பேராசிரியர் மு. இளங்கோவன் தமிழ் விக்கி தூரன் விருது பெற்றார்!

 

 எழுத்தாளர் ஜெயமோகன் மு.இளங்கோவனுக்கு மாலை அணிவித்தல்

பி.கே.இராஜசேகரன்(மலையாளத் திறனாய்வாளர்), தியடோர் பாஸ்கரன், மு.இளங்கோவன், சிவசங்கர், எழுத்தாளர் ஜெயமோகன்

மு. இளங்கோவன்

 தமிழ் ஆய்வுப்புலத்தில் தொடர்ந்து இயங்கி, சாதனைகள் படைக்கும் தமிழ் ஆராய்ச்சியாளர்களுக்குத் தமிழ் விக்கி தூரன் விருது, விஷ்ணுபுரம் இலக்கியவட்டம் சார்பில் ஆண்டுதோறும் வழங்கப்படுகின்றது. 2023 ஆம் ஆண்டுக்கான தமிழ் விக்கி தூரன் விருதுக்குப் புதுச்சேரிப் பேராசிரியர் மு. இளங்கோவன் தேர்ந்தெடுக்கப்பட்டிருந்தார்.  இவர் புதுவை அரசின் காஞ்சி மாமுனிவர் அரசு பட்டமேற்படிப்பு மற்றும் ஆராய்ச்சி நிறுவனத்தின் தமிழ்த்துறையில் பேராசிரியராகப் பணியாற்றி வருகின்றார். 

 ஈரோட்டில்  06.08.2023 அன்று நடைபெற்ற விருது வழங்கும் விழாவில் எழுத்தாளர் ஜெயமோகன், சூழலியல் அறிஞர் சு. தியடோர் பாஸ்கரன், மலையாளத் திறனாய்வு வல்லுநர் பி. கே. இராஜசேகரன் ஆகியோர் இணைந்து மு. இளங்கோவனுக்குத் தமிழ் விக்கி தூரன் விருதினை வழங்கினர். இரண்டு இலட்சம் ரொக்கப்பரிசு, நினைவுச் சிற்பம், பாராட்டிதழ் ஆகியன வழங்கப்பட்டன. இந்த நிகழ்ச்சியில் சிறப்பு விருது சிவசங்கருக்கு வழங்கப்பட்டது. 

 இரண்டு நாள் நடைபெற்ற விழாவில் மு. இளங்கோவனின் எழுத்துப்பணி, ஆவணப்படப் பணி, கணினி, இணையத்துறையில் செய்துள்ள பணிகள், நூலாக்கப் பணிகள், நாட்டுப்புறவியல் ஆய்வுகள் குறித்து கலந்துரையாடல்கள் நடைபெற்றன. சிறப்பு விருந்தினர்களுடன் தனித்தனிக் கலந்துரையாடல்களும் நடைபெற்றன. மலையாளத் திறனாய்வாளர் பி.கே. இராஜசேகரன் அவர்களின் உரையை எழுத்தாளர் ஜெயமோகன் தமிழில் மொழிபெயர்த்து வழங்கினார். எழுத்தாளர் சிவசங்கர் தம் மொழிபெயர்ப்பு, ஆய்வு, ஆவணமாக்கல் அனுபவங்களைப் பகிர்ந்துகொண்டார்.

விருது விழாவின் முதன்மை நிகழ்வுகளுள் ஒன்று தூரன் அவர்களின் இசைப்பாடல்கள் நாகசுர இசையில் வழங்கப்பட்டன. திருமெய்ஞானம் டி.பி.என். இராமநாதன், பாண்டமங்களம் ஜி. யுவராஜ் ஆகியோர் நாகசுர இன்னிசை வழங்கினர். ”கலைமாமணி” தலைச்சங்காடு டி.எம்.இராமநாதன், கட்டிமேடு பி.பாலசங்கர் ஆகியோர் தவில் இசை வழங்கினர்.

 மு.இளங்கோவன் உருவாக்கிய இரண்டு ஆவணப்படங்களின் சுருக்கப்பட்ட வடிவம் விழாவில் திரையிடப்பட்டன. தமிழகத்தின் பல பகுதிகளிலிருந்தும் வெளிநாடுகளிலிருந்தும் பலர் இந்த நிகழ்ச்சியில் கலந்துகொண்டனர்.

பங்கேற்பாளர்கள்

 

பேராசிரியர் க. இராமசாமி அவர்களின் வாழ்வும் பணிகளும் – நேர்காணல்

 

பேராசிரியர் க. இராமசாமி 

 மைசூரு இந்திய மொழிகளின் நடுவண் நிறுவனத்தில் பேராசிரியராகப் பணியாற்றியவரும் செம்மொழி நிறுவனத்தின் முன்னைப் பொறுப்பு அலுவலருமான முனைவர் க. இராமசாமி அவர்கள் மொழியியலும் தமிழும் நன்கு கற்ற பேரறிஞர் ஆவார். செம்மொழி நிறுவன வளர்ச்சியில் இவர்தம் பங்கும் பணியும் என்றும் நினைவுகூரப்படும். தமிழக மேனாள் முதலமைச்சர் கலைஞர் மு. கருணாநிதி அவர்களின் உள்ளக் குறிப்பறிந்து செம்மொழி நிறுவனத்தை மிகச் சிறப்பாக வளர்த்தெடுத்தவர். அரியலூர் மாவட்டம் பொன்பரப்பி என்னும் ஊரில் 1949 ஆம் ஆண்டில் பிறந்து, தஞ்சை சரபோசி கல்லூரி, அண்ணாமலைப் பல்கலைக்கழகம் உள்ளிட்ட கல்வி நிறுவனங்களில் கல்வி பயின்று, மைசூரு இந்திய மொழிகளின் நடுவண் நிறுவனத்தில் பல்வேறு பொறுப்புகளை ஏற்றுத் திறம்படச் செயலாற்றிய முனைவர் க. இராமசாமி அவர்களின் வாழ்க்கை வரலாற்றினை அவர் வாய்மொழியாகவே கேட்டுப் பதிவுசெய்துள்ளோம். 

மொழியியில் துறையில் இவர் நிகழ்த்திய ஆய்வுகள், இவர் வரைந்த உலகத் தரம் வாய்ந்த கட்டுரைகள், நூல்கள், செயற்கரிய செய்த செயல்கள் யாவும் இந்த நேர்காணலில் பதிவுற்றுள்ளன. ஈராண்டுக்கு முன்னமே பேராசிரியரின் அரியலூர் இல்லத்தில் இந்த நேர்காணலைப் பதிவு செய்தோம். ஆயின், எமக்கிருந்த பல்வேறு பணிகளும், படத்தொகுப்புச் செய்தவதற்குரிய நேரமும் பொருளும் கிடைப்பதற்கு அரியதாக இருந்தன. நண்பர்களின் தொடர்ந்த தூண்டுதலாலும் மலைபோல் குவிந்து கிடக்கும் எம் இல்லத்தின் பல்வேறு ஒளிக்களஞ்சியக் கோப்புகளில் இவ்வரிய கோப்புகள் காணமல் போயின் என்ன செய்வது? என்ற பதைப்பாலும் பேராசிரியர் க.இராமசாமி அவர்களின் வாழ்வியல் இதுபொழுது காணொலியாக வடிவம் பெற்றுள்ளது. பேராசிரியர் அவர்களின் வாழ்வியலை ஆவணப்படமாக்கும் முன்னோட்டமாக இந்தக் காணொலி உருவாக்கப்பட்டுள்ளது. எம் முயற்சிக்கு ஊக்கம் நல்கும் தமிழ் உணர்வாளர்கள் இந்தப் பணியைப் போற்றி வரவேற்பார்கள் என்று பெரிதும் நம்புகின்றேன்.

காணொலி இணைப்பு