முருகு சுப்பிரமணியன்
பொன்னி என்னும் இலக்கிய இதழைத் தந்த பெருமைக்குரியவர் முருகு. சுப்பிரமணியன் ஆவார். இவரும் இவர்தம் உறவினர் அரு. பெரியண்ணன் ஐயா அவர்களும் இணைந்து இந்த இதழை வெளியிட்டனர். திராவிட இயக்க ஏடுகளுள் இந்த இதழுக்கு மிகப்பெரிய இடம் உண்டு. 1947 முதல் 1953 வரை இந்த இதழ் வெளிவந்துள்ளது. புதுக்கோட்டையிலிருந்தும் சென்னையிலிருந்தும் வெளிவந்த இந்த இதழில் பாரதிதாசன் பரம்பரை என்ற தலைப்பில் 48 கவிஞர்கள் அந்நாளில் அறிமுகப்படுத்தப்பட்டுள்ளனர். பாவேந்தர் பாரதிதாசனாரின் பெருமைகளை உலகுக்கு எடுத்துரைப்பதை நோக்கமாகக் கொண்டு, வெளிவந்த இதழின் ஆசிரிய உரைகள் புகழ்பெற்றவை. கவிதைகள், கட்டுரைகள், சிறுகதைகளைக் கொண்டு இந்த இதழ் வெளிவந்துள்ளது. பொன்னி இதழ் வெளியிட்டுள்ள பொங்கல் மலர்கள் புகழ்பெற்றவை.
பொன்னி ஆசிரியர் முருகு சுப்பிரமணியன் அவர்கள் 1953 இல் மலேசியா நாட்டுக்குச் சென்றார். அங்கு வெளிவந்த தமிழ்நேசன், சிங்கப்பூரில் வெளிவந்த தமிழ் முரசு ஆகிய ஏடுகளில் பணியாற்றியவர். புதிய சமுதாயம் என்ற இதழையும் பின்னாளில் நடத்தியவர். இவர்தம் இதழ்ப்பணிகள் என்றும் நினைவுகூரத்தக்கவை. ஆராயத் தக்கவை.
முருகு அவர்களின் நூற்றாண்டு விழா 20.10.2024 (ஞாயிறு) மாலை மலேசியாவில் நடைபெற்றது. இந்த நிகழ்வுக்காக நான் நேரில் செல்ல நினைத்திருந்தேன். அலுவல் காரணமாக வாய்ப்பு அமையவில்லை, என் வாழ்த்துரையைப் பதிவு செய்து அனுப்பியிருந்தேன். நூற்றாண்டு விழாவில் வெளியிட்டு உதவிய முருகு குடும்பத்தினருக்கும், மலேசியத் தமிழ் எழுத்தாளர் சங்கத்திற்கும் நன்றி.
முருகுவின் குடும்பத்தினரும் அண்ணன் பெ. இராசேந்திரன் அவர்களும் இந்தக் காணொளி உருவாவதற்குத் தூண்டுகோலாக இருந்தனர். அவர்களுக்கு நன்றி.
முருகுவின் தமிழ்ப்பணிகளும் இதழியல் பணிகளும் உலகத் தமிழர்களால் கொண்டாடப்பட வேண்டியவை. கொண்டாடுவோம்.
முருகுவின் வாழ்க்கைக் குறிப்பு (என் பழைய பதிவு)
கருத்துகள் இல்லை:
கருத்துரையிடுக