிரியர் எழில்முதல்வன் (மா. இராமலிங்கம்) அவர்களின் மேற்பார்வையில் ஆய்வு செய்தமை, பொன்னி என்னும் இலக்கிய இதழின் சிறப்புகளைத் தமிழ் ஆய்வுலகுக்கு அறிமுகம் செய்தமை, பாவலர் முடியரசனாரின் தமிழ்த் தொண்டினை ஆய்வுசெய்து கட்டுரை எழுதி, நெல்லைத் தனித்தமிழ் இலக்கியக் கழகத்தில் மீண்டும் ஒரு தங்கப்பதக்கமும் வெள்ளிச் சுழற்கோப்பையும் பெற்றமை யாவும் நெஞ்சில் நிழலாடுகின்றன. இக்கால கட்டத்தில்தான் திரைப்பா ஆசிரியர் கவிஞர் அறிவுமதி அவர்களின் தொடர்பு அமைந்து, என் ஆய்வுப்போக்கில் அறிவியலும், மண்மணமும் பிணைந்து, தமிழ் சார்ந்து இயங்கும் நிலை ஏற்பட்டது.

முனைவர் பட்ட ஆய்வுக்குப் பிறகு சென்னை உலகத் தமிழாராய்ச்சி நிறுவனத்தில் ஆய்வு உதவியாளர் பணி அமைந்து(1997-98), தமிழியல் ஆவணம் என்ற திட்டப்பணியில் ஓராண்டு இணைந்திருந்தேன். கவிஞர் அறிவுமதி அவர்களின் அரவணைப்பிலும் அன்பிலும் திளைத்த இந்த ஓராண்டு வாழ்க்கை, என் வாழ்வில் மிகப்பெரிய தொடர்புகளையும் அழகியல் உணர்வுகளையும் உருவாக்கியது. இலக்கியம் அன்றும் இன்றும், மணல்மேட்டு மழலைகள் உள்ளிட்ட நூல்கள் இக்காலத்தில் வெளிவந்தன. பன்னாட்டு அறிஞர்களைச் சந்திக்கவும், உரையாடவும், அயலகத் தமிழாய்வு முயற்சிகளைக் கற்கவும் அயலகத் தமிழறிஞர்களின் வாழ்வியலைக் கற்கவும் உலகத் தமிழாராய்ச்சி நிறுவனப் பணி வழி அமைத்தது.

சென்னைப் பணி ஓராண்டில் முடிவுக்கு வந்ததும், பாரதிதாசன் பல்கலைக்கழகத்தில் தமிழிசைக் கலைக்களஞ்சியப் பணிக்கு இசைமேதை வீ.ப.கா.சுந்தரம் அவர்களின் உதவியாளனாக - ஆய்வு உதவியாளனாக ஒராண்டு பணிபுரியும் பொழுது (1998-99), தமிழிசை ஆய்வின் அறிமுகம் கிடைத்தது. தமிழிசைக் கலைக்களஞ்சியம் நான்காம் தொகுதி உருவாக்கத்தில் என் துணை இசைமேதை வீ.ப.கா.சுந்தரம் அவர்களுக்குப் பேருதவியாக இருந்தது. இசைமேதை அவர்களுடன் பல்கலைக்கழகத்தில் பணிபுரிந்தபொழுது நாளும் உரையாடி, அவர் வாழ்நாளில் கற்ற, பெற்ற பட்டறிவினையும், அறிவினையும் அறியும் பெரும்பேறு அமைந்தது. இவரிடம் தமிழிசை குறித்து நான் பெற்ற அறிவுதான் பின்னாளில் பண்ணாராய்ச்சி வித்தகர் குடந்தை ப. சுந்தரேசனார் ஆவணப்படம், விபுலாநந்த அடிகளார் ஆவணப்படம், தொல்லிசையும் கல்லிசையும் ஆவணப்படம் ஆகியவற்றை உருவாக்குதற்குக் காரணமாக அமைந்தது.

1999 – சூன் மாதம்….

வேலூர் மாவட்டம் கலவையில் அமைந்துள்ள ஆதிபராசக்தி அறிவியல் கல்லூரியில் தமிழ் விரிவுரையாளராகப் பணியேற்றேன். பல நூறு மாணவர்களைச் சந்திக்கவும், பல நூல்களை எழுதவும் கலவைக் கல்லூரிப் பணி உதவியது. பொன்னி ஆசிரியவுரை, பொன்னி பாரதிதாசன் பரம்பரை, அரங்கேறும் சிலம்புகள் உள்ளிட்ட நூல்கள் இங்கிருந்தபொழுதே அச்சாயின. மக்கள் தகவல் தொடர்பியல் குறித்த முதுகலைப் பட்டமும் (M.A.J.M.C) அஞ்சல் வழியில் கற்றுப் பெற்றேன்.  

இக்கல்லூரியில் தாளாளராக விளங்கும் மதிப்பிற்குரிய சக்தி ப. அன்பழகன் ஐயா அவர்களின் நம்பிக்கைக்குரியவனாக விளங்கிய அந்த நாள்கள் இனிமை நிறைந்தவையாகும். என் முதல் அயல்நாட்டுப் பயணம் (சிங்கப்பூர், மலேசியா) இங்கு பணியாற்றிய பொழுதுதான் அமைந்தது(2001). பல்வேறு கருத்தரங்குகளில் கலந்துகொண்டு கட்டுரை படித்தமை, பல கல்லூரிகளில் சிறப்புரையாற்றியமை யாவும் இங்கு அமைந்து, என் உழைப்பு வெளியுலகிற்கு அறிமுகம் ஆகும் சூழல் அமைந்தது. பல்வேறு பல்கலைக்கழகங்கள் தம் அஞ்சல்வழிக் கல்விக்குரிய வகுப்புகளை வேலூரில் நடத்தியபொழுது, மாணவர்களுக்கு நாட்டுப்புறவியல், இலக்கணம், இலக்கியம் பயிற்றுவிக்கும் வாய்ப்பினை வழங்கின. இதனால் பல்லாயிரம் மாணவர்களைச் சந்திக்கும் வாய்ப்பு இயற்கையாகவே எனக்குக் கிடைத்தது. மலைபடுகடாம் நூலில் அமைந்துள்ள நவிரமலையைக் கண்டு, அதுகுறித்து வெளியுலகிற்கு அறிமுகம் செய்தமையும் இங்கு பணியாற்றிய பொழுதுதான் அமைந்தது.

2005 ஆகத்து மாதம்…

புதுதில்லியில் உள்ள நடுவண் தேர்வாணையத்தால் தேர்ந்தெடுக்கப்பட்டு, புதுச்சேரி அரசின் பாரதிதாசன் அரசு மகளிர் கல்லூரியில்  தமிழ் விரிவுரையாளர் பணியில் இணைந்தேன். அதுபொழுது தமிழ் இணையத்துறை அறிமுகம் ஆனது. அத்துறையில் ஈடுபட்டு, கடுமையாக உழைத்ததால் பலநூறு அறிஞர்களின் வாழ்வியலும் பணிகளும் இணையப் பெருவெளியில் ஆவணங்களாயின. நூற்றுக்கணக்கான பள்ளிகள், கல்லூரிகளுக்குச் சென்று தமிழ் இணையப் பயிலரங்குகளை நடத்தி, தமிழை அடுத்த நிலைக்கு உயர்த்த, முயன்று உழைத்தேன். இதனால் பல்லாயிரம் மாணவர் பயன்பெற்றனர். சிங்கப்பூர், மலேசியா, இலங்கை, அமெரிக்கா, குவைத்து, என அயல்நாட்டுப் பயணப் பட்டியல் நீண்டது. பல்லாயிரம் தமிழ் ஆர்வலர்கள் நேரிலும் தொலைபேசியிலும் தொடர்புகொண்டு, நண்பர்களாயினர். புதிய நண்பர்கள் கிடைத்தவண்ணம் உள்ளனர். பழைய நண்பர்களும் தொடர்பில் இணைந்தவண்ணம் உள்ளனர்.

பெருமழைப் புலவர் பொ.வே.சோமசுந்தரனார் குடும்பத்திற்குத் தமிழக அரசு  பத்து இலட்சம் நிதி உதவி கிடைக்க வழி அமைத்தது, பெருமழைப் புலவரின் நூற்றாண்டினைக் கொண்டாடியது, பண்ணாராய்ச்சி வித்தகர் குடந்தை ப.சுந்தரேசனார் நூற்றாண்டு, வ.சுப.மாணிக்கம் நூற்றாண்டு, க.வெள்ளைவாரணனார் நூற்றாண்டு எனப் பல விழாக்களை எடுத்து மூத்தோரைப் போற்றி மதித்தமை என் வாழ்வின் நினைக்கத்தகுந்த பொழுதுகளாகும்.

புதுவைப் பணிக்காலத்தில்தான் இந்தியக் குடியரசுத் தலைவரின் செம்மொழி இளம் அறிஞர் விருது கிடைத்து, என் உழைப்புக்கு உரிய மதிப்பினை உணர்ந்தேன்.

புதுச்சேரியில் உலகத் தமிழ் இணைய மாநாட்டினைப் பல்வேறு இடையூறுகளுக்கு இடையே நடத்தியமை (2014) இங்கு தனித்துச் சுட்டவேண்டிய செய்தியாகும்.

உலகத் தொல்காப்பிய மன்றம் தொடங்கி, அயல்நாடுகளில் கிளைகளை ஏற்படுத்தியமை, புதுச்சேரியில் தொல்காப்பியம் குறித்த தொடர்பொழிவுகள் நடைபெற வழிவகை செய்தமை, தொல்காப்பிய அறிஞர்களின் பேச்சுகளைக் காணொளியாக்கி, உலகத்தவர் காண வழிசெய்தமையும் என் பணிகளுள் குறிப்பிடத் தக்கவையேயாகும்.

1987 முதல் இந்த ஆண்டு வரை (2019), கடந்த முப்பத்திரண்டு ஆண்டுகளாக யான் செய்துவரும் பல்வேறு பணிகளையும், முயற்சிகளையும் கவனத்தில்கொண்ட, சிக்காகோ தமிழ்ச் சங்கத்தார் தம் பொன்விழா ஆண்டில்(2019) என்னைச் சிறப்பிக்கவும், என்னைத் தொடர்ந்து இயங்கச் செய்யவும் நினைத்து அண்மையில் சிக்காகோ நகரில் நடைபெற்ற உலகத் தமிழாராய்ச்சி மாநாட்டின் முதல்நாள் நிகழ்வில் பொற்கிழி வழங்கி, செந்தமிழ் பரப்பும் சான்றோர் என்ற விருதினையும் வழங்கிச் சிறப்பித்தனர்.

தகுதியுரை வழங்கும் முனைவர் கண்ணபிரான் இரவிசங்கர்

தகுதியுரையை ஆர்வத்துடன் செவிமடுக்கும்காட்சி

சிக்காகோ தமிழ்ச்சங்க விருது பெறுவதற்குரிய செய்தி, அமெரிக்க விழாவின் முதல்நாள் (04.07.2019) மாலையில்தான் எனக்குத் தெரிவிக்கப்பட்டது. செய்தி கிடைத்த சற்று நேரத்தில் என் அருகே உலகப் புகழ்பெற்ற பேராசிரியர் முனைவர் ஜார்ஜ் ஹார்ட்டு அவர்களை அழைத்து வந்து, பேராசிரியர் கண்ணபிரான் இரவிசங்கர் அமரச் செய்தார்; மேலும் பேராசிரியர் ஹார்ட்டுக்கு என்னை அறிமுகமும் செய்துவைத்தார். முனைவர் ஜார்ஜ் ஹார்ட்டுடன் உரையாடியபடி, பதினொரு ஆண்டுகளுக்கு முன் நான் எழுதிய அயலகத் தமிழறிஞர்கள் நூல் பையில் இருந்ததை எடுத்து, அதனை முனைவர் ஹார்ட்டு அவர்களுக்கு வழங்கி, அவரைப் பற்றிய கட்டுரையை நூலில் இணைத்துள்ளேன் என்று சொன்னேன். முனைவர் ஹார்ட்டு அவர்கள் பெரிதும் மகிழ்ந்தார். தம்மைப் பற்றிய கட்டுரையை மேலோட்டமாகப் பார்த்துவிட்டு, என்னை வாழ்த்தினார். அதுபொழுது இருவரையும் மேடைக்கு அழைத்துச் செல்ல மருத்துவர் சோம இளங்கோவன் ஐயாவும், விழாக்குழுவினரும் வந்தனர். பொற்கிழி வழங்கும் நிகழ்வில் முதலில் என்னை விளித்து, என் பணிகளை அறிமுகம் செய்து, அழகிய தட்டொன்றில் செந்தமிழ் பரப்பும் சான்றோர் விருதினையும், பொற்கிழியையும் வைத்து, என்னை ஏற்றருள வேண்டினர். ஐந்தாயிரத்திற்கும் மேற்பட்ட மக்கள் நடுவண், நன்றியுடன் பொற்கிழியையும், விருதினையும் பெற்றுக்கொண்டேன். அடுத்து அறிஞர் ஜார்ஜ் ஹார்ட்டும் பொற்கிழி பெற்றுக்கொண்டார். பெருங்கவிக்கோ சார்பில் அவர்தம் திருமகனாரும் பொற்கிழி பெற்றுக்கொண்டார்.

மூத்த அறிஞர்களுக்கு இடையே இளையோனின் - எளியேனின் பணிகளையும் அடையாளம் கண்டு, ஊக்கப்படுத்திய சிக்காகோ தமிழ்ச் சங்கத்தின் பொறுப்பாளர்களுக்கும், உறுப்பினர்களுக்கும் நான் நன்றியுடையவன் ஆவேன். செந்தமிழ்க் கல்லூரியில் தொடங்கி, தொடர்ந்து நடைபெற்றுவரும் என் பல்வேறு பணிகளுக்குச் சிக்காகோ நகரில் ஏற்பளிப்பு செய்யப்பட்டமையை உலகெங்கும் பரவி வாழும் என் நண்பர்களுக்குத் தெரிவிப்பதில் மகிழ்கின்றேன். தங்கள் ஊக்க மொழிகளால் தொடர்ந்து தமிழ்ப்பணியில் ஈடுபடுவேன்.

புதன், 29 மே, 2019

சிங்கப்பூர் "எழுத்துச் செம்மல்" ஏ. பி. சண்முகம்





ஏ. பி. சண்முகம்

     முனைவர் க. ப. அறவாணனார் அவர்களின் அன்பிற்குரிய மாணவர்களுள் ஒருவனாக விளங்கியதிலிருந்தே (1992-1993) அயல்நாட்டுத் தொடர்புகள் தொடங்கிவிட்டன. மலேசியாவில் வாழ்ந்த குறிஞ்சிக்குமரனார், கனடாவில் வாழ்ந்த ஈழத்துப்பூராடனார் என அறிஞர்களின் தொடர்புப் பட்டியல் நீளத்தொடங்கியது.

     திருச்சிராப்பள்ளி, பாரதிதாசன் பல்கலைக்கழகத்தில் முனைவர் பட்ட ஆய்வு மேற்கொண்டிருந்த பொழுது (1993 -1994) சிங்கப்பூர் எழுத்தாளர், எழுத்துச் செம்மல் ஏ.பி. சண்முகம் ஐயாவின் தொடர்பு, புலவர் பாளை. எழிலேந்தி அவர்கள் வழியாக அமைந்தது. ஏ.பி. சண்முகம் அவர்கள் அமைதியும், அன்பும் ஒருங்கே வாய்த்த பெருமகனார். ஏ.பி. சண்முகம் அவர்களை நூல்கள் வழியாக அறிந்த நான், நேரிலும் பழகும் வாய்ப்பு அமைந்தது. அவரின் நாச்சியார்கோவில் ஊரில் அமைந்த இல்லத்திற்குச் சென்று உரையாடியமை நினைவுக்கு வருகின்றது.

     ஆத்திக்குளம் பக்கிரிசாமி சண்முகம் என்பது இவரின் பெயர் விரிவாகும். 07.11.1929 இல் தமிழகத்தில் ஆத்திகுளத்தில் பிறந்தவர். பின்னர் மலேசியா, சிங்கப்பூரில் வாழ்ந்தவர். சிங்கப்பூர் எழுத்தாளர் கழகத்தில் உறுப்பினராக இருந்தவர்.

     நாடக நூல்களையும் உரை நடை நூல்களையும் கவிதை நூல்களையும் படைத்தவர். ஏ.பி. சண்முகம் அவர்களின் சங்கநாதம் நூலுக்கு அணிந்துரை ஒன்று 25.04.1994 இல் எழுதியுள்ளேன். இருபத்தைந்து ஆண்டுகளுக்கு முன்னர் எழுதியமை நினைவுக்கு வந்தது. பழைய நூல்களைப் புரட்டியபொழுது இந்த அணிந்துரை என் கண்ணில் தென்பட்டது. நண்பர்களின் பார்வைக்கு எழுத்தாளர் ஏ.பி. சண்முகம் அவர்களின் நினைவைப் பகிர்வதில் மகிழ்கின்றேன்.




சனி, 9 மார்ச், 2019

உலகத் தொல்காப்பிய மன்றம் - தொல்காப்பியத் தொண்டருக்குப் பாராட்டு விழா


முனைவர் நா.க.நிதி(அமெரிக்கா) அவர்களுக்கு, 
மாண்புமிகு பொதுப்பணித்துறை அமைச்சர் ஆ.நமச்சிவாயம் அவர்கள் தொல்காப்பியத் தொண்டர் விருதளித்துப் பாராட்டுதல். அருகில் பேராசிரியர்கள் எஸ்.ஆரோக்கியநாதன், மு.இளங்கோவன், கு. சிவமணி

முனைவர் நா.க.நிதி(அமெரிக்கா) அவர்களுக்கு, 
மாண்புமிகு பொதுப்பணித்துறை அமைச்சர் ஆ.நமச்சிவாயம் அவர்கள் தொல்காப்பியத் தொண்டர் விருதளித்துப் பாராட்டுதல். 
அருகில் புதுவைத் தமிழறிஞர்கள்


     புதுச்சேரி உலகத் தொல்காப்பிய மன்றத்தின் சார்பில் சிறப்புரையும், தொல்காப்பியத் தொண்டருக்குப் பாராட்டு விழாவும் புதுவைத் தமிழ்ச் சங்கத்தில் 09.03.2019 காரிக்கிழமை மாலை 6.30 மணி முதல் 9 மணிவரை நடைபெற்றது. ஆய்வறிஞர் கு. சிவமணி தலைமையில் நடைபெற்ற நிகழ்ச்சியில் புதுவைப் பல்கலைக்கழகத்தின் முன்னைப் பேராசிரியர் எஸ். ஆரோக்கியநாதன் கலந்துகொண்டு "மொழியியல் நோக்கில் தொல்காப்பியம்" என்ற தலைப்பில் உரையாற்றினார். காரைக்குடி இராமசாமி தமிழ்க் கல்லூரியின் முன்னாள் முதல்வர் தெ.முருகசாமி "சிலப்பதிகாரத்தில் தொல்காப்பியப் பதிவுகள்" என்ற தலைப்பில் உரையாற்றினார்.

     புதுச்சேரி அரசின் பொதுப்பணித்துறை அமைச்சர் ஆ. நமச்சிவாயம் சிறப்பு விருந்தினராக நிகழ்ச்சியில் கலந்துகொண்டார். அமெரிக்காவிலிருந்து வருகைபுரிந்த அறிவியல் அறிஞர் நா.க.நிதி அவர்களுக்குத் தொல்காப்பியத் தொண்டர் என்ற விருதினை அமைச்சர் ஆ. நமச்சிவாயம் வழங்கிப் பாராட்டிப் பேசினார். தமிழ் உணர்வு தழைத்த உரையாக மாண்புமிகு அமைச்சர் அவர்களின் உரை இருந்தது.

     தூ. சடகோபன் வரவேற்புரையாற்றினார். முனைவர் ப.பத்மநாபன் அறிமுகவுரையாற்றினார். முனைவர் மு.இளங்கோவன் நோக்கவுரையாற்றினார். முனைவர் இரா. கோவலன் நன்றியுரையாற்றினார். புதுச்சேரியில் வாழும் தமிழறிஞர்கள் திரளாக நிகழ்ச்சியில் கலந்துகொண்டனர்.

செவ்வாய், 26 பிப்ரவரி, 2019

சொற்குவைத் திட்டம் - வல்லுநர் குழுவின் கலந்துரையாடல் கூட்டம்




சொற்குவைத் திட்டத்தின் கலந்துரையாடலுக்கு வருகைபுரிந்த
 அறிஞர் பெருமக்கள், பல்துறை வல்லுநர்கள்

 மாண்புமிகு தமிழ்வளர்ச்சித்துறை அமைச்சர் க.பாண்டியராசனார்க்கு
 என் நூலினை வழங்கும் காட்சி
     மொழிஞாயிறு ஞா. தேவநேயப் பாவாணர் அவர்களை இயக்குநராகக் கொண்டு, தமிழ்நாட்டு அரசு செந்தமிழ்ச் சொற்பிறப்பியல் அகரமுதலித் திட்ட இயக்ககத்தை நிறுவி(08.05.1974), கடந்த நாற்பதாண்டுகளாக அரும்பெரும் அகரமுதலிகளை உருவாக்கி வெளியிட்டுள்ளது. இதுவரை 31 மடலங்களாக அகரமுதலிகள் வெளிவந்துள்ளமை தமிழுக்கு மிகப்பெரும் ஆக்கமாகும்.

     செந்தமிழ்ச் சொற்பிறப்பியல் அகரமுதலித் திட்ட இயக்ககம் மேலும் பல திட்டங்களின் வழியாகத் தமிழுக்குப் பெருமைசேர்க்கும் அகரமுதலிகளை உருவாக்கி வருகின்றது. இவ்வியக்ககத்தின் இயக்குநராகத் திருவாளர் தங்க. காமராசு அவர்கள் அமர்த்தப்பெற்ற பிறகு இயக்ககம் மிகச் சிறந்த பாய்ச்சலுடன் பணிகளை முன்னெடுத்துள்ளது.

     செந்தமிழ்ச் சொற்பிறப்பியல் அகரமுதலித் திட்ட இயக்ககத்தின் சார்பில் சொற்குவைத் (Word Corpus) திட்டம் என்ற பெயரில் தமிழில் உள்ள சொற்களைத் தொகுக்கவும், கலைச்சொற்களை உருவாக்கி இணைக்கவுமான பெரும்பணியைச் செய்வதற்கு இத்துறை ஆர்வலர்களும், அறிஞர்களும் கலந்துகொள்ளும் கலந்துரையாடல் கூட்டம் ஒன்று 25.02.2019 காலை 9.30 மணி முதல் மாலை 7 மணி வரை, சென்னை அறிஞர் அண்ணா நூற்றாண்டு நினைவு நூலக அரங்கின் தரைத்தளத்தில் நடைபெற்றது. தமிழகத்தின் பல பகுதிகளிலிருந்தும் பல்துறை அறிஞர்கள் வருகைபுரிந்து, தத்தம் கருத்துகளை எடுத்துரைத்தனர்.

     சொற்குவைத் திட்டத்தில் பேரீடுபாடுகொண்ட மாண்புமிகு தமிழ் வளர்ச்சி (ம) பண்பாட்டுத்துறை அமைச்சர் திரு. க. பாண்டியராசனார் அவர்கள் கலந்துகொண்டு, அறிஞர்கள் ஒவ்வொருவருடனும் உரையாடி, அவர்களின் தமிழ்ப்பணிகளை அறிந்ததுடன், சொல் தொகுப்புக்குரிய நெறிகாட்டல்களைக் கேட்டுப் பெற்றமை அரங்கில் இருந்த அறிஞர் பெருமக்களுக்குப் பெரு மகிழ்வாக இருந்தது. தமிழ் வளர்ச்சிக்குத் தாம் எண்ணியுள்ள எண்ணங்களை எல்லாம் எடுத்துரைத்ததுடன் சொற்குவையை மேம்படுத்துவதற்கான வழிகாட்டல்களையும் அறிஞர்களிடம் அமைச்சர் அவர்கள் வேண்டினார்கள்.

     தமிழில் உள்ள எல்லாச் சொற்களையும் தொகுப்பது, தமிழைப் பேசுபவர்களின் எண்ணிக்கையைத் துல்லியமாக அறிவது, இலக்கிய வளம் சார்ந்த ஆவணங்களைப் பாதுகாத்தல், யுனெசுகோவில் மொழிபெயர்க்கும் தகுதிபெறும் மொழியாகத் தமிழை நிலைப்படுத்த வழிவகைசெய்தல், சொல்லாக்கப் பணிகளில் மாணவர்களை ஈடுபடுத்த வேண்டும் என்பன போன்ற விருப்பங்களை மாண்புமிகு அமைச்சர் அவர்கள் எடுத்துரைத்து உரையாற்றினார்.

     இந்த நிகழ்ச்சியில் அறிஞர்கள் தெ. ஞானசுந்தரம், ந. தெய்வசுந்தரம், ப. மருதநாயகம், கு. அரசேந்திரன், கோமதிநாயகம், கு.மோகனராசு, இரேணுகாதேவி, ப.கிருஷ்ணன், ந. வெற்றியழகன், இ. சூசை, பாலசுப்பிரமணியன், ப.க.நடராசன், அருப்புக்கோட்டை சரவணன், அப்துல் சபார், புலவர் பதுமனார், சேதுமணி மணியம், பிரேம்குமார்(மைசூர்), மதன்கார்க்கி, "கவிக்கோ’ ஞானச்செல்வன், மருத்துவர் அ.செந்தில், மருத்துவர் மு. குமரேசன், தஞ்சை இறையரசன், கிருங்கை சேதுபதி, மு.பழநியப்பன், பெ.இளையாப்பிள்ளை, உல. பாலசுப்பிரமணியன், வழக்கறிஞர் அ. மதிவாணன், மு.இளங்கோவன் உள்ளிட்டோர் கலந்துகொண்டு கருத்துகளைப் பகிர்ந்துகொண்டனர்.

     செந்தமிழ்ச் சொற்பிறப்பியல் அகரமுதலித் திட்ட இயக்ககம் சார்ந்த தங்க. காமராசு அவர்களின் வரவேற்புரையும், இணைப்புரையும், நிகழ்ச்சியை நெறிப்படுத்திய பாங்கும் வருகைபுரிந்த அறிஞர் பெருமக்களால் பெரிதும் போற்றப்பட்டது. இயக்ககத்தில் பணிபுரியும் அலுவலர்களும் திரளாகக் கலந்துகொண்டு நிகழ்ச்சியைச் சிறப்பித்தனர்.


கலந்துரையாடலில் பங்கேற்றோர்


கலந்துரையாடலில் பங்கேற்றோர்

கலந்துரையாடலில் பங்கேற்றோர்


மாண்புமிகு அமைச்சர் க.பாண்டியராசனார் அவர்களிடம், டென்மார்க்கிலிருந்து வருகைபுரிந்த இராமச்சந்திரமூர்த்தி அவர்கள்  தம் அமைப்பினர் வெளியிட உள்ள ஆத்திசூடி டேனிசு மொழிபெயர்ப்பு குறித்து உரையாடல்.


படங்கள் உதவி: நேதாஜி பாபு



திங்கள், 11 பிப்ரவரி, 2019

புதுச்சேரியில் தொல்லிசையும் கல்லிசையும் ஆவணப்படம் – தொடக்கவிழா



புதுச்சேரி சட்டப்பேரவைத் துணைத்தலைவர் வே.பொ சிவக்கொழுந்து அவர்கள் ஆவணப்படத்தைத் தொடங்கிவைக்கும் காட்சி. அருகில் மயிலம் சிவஞான பாலய சுவாமிகள், தூ.சடகோபன், மருத்துவர் பால் ஜோசப் (கனடா), புலவர் சீனு.இராமச்சந்திரன், புலவர் ஆதிகேசவன், மு.இளங்கோவன்



புதுவைப் பேராசிரியர் முனைவர் மு. இளங்கோவன் இயக்கத்தில் உருவாக உள்ள தொல்லிசையும் கல்லிசையும் என்ற ஆவணப்படத்தின் தொடக்க விழா 11.02.2019 (திங்கள் கிழமை) மாலை 6 மணி முதல் 8.30 மணி வரை புதுச்சேரியில் உள்ள செயராம் உணவகத்தில் நடைபெற்றது.

.தொல்லிசையும் கல்லிசையும் ஆவணப்படம் வெளியீட்டு விழாவில்  புதுச்சேரி அரசின் சட்டப்பேரவையின் துணைத்தலைவரும், புதுச்சேரி கம்பன் கழகத்தின் தலைவருமான வே.பொ. சிவக்கொழுந்து கலந்துகொண்டு ஆவணப்படத்தைத் தொடங்கிவைத்தார் மயிலம் திருமடத்தின் அதிபர் தவத்திரு சிவஞான பாலய சுவாமிகள் தலைமையில் நடைபெற்ற  ஆவணப்படத் தொடக்க விழாவில் புதுவைத் தமிழறிஞர்கள் பலரும் கலந்துகொண்டனர்.

புதுச்சேரி ஆல்பா கல்வி நிறுவனங்களின் தலைவர் வ. பாசிங்கம் வாழ்த்துரை வழங்கினார்.

கனடாவிலிருந்து வருகைபுரிந்த மருத்துவர் பால் ஜோசப், டென்மார்க்கிலிருந்து வருகைபுரிந்த இராமச்சந்திர மூர்த்தி ஆகியோர் வாழ்த்துரை வழங்கினர். ஆவணப்பட இயக்குநர் மு.இளங்கோவன் தம் ஆவணப்படத்தின் நோக்கத்தினை எடுத்துரைத்தார். இந்த ஆவணப்படத்தில் பணிபுரிய உள்ள தொழில்நுட்பக் கலைஞர்கள் விழாவில் சிறப்பிக்கப்பட்டனர்.

கலைமாமணி கா. இராசமாணிக்கம் தமிழ்த்தாய் வாழ்த்து பாடவும், முனைவர் அரங்க. மு. முருகையன் வரவேற்புரையாற்றவும், புலவர். . ஆதிகேசவன், தமிழ்மாமணி சீனு. இராமச்சந்திரன், தனித்தமிழ்ப் பாவலர் தமிழியக்கன், தூ. சடகோபன் ஆகியோர் முன்னிலையுரையாற்றினர். இன்னிசைவேந்தன் கழுவினரின் அறுமுகனம் இன்னிசை நிகழ்ச்சி நடைபெற்றது. கு.அ. தமிழ்மொழி நிகழ்ச்சியைத் தொகுத்து வழங்கினார்.





புதன், 6 பிப்ரவரி, 2019

தொல்லிசையும் கல்லிசையும் ஆவணப்படம் - தொடக்கவிழா!





     அருந்தமிழ் உறவுடையீர், வணக்கம்.

     தமிழை இயல், இசை, நாடகம் என மூவகைப்படுத்தி நம் முன்னோர் உரைப்பர். இவற்றுள் நடுவணாக உள்ள இசைத்தமிழ் நீண்ட வரலாறுகொண்டது. தொல்காப்பியம், எட்டுத்தொகை, பத்துப்பாட்டு, சிலப்பதிகாரம், காரைக்கால் அம்மையார் பாடல்கள், திருமுறைகள், ஆழ்வார் பாசுரங்கள், சேக்கிழாரின் பெரியபுராணம், சீவக சிந்தாமணி, அருணகிரிநாதரின் பாடல்கள், அண்ணாமலை ரெட்டியாரின் காவடிச்சிந்து, வண்ணச்சரபம் தண்டபாணி சுவாமிகளின் வண்ணப்பாடல்கள்  உள்ளிட்ட நம் தமிழ் நூல்களில் இசைகுறித்தும், இசைக்கருவிகள் குறித்தும், இசைக்கலைஞர்கள் குறித்தும். மிகுதியான செய்திகள் இடம்பெற்றுள்ளன. மேலும் தமிழகத்தில் உள்ள கல்வெட்டுகளிலும் இசை குறித்த செய்திகள் பதிவாகியுள்ளன.

     இருபதாம் நூற்றாண்டில் ஆபிரகாம் பண்டிதர், விபுலாநந்த அடிகளார், பண்ணாராய்ச்சி வித்தகர் குடந்தை ப.சுந்தரேசனார், வீ.ப.கா. சுந்தரம் உள்ளிட்ட இசை அறிஞர்கள் இசைத்தமிழ் ஆய்வில் தம் வாழ்நாளை ஒப்படைத்துப் பணியாற்றியுள்ளனர். அண்ணாமலை அரசர் தமிழிசை இயக்கம் கண்டு நிலைத்த புகழ்பெற்றார். "பொங்கு தமிழ்ப் பண்ணிசை மன்றம்", "தந்தை பெரியார் தமிழிசை மன்றம்" உள்ளிட்ட அமைப்புகளும் தமிழ்நாட்டில் மீண்டும் ஓர் இசைப்புரட்சிக்கு வித்திட்டன.

 ’நாளும் இன்னிசையால் தமிழ் பரப்பிய’ அடியவர்களைக் கண்ட இத்தமிழ்நாட்டில் இசைத்தமிழ் ஆவணங்கள் யாவும் முறைப்படித் தொகுத்துவைக்கப்படாத ஒரு நிலை உள்ளது. ஈராயிரத்து ஐந்நூறு ஆண்டு வரலாறுகொண்ட இசைத்தமிழின் வரலாற்றை விளக்கும் வகையில் முனைவர் மு. இளங்கோவன் இயக்கத்தில் தொல்லிசையும் கல்லிசையும் என்ற ஆவணப்படத்தை உருவாக்க உள்ளோம். இந்த ஆவணப்படத்தின் தொடக்க விழாவில் கலந்துகொண்டு சிறப்பிக்குமாறு தங்களை மிகுந்த மகிழ்வுடன் அழைக்கின்றோம்.

இன்னவண்ணம்
வயல்வெளித் திரைக்களம்
புதுச்சேரி - 605 003
தொடர்புக்கு: 94420 29053

நாள்: 11.02.2019, திங்கள் கிழமை,
நேரம்: அந்திமாலை 6. 00 மணி - 8. 30 மணி
இடம்: செயராம் உணவகம், புதுச்சேரி


 நிகழ்ச்சி நிரல்
அந்திமாலை 6.00 முதல் 6.30 வரை
கலைமாமணி சு.கோபகுமார் மாணவர்கள் வழங்கும்
அறுமுகனம் இன்னிசை

தமிழ்த்தாய் வாழ்த்து: கலைமாமணி கா. இராசமாணிக்கம்
வரவேற்புரை: முனைவர் அரங்க. மு. முருகையன்

முன்னிலை
புலவர். ந. ஆதிகேசவன், தமிழ்மாமணி சீனு.இராமச்சந்திரன்,
தனித்தமிழ்ப் பாவலர் தமிழியக்கன், திரு. தூ. சடகோபன்

தலைமை: தவத்திரு. சிவஞான பாலய சுவாமிகள்
மயிலம் திருமடம்

ஆவணப்படத்தைத் தொடங்கிவைத்தல்
மாண்புமிகு சட்டப்பேரவையின் துணைத்தலைவர்
திரு. வே. பொ. சிவக்கொழுந்து

சிறப்புரை
முனைவர் பா. மீ. சுந்தரம்
இசையாய்வறிஞர், புதுச்சேரி

பாராட்டுரை
திரு. இரா.சிவா, சட்டமன்ற உறுப்பினர் &
தலைவர், புதுவை அரசின் தொழில் வளர்ச்சிக் கழகம்
முனைவர் சீனி. திருமால்முருகன்
தலைவர், அதியமான் கல்வி நிறுவனங்கள், ஊத்தங்கரை
திரு. வ. பாசிங்கம்
தலைவர், ஆல்பா கல்வி நிறுவனங்கள்

வாழ்த்துரை
திரு. கே. பி. கே. செல்வராஜ் (தலைவர், திருப்பூர் முத்தமிழ்ச் சங்கம்)
முனைவர் வி. முத்து (தலைவர், புதுவைத் தமிழ்ச் சங்கம்)
மருத்துவர் பால் ஜோசப். கனடா
முனைவர் ஒப்பிலா. மதிவாணன்
திரு. சோழன்குமார்
முனைவர் ப. சிவராசி, இசுலாமியாக் கல்லூரி, வாணியம்பாடி

தொகுப்புரை: செல்வி கு. அ. தமிழ்மொழி
நன்றியுரை: திரு. செ. திருவாசகம்

வெள்ளி, 1 பிப்ரவரி, 2019

பேராசிரியர் சரசுவதி வேணுகோபால் - சிறப்பு நேர்காணல்கள்!


பேராசிரியர் சரசுவதி வேணுகோபால்

தமிழகத்தில் பல்கலைக்கழகங்கள், கல்லூரிகளில் நாட்டுப்புறவியல் ஒரு பாடமாக அமைக்கப்பட்டு, மாணவர்கள் கற்று வருகின்றனர். பலர் இத்துறையில் ஆய்வுகளைத் தொடர்ந்து நிகழ்த்திவருகின்றனர். பல்கலைக்கழகங்களில் நாட்டுப்புறவியல் தனித்துறையாகச் செயல்படுவதையும் இங்கு நினைவிற்கொள்ளவேண்டும். தமிழக நாட்டுப்புறவியல் துறை ஆய்வாளர்களுள் பேராசிரியர் சரசுவதி வேணுகோபால் அவர்கள் குறிப்பிடத்தகுந்த பங்களிப்பு நல்கியவர் ஆவார்.

மதுரை  காமராசர் பல்கலைக்கழகத்தில் முனைவர் பட்ட ஆய்வுசெய்து பட்டம் பெற்றவர். அப் பல்கலைக்கழகத்தில் பேராசிரியராக இருந்து, நாட்டுப்புறவியல் ஆய்வு செழிக்க அருந்தொண்டாற்றியவர். பன்னூலாசிரியர். பல ஆய்வுத்திட்டங்களை வகுத்து, நிறைவுசெய்தவர். அமெரிக்கா உள்ளிட்ட பிற நாடுகளைச் சார்ந்த மாணவர்களுக்குக் கல்வி கற்பித்த பட்டறிவாளர். கடந்த ஐம்பதாண்டுகளாக வளர்ந்துவரும் நாட்டுப்புறவியல் துறைசார்ந்த தம் பட்டறிவுகளைச் சற்றொப்ப இரண்டரை மணிநேரம் என்னுடன் பகிர்ந்துகொண்டார்கள்.

இந்த நேர்காணலில் நாட்டுப்புறவியல் துறை தமிழகத்தில் எவ்வாறு வளர்ந்தது என்பதை மிகச் சிறப்பாக நம் பேராசிரியர் அவர்கள் நினைவுகூர்ந்தார்கள். அயல்நாட்டு அறிஞர்கள் தமிழக நாட்டுப்புறவியல் துறை ஆய்வுக்குச் செய்துள்ள பங்களிப்புகள், தமிழகத்தில் நிகழ்ந்துள்ள மிகச் சிறந்த நாட்டுப்புறவியல் ஆய்வுகள் என யாவற்றையும் தம் நினைவிலிருந்து பகிர்ந்துகொண்டார்கள். தமிழகத்தின் மூத்த அறிஞர் பெருமக்களின் தமிழ்ப்பணிகளும் சிறப்பாக நினைவுகூரப்பட்டுள்ளன. பேராசிரியர்கள் தெ.பொ.மீ, முத்துச்சண்முகனார், மு.வ., வ.சுப.மாணிக்கம், தமிழண்ணல், வெள்ளைவாரணனார் உள்ளிட்டோர் தம் ஆய்வுக்குத் துணைநின்ற பாங்கினை நன்றியுடன் நினைவுகூர்ந்துள்ளார்.

என் வேண்டுகோளை ஏற்று, நேர்காணலுக்கு உதவிய பேராசிரியர் சரசுவதி வேணுகோபால் அவர்களுக்கும், அவர்களின் கணவர் முனைவர் விசய வேணுகோபால் ஐயா அவர்களுக்கும் தமிழுலகின் சார்பில் நிறைந்த நன்றியைத் தெரிவித்துக்கொள்கின்றேன். எங்களின் ஆவணமாக்கும் முயற்சிக்குத் துணைநிற்கும் அனைத்து நண்பர்களுக்கும் என் நெஞ்சார்ந்த நன்றி.
தமிழக நாட்டுப்புறவியல் என்ற தலைப்பிலும், தொல்காப்பியத்தில் நாட்டுப்புறவியலின் தாக்கம் என்ற தலைப்பிலும் இரண்டு நேர்காணலைப் படத்தொகுப்பு செய்து, இணையவெளியில் இணைத்துள்ளேன். நாட்டுப்புறவியல் ஆர்வலர்கள் இவற்றைப் பயன்படுத்திக்கொள்ளுமாறு அன்புடன் வேண்டுகின்றேன்.

தமிழக நாட்டுப்புறவியல் காணொளியைப் பார்க்க இங்கு அழுத்துக.

தொல்காப்பியத்தில் நாட்டுப்புறவியல் கூறுகள் காணொளியைப் பார்க்க இங்கு அழுத்துக.

பேராசிரியர் சரசுவதி வேணுகோபால் அவர்களுடன் மு.இளங்கோவன்